《巴克禮普世版聖經(試讀本)》

| | | 轉寄

巴克禮普世版(試讀本) 約翰一書第二章

Ki-tok Uī Lán Piān-hō͘
1 Tshin-ài ê siàu-liân-lâng, guá siá tsiah-ê hō͘ lín, sī beh hō͘ lín bô huān-tsuē. Nā ū-lâng huān-tsuē, tī Thiⁿ-Pē ê bīn-tsîng lán ū gī-lâng Iâ-so͘ Ki-tok uī lán piān-hō͘. 2 Ki-tok uī-tio̍h lán ê tsuē, mā uī-tio̍h tsuân sè-kài ê tsuē tsò sio̍k-tsuē-tsè. 3 Lán nā tsun-siú Siōng-Tsú ê kài-bīng, tsiū án-ne lán ē-tàng khak-sìn lán bat Siōng-Tsú. 4 Lâng nā kóng, "Guá bat Siōng-Tsú", m̄-koh bô teh tsun-siú I ê bīng-līng, tsit-ê lâng sī teh kóng pe̍h-tsha̍t, i ê sim-tiong bô tsin-lí. 5 M̄-koh lâng nā tsun-siú Siōng-Tsú ê tō-lí, i tuì Siōng-Tsú ê thiàⁿ tsiū uân-tsuân si̍t-tsāi, án-ne lán tsiū ē-tàng khak-sìn lán ū tsiàu Siōng-Tsú ê tsí-ì teh sing-ua̍h. 6 Lâng nā kóng ka-kī ū tsun-tsiàu Siōng-Tsú ê tsí-ì, ing-kai tio̍h tsiàu Iâ-so͘ Ki-tok ê giân-hîng kú-tsí lâi sing-ua̍h.

Sin ê Kài-bīng
7 Tshin-ài ê hiaⁿ-tī tsí-muē, guá bô siá sin ê bīng-līng hō͘ lín, sī lín tuì khí-thâu to̍h ū hit-ê kū ê kài-bīng, sī lín bat thiaⁿ-kuè ê sìn-sit. 8 M̄-koh tuì līng-guā tsi̍t-ê kak-tō͘ khuàⁿ khí-lâi, guá siá hō͘ lín ê kài-bīng sī sin ê, tuì Ki-tok kah lín lâi kóng lóng sī tsin-si̍t ê, in-uī o͘-àm teh kuè-khì, tsin-kng í-king teh tsiò. 9 Lâng nā kóng ka-kī sing-ua̍h tī kng-bîng-tiong, m̄-koh iáu-teh uàn-hūn i ê hiaⁿ-tī á-sī tsí-muē, sū-si̍t-siōng i iáu-koh sing-ua̍h tī o͘-àm-tiong. 10 Thiàⁿ hiaⁿ-tī á-sī tsí-muē ê lâng sī tī kng-bîng-tiong teh sing-ua̍h, bē tì-sú hō͘ lâng pua̍h-tó huān-tsuē. 11 M̄-koh uàn-hūn hiaⁿ-tī á-sī tsí-muē ê lâng sī ua̍h tī o͘-àm-tiong. I tī o͘-àm-tiong teh sing-ua̍h m̄-tsai ka-kī ê hong-hiòng, in-uī tsit-ê o͘-àm hō͘ i ê ba̍k-tsiu tsheⁿ-mê. 12 Sè-kiáⁿ, guá siá phue hō͘ lín, in-uī khò Ki-tok ê miâ lín ê tsuē í-king tit-tio̍h sià-bián. 13 Hū-ló sī-tuā, guá siá-phue hō͘ lín, in-uī lín jīn-bat tuì guân-khí-thâu to̍h tsûn-tsāi ê Hit-uī. Siàu-liân lâng, guá siá-phue hō͘ lín, in-uī lín í-king iâⁿ-kuè hit-ê siâ-ok. 14 Sè-kiáⁿ, guá siá-phue hō͘ lín, in-uī lín jīn-bat Thiⁿ-Pē. Hū-ló sī-tuā, guá siá-phue hō͘ lín, in-uī lín jīn-bat hit-ê tuì guân-khí-thâu to̍h tsûn-tsāi ê Hit-uī. Tshing-liân lâng, guá siá-phue hō͘ lín, in-uī lín ióng-kiāⁿ, mā ū Siōng-Tsú ê tō-lí tī lín sim-lāi, lín koh í-king iâⁿ-kuè hit-ê siâ-ok. 15 M̄-thang tham-luân sè-kan á-sī sè-kan ê mi̍h. Lâng nā thiàⁿ tsit sè-kan, i tsiū bô thiàⁿ Thiⁿ-Pē. 16 In-uī it-tshè sio̍k sè-kan ê, tshin-tshiūⁿ jio̍k-thé ê tsîng-io̍k, ba̍k-tsiu ê io̍k-bōng kah sè-sio̍k ê kiau-ngō͘, lóng m̄-sī tuì Thiⁿ-Pē lâi, sī tuì sè-kan lâi-.ê. 17 Tsit sè-kan kah sè-kan ê tsîng-io̍k teh kuè-khì, tsóng-sī si̍t-hîng Siōng-Tsú tsí-ì ê lâng íng-uán tsûn-tsāi.

