《巴克禮普世版聖經(試讀本)》

| | | 轉寄

巴克禮普世版(試讀本) 提摩太前書第二章

Kàu-huē ê Tsông-pài
1 Só͘-í guá tāi-sing khuàn-bián lí tio̍h thè só͘-ū ê lâng hiòng Siōng-Tsú khún-kiû, kî-tó, tāi-tó kah kám-siā. 2 Mā tio̍h thè kun-ông kah só͘-ū ê kuaⁿ-uân kî-tó, hō͘ lán thang an-jiân pîng-tsīng lâi kuè-ji̍t. huān-sū kìng-khiân, tuan-tsìng. 3 Án-ne tsò tsin hó, sī lán ê Kiù-Tsú, Siōng-Tsú huaⁿ-hí tsiap-la̍p-.ê. 4 Siōng-Tsú ài lán lóng ē-tàng tit-kiù, jīn-bat tsin-lí. 5 In-uī Siōng-Tsú sī tsi̍t-uī, Siōng-Tsú kah lâng tiong-kan ê tiong-pó mā sī tsi̍t-uī, tsiū-sī tsiâⁿ-tsò lâng ê Ki-tok Iâ-so͘. 6 I hi-sing ka-kī ê sèⁿ-miā lâi sio̍k-huê tsìng-lâng, tsit-ê tāi-tsì tī Siōng-Tsú tsí-tīng ê ji̍t-tsí ē tit-tio̍h tsìng-si̍t. 7 Uī-tio̍h án-ne, guá siū siat-li̍p tsò thuân-tō-tsiá, tsò sù-tô͘ kah Guā-pang-lâng ê kàu-su, hō͘ in siong-sìn Siōng-Tsú, jīn-bat tsin-lí. Guá sī teh kóng tsin-si̍t-uē, bô kóng pe̍h-tsha̍t. 8 Só͘-í guá ài tsa-po͘-lâng bô-lūn tī sím-mi̍h só͘-tsāi, to bô siū-khì mā bô giâu-gî, gia̍h-khí sîn-sìng ê siang-tshiú lâi kî-tó. 9 Guá mā ài hū-jîn-lâng tshīng-tshah pho̍k-sò͘ tsíng-tsê, īng liâm-thí siú-kí ê thài-tō͘, m̄-thang īng kî-hîng kuài-tsōng ê thâu-mn̂g kah kim-khì á-sī tsin-tsu, á-sī ta̍t tsîⁿ ê saⁿ-khò͘ lâi táⁿ-pān ka-kī. 10 Tio̍h īng hó hîng-uî tsò táⁿ-pān, piáu-sī ka-kī sī kìng-uì Siōng-Tsú ê hū-jîn-lâng. 11 Hū-jîn-lâng tio̍h tiām-tiām-á ha̍k-si̍p, ta̍k-hāng tāi-tsì lóng tio̍h khiam-pi sūn-ho̍k. 12 Guá m̄-tsún hū-jîn-lâng kà-sī tō-lí, á-sī kuán-hat tsa-po͘-lâng, tio̍h tsīng-tsīng. 13 In-uī Siōng-Tsú sing tsō A-tong liáu-āu tsiah tsō Hā-ua. 14 Koh m̄-sī A-tong siū khi-phiàn, sī hū-jîn-lâng siū iú-hi̍k lâi hām-lo̍h tsuē. 15 M̄-koh hū-jîn-lâng nā an-hūn siú-kí tshî-siú sìn-gióng, ū thiàⁿ-sim koh sìng-kiat, tsiū ē in-uī seⁿ-kiáⁿ lâi tit-tio̍h kiù.