《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第十章

Thiⁿ-sài Kah Sè-kńg-tsheh
1 Guá koh khuàⁿ-tio̍h līng-guā tsi̍t-ê tuā khuì-la̍t ê thiⁿ-sài tuì thiⁿ kàng lo̍h-lâi, i īng hûn tsò saⁿ tshīng, thâu-khak tíng ū khīng, i ê bīn tshin-tshiūⁿ ji̍t-thâu, kha tshin-tshiūⁿ hué-thiāu. 2 I ê tshiú the̍h tsi̍t-kńg í-king hian-khui ê sè-kńg tsheh, tsiàⁿ-kha ta̍h tī hái-ni̍h, tò-kha ta̍h tī tē-tsiūⁿ. 3 I tshin-tshiūⁿ sai teh háu tuā-siaⁿ huah ê sî, hit tshit-ê luî tsiū tshut-siaⁿ huê-ìng. 4 Tshit-ê luî tshut siaⁿ liáu-āu, guá tú-beh siá lo̍h-lâi ê sî, guá thiaⁿ-tio̍h tuì thiⁿ ū siaⁿ kóng, "Tshit-ê luî só͘ kóng ê, lí tio̍h pó-siú pì-bi̍t, m̄-thang siá lo̍h-lâi." 5 Jiân-āu guá khuàⁿ-tio̍h khiā tī hái kah tē-tsiūⁿ ê thiⁿ-sài gia̍h-khí i ê tsiàⁿ-tshiú ǹg thiⁿ, 6 kí Hit-uī tshòng-tsō thiⁿ kah thiⁿ-tíng ê mi̍h, tē kah tē-tsiūⁿ ê mi̍h, hái kah hái-ni̍h ê mi̍h, íng-uán ua̍h-teh ê Siōng-Tsú lâi tsiù-tsuā kóng, "Bē-koh iân-tshiân lò͘!" 7 M̄-koh tī tē-tshit-ê thiⁿ-sài pûn lat-pah ê ji̍t, lat-pah ê siaⁿ hiáng ê sî, Siōng-Tsú tsiàu thuân hō͘ I ê lô͘-po̍k, tsiū-sī hiah-ê sian-ti ê ò-biāu tsiū ē si̍t-hiān." 8 Í-tsîng tuì thiⁿ-tíng kā guá kóng-uē hit-ê siaⁿ, taⁿ koh tuì guá kóng, "Lí khì kā kha ta̍h hái kah tē-tsiūⁿ hit-ê thiⁿ-sài tshiú-tiong hit-kǹg hian-khui ê tsheh the̍h lâi." 9 Guá tsiū khì hit-ê thiⁿ-sài hia, tshiáⁿ i kā hit-kǹg sè-kńg tsheh hō͘ guá. I kā guá kóng, "Lí the̍h-khì kā i tsia̍h lo̍h-khì, lí ê pak-tó͘ ē kám-kak khó͘, m̄-koh tī tshuì-lāi ē tiⁿ kah tshin-tshiūⁿ bi̍t." 10 Guá tsiū tuì thiⁿ-sài ê tshiú the̍h hit-pún sè-kńg tsheh lâi tsia̍h. Tshuì-lāi kó-jiân tiⁿ kah tshin-tshiūⁿ bi̍t, thun lo̍h-khì pak-tó͘ tsiū piàn khó͘. 11 Thiⁿ-sài kā guá kóng, "Lí tio̍h koh suan-pò͘ kuan-hē Siōng-Tsú tuì kok-tsióng bîn-tso̍k, kok-ka, gí-giân kah kun-ông ī-giân ê tāi-tsì."