Ki-tok ê Tuì-ti̍k
18 Sè-kiáⁿ, bua̍t-ji̍t teh-beh kàu à! Lín ū thiaⁿ-tio̍h Ki-tok ê tuì-ti̍k teh-beh lâi, tsit-má í-king ū tsin-tsē Ki-tok ê tuì-ti̍k tshut-hiān, tsiū án-ne lán tsai bua̍t-ji̍t teh-beh kàu à. 19 Tsiah-ê lâng si̍t-tsāi m̄-sī lán ê lâng, só͘-í tuì lán tiong-kan tshut-khì. In nā-sī sio̍k tī lán, tsiū ē kè-sio̍k kah lán tsò-hué. In lī-khui lán sī beh hián-bîng in lóng m̄-sī sio̍k tī lán. 20 Lín í-king lóng ū tuì Ki-tok niá-siū Sìng-Sîn, só͘-í lín lóng bat tsin-lí. 21 Guá siá-phue hō͘ lín, m̄-sī in-uī lín m̄-bat tsin-lí, sī in-uī lín bat tsin-lí, koh tsai it-tshè ê pe̍h-tsha̍t lóng m̄-sī tuì tsin-lí lâi. 22 Án-ne sī sím-mi̍h-lâng teh kóng pe̍h-tsha̍t? It-tīng sī kī-tsua̍t Iâ-so͘ tsò Ki-tok ê lâng. Kī-tsua̍t Thiⁿ-Pē kah Kiáⁿ ê tsiū-sī Ki-tok ê tuì-ti̍k. 23 Kī-tsua̍t Kiáⁿ ê lâng bô tsiap-la̍p Thiⁿ-Pē. Sîng-jīn Kiáⁿ ê lâng mā ē sîng-jīn Thiⁿ-Pē. 24 Lín tio̍h kian-siú tuì khí-thâu só͘ thiaⁿ-tio̍h ê sìn-sit. Lín nā kian-siú tuì khí-thâu só͘ thiaⁿ ê sìn-sit, lín tsiū ē kè-sio̍k ua̍h tī Kiáⁿ kah Thiⁿ-Pē ê lāi-bīn. 25 Tse tsiū-sī Ki-tok hō͘ lán ê ìng-ín, sī íng-uán ê ua̍h-miā. 26 Guá siá tsiah-ê tāi-tsì hō͘ lín, sī teh tsí hiah-ê siūⁿ-beh bê-hi̍k lín ê lâng. 27 Tuì lín lâi kóng, lín tuì Ki-tok niá-siū ê Sìng-Sîn sî-khik kah lín tông-tsāi, bián lâng lâi kā lín kà-sī, in-uī tsit-ê Sìng-Sîn ē kà-sī lín bān-hāng sū. I ê kà-sī sī tsin-si̍t m̄-sī pe̍h-tsha̍t. Lín tio̍h tsun-tsiàu Sìng-Sîn ê kà-sī, tio̍h kah Ki-tok kiat-liân lâi sing-ua̍h. 28 Taⁿ, sè-kiáⁿ, lín tio̍h kah Ki-tok kiat-liân lâi sing-ua̍h, án-ne tī Ki-tok tsài-lîm ê sî ē-tàng hó-táⁿ, bē in-uī I ê tsài-lîm kám-kak kiàn-siàu tsáu-khì bih. 29 Lín nā tsai Ki-tok sī kong-gī, mā tio̍h tsai si̍t-hîng kong-gī ê lâng tsiah sī Siōng-Tsú ê kiáⁿ-jî.