《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第九章

1 Tē-gō͘-ê thiⁿ-sài tsi̍t-ē pûn, guá khuàⁿ-tio̍h tsi̍t-lia̍p tsheⁿ tuì thiⁿ-tíng lak lo̍h-tē. Tsit-lia̍p tsheⁿ ū niá-siū bô-té tshim-kheⁿ ê só-sî. 2 Hit-lia̍p tsheⁿ phah-khui bô-té tshim-kheⁿ, tsiū ū tshin-tshiūⁿ tuā hué-lô͘ ê ian tuì tshim-kheⁿ tshìng khí-lâi. Ji̍t-thâu kah thài-khong lóng in-uī tshim-kheⁿ ê ian piàn o͘-àm. 3 Ū tsháu-meh tuì ian ê lāi-bīn tshut-lâi hioh tī tē-tsiūⁿ. In ū niá-siū tshin-tshiūⁿ tē-tsiūⁿ ê giat-á-thâng só͘ ū ê kuân-pìng. 4 Hiah-ê tsháu-meh siū kau-tài m̄-thang siong-hāi tē-tsiūⁿ ê tsheⁿ-tsháu, tshiū-ba̍k kah só͘-ū ê si̍t-bu̍t, kan-taⁿ thang siong-hāi hiah-ê tī thâu-hia̍h bô hō͘ Siōng-Tsú khap-ìn tsò kì-hō ê lâng. 5 Koh m̄-tsún tsháu-meh hāi-sí tsiah-ê lâng, kan-taⁿ hō͘ in siū-khó͘ gō͘-gue̍h-ji̍t kú. In ê thòng-khó͘ tú tshin-tshiūⁿ hō͘ giat-á-thâng kā-tio̍h ê thàng-thiàⁿ. 6 Tī hit gō͘-gue̍h-ji̍t tiong-kan, lâng kiû beh sí mā bē tit sí, ài beh sí mā sí bē khì. 7 Tsháu-meh ê hîng-tsōng tshin-tshiūⁿ tsún-pī beh tshut-tsiàn ê bé, thâu-khak tíng kah-ná ū tì kim ê bián-liû, in ê bīn tshin-tshiūⁿ lâng ê bīn. 8 Ū tshin-tshiūⁿ tsa-bó͘-lâng ê thâu-mn̂g, koh ū tshin-tshiūⁿ sai ê gê. 9 Hing-khám ū tshin-tshiūⁿ thih ê tsiàn-kah. In ê si̍t huat-tshut ê siaⁿ tshin-tshiūⁿ tsin-tsē bé-tshia phun-tsáu khì kau-tsiàn ê siaⁿ. 10 In ū tshin-tshiūⁿ giat-á-thâng ê bué-liu ū tshì. In ū kuân-lîng thang īng tsit-ê bué-liu lâi siong-hāi lâng gō͘-gue̍h-ji̍t kú. 11 Tsháu-meh ū tsi̍t-ê ông, tsiū-sī kuán-hat bô-té tshim-kheⁿ ê thiⁿ-sài. I ê miâ Hi-pik-lâi-gí kiò-tsò "A-pa-tùn", Hi-lia̍p-gí kiò-tsò "A-pho-lûn". 12 Thâu tsi̍t-ê tsai-hō í-king kuè-khì, í-āu iáu ū nn̄g-ê tsai-hō teh-beh lâi. 13 Tē-la̍k-ê thiⁿ-sài tsi̍t-ē pûn, guá thiaⁿ-tio̍h tsi̍t-ê siaⁿ tuì Siōng-Tsú bīn-tsîng ê kim-tuâⁿ sì-ê kak tshut-lâi, 14 kā gia̍h lat-pah ê tē-la̍k-ê thiⁿ-sài kóng, "Lí tio̍h kā pa̍k tī Iù-huat-la̍h-tí/Iù-huat-la̍h-tí tuā-hô hit sì-ê thiⁿ-sài tháu-pàng tshut-lâi." 15 Hit sì-ê thiⁿ-sài siū tháu-pàng ê tāi-tsì sī tsá to̍h an-pâi hó-sè, tī hit-ê sî, hit-ê ji̍t, hit-ê gue̍h, hit-ê nî, beh lâi hāi-sí jîn-luī ê saⁿ-hūn tsi-it. 16 Guá ū thiaⁿ-kóng bé-ping ê sò͘-bo̍k lóng-tsóng ū nn̄g-ik. 17 Guá tī īⁿ-siōng tiong khuàⁿ-tio̍h bé kah khiâ-bé ê lâng án-ne: in tshīng ê tsiàn-kah ê sik-tì âng kah tshin-tshiūⁿ hué, nâ kah tshin-tshiūⁿ nâ-pó-tsio̍h, n̂g kah tshin-tshiūⁿ liû-hông. Bé ê thâu tshin-tshiūⁿ sai ê thâu, tuì in ê tshuì thò͘-tshut hué, ian kah liû-hông. 18 Jîn-luī ê saⁿ-hūn tsi-it hō͘ tuì hit-tsiah bé ê tshuì thò͘ tshut-lâi ê hué, ian kah liû-hông saⁿ-hāng ê tsai-hō sat-hāi. 19 Tsiah-ê bé ê kuân-pìng tī in ê tshuì kah bué-liu, in-uī in ê bué-liu tshin-tshiūⁿ tsuâ ū thâu, īng hiah-ê thâu siong-hāi lâng. 20 Kî-tha bô siū tsiah-ê tsai-hō sat-hāi ê lâng iáu-koh bô-beh hué-kái, bô hòng-khì in ê tshiú só͘ tsō ê ngó͘-siōng, iû-guân pài hiah-ê kuí kah bē khuàⁿ, bē thiaⁿ, bē kiâⁿ īng kim, gîn, tâng, tsio̍h, tshâ só͘ tsō ê ngó͘-siōng. 21 Hiah-ê lâng huān-tio̍h thâi-lâng, siâ-su̍t, îm-luān kah thau-the̍h ê tsuē, mā bô hué-kái.