《巴克禮普世版聖經(試讀本)》

| | | 轉寄

巴克禮普世版(試讀本) 帖撒羅尼迦後書第二章

Put-huat ê Lâng
1 Hiaⁿ-tī tsí-muē ah, kuan-hē lán ê Tsú Iâ-so͘ Ki-tok ê tsài-lîm í-ki̍p lán siū tiàu-tsi̍p kah I tsò-hué ê tāi-tsì, guán khún-kiû lín, 2 Nā ū-lâng ká-mō͘ guán ê miâ kóng guán ī-giân, á-sī thuân-káng, á-sī siá phue kóng, "Tsú ê Ji̍t tsit-má kàu à." Lín ê sim m̄-thang suî-piān iô-tāng, mā m̄-thang kiaⁿ-hiâⁿ. 3 Lâng bô-lūn īng sím-mi̍h hong-huat, lóng m̄-thang hō͘ lâng phiàn-khì, in-uī hit Ji̍t beh kàu tsìn-tsîng, it-tīng sing ū puē-kàu ê tāi-tsì huat-sing, mā ū put-huat ê lâng, tsiū-sī tsù-tiāⁿ bia̍t-bông ê lâng ē tshut-hiān. 4 Hit-ê lâng huán-tuì só͘-ū ê sîn-bîng á-sī kìng-pài ê tuì-siōng, koh kiau-ngō͘ kóng iâⁿ-kuè it-tshè, sīm-tsí khì tsē tī Siōng-Tsú ê sìng-tiān, tsū-tshing tsò Siōng-Tsú. 5 Guá iáu kah lín tsò-hué ê sî, bat kā lín kóng tsiah-ê tāi-tsì, lín kám bē kì-tit? 6 Lín lóng tsai, tsit-má sím-mi̍h teh tsó͘-tòng hit-ê put-huat ê lâng, hō͘ i sî-kî kàu tsiah tshut-hiān. 7 In-uī hit-ê put-huat ê sîn-pì sè-li̍k í-king khai-sí teh ūn-tsok, m̄-koh tán kàu tsó͘-tòng ê sè-li̍k thiat-lī liáu-āu tsiah ē huat-sing. 8 Hit sî, put-huat ê lâng tshut-hiān, Tsú Iâ-so͘ tsài-lîm ê sî ē īng I ê tshuì thò͘ tsi̍t-kháu khì lâi kā i thâi-sí, īng I tsài-lîm hián-hiān ê îng-kng lâi kā i siau-bia̍t. 9 Hit-ê put-huat ê lâng lîm-kàu ê sî, khò Sat-tàn ta̍k-tsióng ê kuân-sè, lâi kiâⁿ ké sîn-jiah kah kî-sū. 10 Koh īng kok-tsióng put-gī ê khuí-kè lâi khi-phiàn hiah-ê teh beh bia̍t-bông ê lâng, in-uī in bô tsiap-la̍p ē-tàng hō͘ in tit-kiù ê tsin-lí. 11 In-uī án-ne, Siōng-Tsú hō͘ in sán-sing kiông-lia̍t ê tshò-kak khì siong-sìn hiah-ê hi-ké. 12 Kiat-kó hō͘ m̄ sìn tsin-lí tian-tò ì-ài put-gī ê lâng lóng siū tīng-tsuē.

Siū Kíng-suán Lâi Tit-kiù
13 Tsú só͘ thiàⁿ ê hiaⁿ-tī tsí-muē ah, guán tio̍h put-sî uī-tio̍h lín kám-siā Siōng-Tsú, in-uī Siōng-Tsú tuì khí-thâu to̍h kíng-suán lín lâi hō͘ lín tit-kiù, hō͘ lín uá-khò Sìng-Sîn lâi tsiâⁿ-tsò sìng-kiat ê tsú-bîn, koh hō͘ lín siong-sìn tsin-lí. 14 Siōng-Tsú thong-kuè guán só͘ thuân hō͘ lín ê hok-im ho͘-tiàu lín, lâi hióng-siū lán ê Tsú Iâ-so͘ Ki-tok ê îng-kng. 15 Só͘-í, hiaⁿ-tī tsí-muē ah, lín tio̍h kian-tīng sìn-sim, kian-tshî tsun-siú guán só͘ kà-sī lín ê tsin-lí, bô-lūn sī īng tshuì kóng ê á-sī īng phue siá ê, it-tshè só͘ ha̍k-si̍p ê lóng tio̍h tsun-siú. 16 Guān thiàⁿ lán ê Tsú Iâ-so͘ Ki-tok kah lán ê Thiⁿ-Pē Siōng-Tsú, īng I ê un-tián siúⁿ-sù lán íng-uán ê an-uì kah bí-hó ê ǹg-bāng, 17 lâi an-uì lín ê sim, hō͘ lín ū khuì-la̍t thang tsò ta̍k-hāng hó-sū, suan-káng ta̍k-tsióng ê hó-uē.