《巴克禮普世版聖經(試讀本)》

| | | 轉寄

巴克禮普世版(試讀本) 雅各書第一章

1 Guá, Ngá-kok sī Siōng-Tsú kah Tsú Iâ-so͘ Ki-tok ê lô͘-po̍k, beh kā só͘-ū sì-suàⁿ tuà tī ta̍k só͘-tsāi Siōng-Tsú ê tsú-bîn tshíng-an.

Sìn-gióng Kah Tì-huī
2 Hiaⁿ-tī tsí-muē ah, lín tú-tio̍h tsióng-tsióng ê tshì-thàm, lóng tio̍h kā i siūⁿ-tsò sī thang huaⁿ-hí ê tāi-tsì, 3 in-uī guá tsai lín ê sìn-gióng king-kuè khó-giām ē sán-sing jím-nāi. 4 Tio̍h jím-nāi kàu-té tsiah ē-tàng hō͘ lín ta̍t-kàu si̍p-tsuân si̍p-bí, bô sím-mi̍h khiàm-khueh. 5 Lín tiong-kan nā ū-lâng khiàm-khueh tì-huī, tio̍h tuì Siōng-Tsú kî-kiû, in-uī Siōng-Tsú tsin khóng-khài koh tsû-pi siúⁿ-sù tsìng-lâng. 6 M̄-koh tio̍h khò sìn-sim lâi kiû, m̄-thang giâu-gî, in-uī giâu-gî ê lâng ná tshin-tshiūⁿ hái-íng hō͘ hong sàu kah khí-khí-lo̍h-lo̍h. 7 Tsit-khuán lâng bián siūⁿ-kóng tuì Tsú ū thang tit-tio̍h sím-mi̍h, 8 in-uī sam-sim-lióng-ì ê lâng bô-lūn tsò sím-mi̍h lóng bô tīng-tsún.

Sàn-tshiah Kah Hù-kuì
9 Pi-bî ê hiaⁿ-tī nā tit-tio̍h Siōng-Tsú kā i thê-sing sin-hūn, ing-kai tio̍h in-uī án-ne lâi khua-kháu. 10 Hó-gia̍h ê lâng nā hō͘ Siōng-Tsú kàng-kē sin-hūn mā tio̍h án-ne, in-uī lâng ê hù-kuì ē tshin-tshiūⁿ tsháu-á ê hue siā-khì. 11 Ji̍t-thâu tsi̍t-ē tshut, sio-hong tsi̍t-ē tshue, tsháu-á tsiū ta-khì, hue mā siā-khì, i ê suí tsiū siau-sit. Hó-gia̍h-lâng bô-îng phun-pho mā ē án-ne siau-sit khì.

Tshì-liān Kah Iú-hi̍k
12 Jím-siū tshì-liān ê lâng ū hok-khì, in-uī king-kuè tshì-liān tsiū ē tit-tio̍h ua̍h-miā, tse sī Siōng-Tsú ìng-ín beh hō͘ thiàⁿ I ê lâng ê bián-liû. 13 Tú-tio̍h tshì-liān ê lâng m̄-thang kóng, "Guá hō͘ Siōng-Tsú iú-hi̍k", in-uī Siōng-Tsú bē siū siâ-ok iú-hi̍k, I ka-kī mā bē iú-hi̍k lâng. 14 Lâng lóng sī hō͘ ka-kī ê su-io̍k iú-hi̍k. 15 Su-io̍k huâi-īn tsiū seⁿ-tshut tsuē-ok, tsuē-ok tióng-sîng liáu-āu tsiū seⁿ-tshut sí-bông. 16 Tshin-ài ê hiaⁿ-tī tsí-muē, m̄-thang hō͘ lâng khi-phiàn. 17 It-tshè bí-hó ê siúⁿ-sù kah uân-tsuân ê un-sù lóng sī tuì thiⁿ-tíng kng-bîng ê Thiⁿ-Pē siúⁿ-sù. I íng-uán bē kái-piàn, mā bô tńg-se̍h ê iáⁿ-jiah. 18 Siōng-Tsú tsiàu ka-kī ê tsí-ì īng tsin-lí ê tō lâi tsō lán, hō͘ lán tī I só͘ tshòng-tsō ê bān-bu̍t tiong-kan ū siōng tiōng-iàu ê tē-uī.

Thiaⁿ Tō-lí Kah Kiâⁿ Tō-lí
19 Tshin-ài ê hiaⁿ-tī tsí-muē, lín tio̍h ē-kì-tit. Ta̍k-lâng tio̍h thiaⁿ lâng ê ì-kiàn, kóng-uē tio̍h kín-sīn, m̄-thang khuài siū-khì. 20 In-uī lâng ê siū-khì bē-tàng si̍t-hiān Siōng-Tsú ê kong-gī. 21 Só͘-í lín tio̍h tû-khì it-tshè ê pháiⁿ si̍p-kuàn kah tsuē-ok kuàn-buán ê hîng-uî, īng un-jiû ê sim lâi tsiap-la̍p hit-ê tsìng tī sim-lāi ē kiù lín lîng-hûn ê tō-lí. 22 Tio̍h si̍t-hiān tō-lí, m̄-sī khi-phiàn ka-kī kóng kan-taⁿ thiaⁿ tō-lí to̍h hó. 23 Kan-taⁿ thiaⁿ tō-lí bô khì si̍t-hiān ê lâng tú tshin-tshiūⁿ lâng tī kiàⁿ-ni̍h siông-sè khuàⁿ i ka-kī ê bīn, 24 Siông-sè khuàⁿ liáu-āu tsiū tsò i khì, suî-sî bē kì-tit i seⁿ-tsò sím-mi̍h khuán. 25 M̄-koh tsù-sîn tsa-khó hit-ê hō͘ lâng tit-tio̍h tsū-iû ê lu̍t-huat koh kè-sio̍k tsun-hîng ê lâng, it-tīng ē tit-tio̍h Siōng-Tsú ê tsiok-hok, in-uī i ū si̍t-tsāi khì si̍t-hiān, m̄-sī thiaⁿ-liáu tsiū bē kì-tit. 26 Nā ū-lâng siūⁿ-kóng ka-kī tsin kìng-khiân, m̄-koh bô iok-sok ka-kī ê tshuì-tsi̍h, he sī teh khi-phiàn ka-kī, tsit-tsióng lâng ê kìng-khiân lóng bô tshái-kang. 27 Khuàⁿ-kò͘ khó͘-lān-tiong ê ko͘-jî kuáⁿ-hū koh pó-siú ka-kī bô hō͘ sè-sio̍k ê hú-pāi ù-jiám, tuì Thiⁿ-Pē Siōng-Tsú khuàⁿ khí-lâi, tse tsiah-sī tshing-khì bô lah-sap ê kìng-khiân.