《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第一章

作者 巴克禮普世版小組 2011.10.30

1, Siōng-tsú ê Kiáⁿ Iâ-so͘ Ki-tok hok-im ê khí-thâu.
2, Tshin-tshiūⁿ tī sian-ti Í-sài-a ê tsheh só͘ kì-tsài kóng, Guá tshe guá ê sù-tsiá tī lí ê bīn-tsîng, Lâi siu-tsíng lí ê lō͘;
3, Ū teh kiò tī khòng-iá ê, i ê siaⁿ kóng, Tio̍h tsún-pī Tsú ê lō͘, Siu ti̍t I ê sió lō͘.
4, Iok-hān lâi tī khòng-iá kiâⁿ sé-lé, thuân hué-kái ê sé-lé, hō͘ lâng tit-tio̍h sià-tsuē.
5, Thong Iû-thài tē-khu kap Iâ-lō͘-sat-líng ê tsìng lâng lóng tshut-lâi tsiū-kūn i, jīn in ê tsuē, tī Iok-tàn-hô tuì i siū sé-lé.
6, Tsit-ê Iok-hān tshīng lo̍k-tô-mn̂g, io hâ phuê-tuà, tsia̍h tsháu-meh kap suaⁿ-iá ê bi̍t.
7, I thuân kóng, Ū tsi̍t-ê pí guá khah ū kuân-lîng ê tè-bé guá lâi; tsiū khut-lo̍h lâi tháu I ê uê-tuà, guá iā bē kham-tit.
8, Guá bat īng tsuí kā lín kiâⁿ sé-lé, I bueh īng Sìng Lîng kā lín sué.
9, Tng tsiah-ê ji̍t Iâ-so͘ tuì Ka-lī-lī-síng ê Ná-sat-li̍k lâi, tī Iok-tàn-hô tuì Iok-hān siū sé-lé.
10, Tsik-sî tuì tsuí khí-lâi, tsiū khuàⁿ-tio̍h thiⁿ li̍h-khui, Sìng Lîng tshin-tshiūⁿ hún-tsiáu kàng-lîm tī I ê tíng-bīn;
11, koh tuì thiⁿ ū siaⁿ kóng, Lí sī guá só͘ thiàⁿ ê Kiáⁿ, guá huaⁿ-hí lí.
12, Sìng Lîng tsik-sî pik I khì khòng-iá.
13, Tī khòng-iá sì-tsa̍p ji̍t, tú-tio̍h Sat-tàn tshì, iā kap iá-siù saⁿ-kap tuà; ū thiⁿ-sài su-hāu I.
14, Iok-hān í-king kuaiⁿ-kaⁿ, Iâ-so͘ kàu Ka-lī-lī-síng, thuân Siōng-tsú ê hok-im, kóng,
15, Ji̍t-kî muá à, Siōng-tsú ê kok kūn à; lín tio̍h hué-kái lâi sìn hok-im.
16, Iâ-so͘ king-kue3Ka-lī-lī-síng ê hái-kîⁿ, khuàⁿ-tio̍h Se-bûn kap i ê hiaⁿ-tī An-tik-lia̍t pha bāng tī hái-ni̍h; in-uī sī thó-hî lâng.
17, Iâ-so͘ kā in kóng, Lín lâi tuè guá, guá bueh hō͘ lín tit-tio̍h lâng tshin-tshiūⁿ thó-hî ê.
18, In liâm-piⁿ lī-khui bāng, lâi tuè I.
19, Lio̍h-á tsìn-tsîng, khuàⁿ-tio̍h Se-pí-thài ê kiáⁿ Ngá-kok kap i ê hiaⁿ-tī Iok-hān tī tsûn-ni̍h teh pó͘ bāng.
20, I liâm-piⁿ tsio in, in tsiū pài-pia̍t in lāu-pē Se-pí-thài kap tshiàⁿ-kang lâng tī tsûn-ni̍h, lâi tuè tī I ê āu-bīn.
21, In ji̍p Ka-pik-lông, Iâ-so͘ tī an-hioh-ji̍t ji̍p huē-tn̂g, kà-sī lâng.
22, Lâng kî-kuài I ê kà-sī; in-uī I kà-sī lâng tshin-tshiūⁿ ū kuân ê, bô tshin-tshiūⁿ king-ha̍k-kàu-su.
