《巴克禮普世版聖經（試讀本）》

 | | | 轉寄

巴克禮普世版（試讀本） 帖撒羅尼迦後書第一章

作者 巴克禮普世版小組 2016.01.17

1 Guá Pó-lô kah Se-lah í-ki̍p Thê-mô͘-thài siá phue hō͘ Thiap-sat-lô-nî-ka sio̍k Thiⁿ-Pē Siōng-Tsú kah Tsú Iâ-so͘ Ki-tok ê kàu-huē. 2 Guān lín tuì Thiⁿ-Pē Siōng-Tsú kah Tsú Iâ-so͘ Ki-tok tit-tio̍h un-tián kah pîng-an.

Ki-tok Tsài-lîm Hit Sî ê Sím-phuàⁿ
3 Hiaⁿ-tī tsí-muē ah, guán ing-kai uī-tio̍h lín put-sî kám-siā Siōng-Tsú, án-ne tsò sī tong-jiân, in-uī lín ê sìn-sim ū tuā sîng-tióng, lín sio-thiàⁿ ê sim mā it-ti̍t teh ke-thiⁿ. 4 Só͘-í guán tī Siōng-Tsú ê tsìng kàu-huē lóng īng lín lâi tsò khua-kháu, in-uī lín siū pik-hāi kah jím-siū huān-lān ê sî, ū pó-tshî jím-nāi kah sìn-sim. 5 Tse tsìng-bîng Siōng-Tsú phuàⁿ-tīng lín ē-kham-tit sîng-siū Siōng-Tsú ê Kok-tō͘, lín tsiū-sī uī-tio̍h tse teh kè-sio̍k siū-khó͘. 6 In-uī Siōng-Tsú tsiàu kong-gī teh sím-phuàⁿ, ē īng tsai-lān pò-ìng hiah-ê hō͘ lín tú-tio̍h tsai-lān ê lâng, 7 mā hō͘ lín tsiah-ê tú-tio̍h tsai-lān ê lâng, kah guán tâng-tsê tit-tio̍h an-hioh, tsiū-sī tī Tsú Iâ-so͘ kah ū kuân-lîng ê thiⁿ-sài tī hué-iām tiong tuì thiⁿ hián-hiān ê sî, thang kah guán tsò-hué tit-tio̍h tháu-pàng. 8 Hit sî, I ē hîng-hua̍t hiah-ê m̄-bat Siōng-Tsú kah m̄ sūn-ho̍k lán ê Tsú Iâ-so͘ ê hok-im ê lâng. 9 Tsit-tsióng lâng ē siū íng-uán bia̍t-bông ê hîng-hua̍t, kah Siōng-Tsú keh-lī, lī-khui I îng-iāu ê khuì-la̍t. 10 Tsú tsài-lîm ê ji̍t, I tuì tsiah-ê sìn-tô͘ tit-tio̍h îng-iāu, koh tit-tio̍h só͘-ū sìn I ê lâng o-ló, in-uī lín ū sìn guán tuì lín só͘ tsò ê kiàn-tsìng. 11 Uī-tio̍h án-ne, guán mā put-sî thè lín kî-tó, guān lán ê Siōng-Tsú hō͘ lín ê sing-ua̍h ē hû-ha̍p I ê ho͘-tiàu, mā siúⁿ-sù lín ū khuì-la̍t lâi uân-sîng it-tshè hiòng-siān ê guān-bōng kah khò sìn-sim só͘ tsò ê kang, 12 thang hō͘ lán ê Tsú Iâ-so͘ ê miâ tuì lín tit-tio̍h îng-kng, lín mā tuì I tit-tio̍h îng-kng. Tse lón sī lán ê Siōng-Tsú kah Tsú Iâ-so͘ Ki-tok ê un-tián.