23, Tú-á huē-tn̂g lāi ū tsi̍t ê huān-tio̍h kuí ê lâng âu-kiò kóng,
24, Ná-sat-li̍k-lâng Iâ-so͘, guán kap lí sím-mi̍h kan-sia̍p? Lí lâi bueh bia̍t guán mah? Guá tsai lí sī siáⁿ-lâng, tsiū-sī Siōng-tsú ê Sìng ê.
25, Iâ-so͘ tsik-pī i kóng, Lí tio̍h tsīng-tsīng, tuì tsit-ê lâng tshut-khì.
26, Siâ-sîn thiu-tshuah hit lâng, tuā siaⁿ kiò, tsiū tuì i tshut-khì.
27, Tsìng lâng lóng gông-ngia̍h, tì-kàu saⁿ piān-lūn, kóng, Tsit-ê sī tsáiⁿ-iūⁿ? Sī sin ê kà-sī. I īng kuân bīng-līng siâ-sîn, siâ-sîn iā sūn-ho̍k I.
28, I ê miâ-siaⁿ suî-sî piàn thuân Ka-lī-lī-síng ê sì-hng.
29, In í-king tshut huē-tn̂g, suî-sî kap Ngá-kok Iok-hān ji̍p Se-bûn kap An-tik-lia̍t ê ke.
30, Se-bûn ê tiūⁿ-ḿ huān-tio̍h jia̍t-pēⁿ tó-teh. Suî-sî ū lâng tsiong tse kā Iâ-so͘ kóng.
31, I kūn-uá khan i ê tshiú, hō͘ i khí-lâi, jia̍t tsiū thè; hū-jîn-lâng tsiū su-hāu in.
32, Kàu hông-hun àm, ji̍t lo̍h liáu, ū lâng tshuā lóng-tsóng ū phuà-pēⁿ ê, kap huān-tio̍h kuí ê lâng tsiū-kūn I.
33, Thong siâⁿ lóng tsū-tsi̍p tī mn̂g-kháu.
34, Iâ-so͘ i-hó ta̍k tsióng pēⁿ ê lâng tsē-tsē, koh kuáⁿ tsē-tsē kuí; in-uī kuí bat I, só͘-í m̄ tsún in kóng.
35, Keh tsá-khí, thiⁿ iáu put-tsí àm, Iâ-so͘ khí-lâi tshut-khì khòng-iá ê só͘-tsāi, tī hia kî-tó.
36, Se-bûn kap tâng-phuāⁿ ê lâng tui-tshuē I.
37, Í-king tú-tio̍h tsiū kā I kóng, Tsìng lâng lóng teh tshuē lí.
38, I kā in kóng, Lán lâi khì pa̍t uī; kàu hū-kūn ê po͘-thâu, hō͘ guá thang tī hia thuân-tō; in-uī guá uī-tio̍h tsit-ê sū, tsiah tshut-lâi.
39, Tsiū khì piàn Ka-lī-lī-síng, ji̍p in ê huē-tn̂g, suan-thuân tō-lí, koh kuáⁿ kuí.
40, Ū tsi̍t ê thái-ko ê tsiū-kūn I, kiû I, kuī I, kā I kóng, Lí nā khíng, tsiū ē hō͘ guá tshing-khì.
41, Iâ-so͘ khó-lîn, tshun tshiú bong i, kā i kóng, Guá khíng, lí thang tshing-khì.
42, Thái-ko tsik-sî tû--khì; i tsiū tshing-khì.
43, Iâ-so͘ giâm-giâm kíng-kài i, suî-sî kah i khì; iā kā i kóng,
44, Tio̍h kín-sīn bo̍h-tit kā lâng kóng sím-mi̍h; tsí-ū tio̍h khì, tsiong pún-sin hō͘ tsè-si giām, iā uī-tio̍h lí tit-tio̍h tshing-khì, hiàn Mô͘-se só͘ huan-hù ê, lâi tsò tsìng-kù tī lâng.
45, Tān-sī i tshut-khì, tsiū tuā-tuā suan-thuân, sì-kuè pò-iông tsit-ê sū; tì-kàu Iâ-so͘ bô thang koh hián-jiân ji̍p siâⁿ, tsí-ū tuà tī guā-bīn khòng-iá ê só͘-tsāi. Lâng tuì sì-hng tsiū-kūn I.