《巴克禮普世版聖經(試讀本)》

| | | 轉寄

巴克禮普世版(試讀本) 馬可福音第五章

1 Iâ-so͘ kah bûn-tô͘ kuè-khì Ka-lī-lī-ô͘ ê tuì-bīn huāⁿ, lâi-kàu Kik-lah-sim-lâng ê tē-khu.

2 Iâ-so͘ tsi̍t-ē lo̍h tsûn suî-sî tú-tio̍h tsi̍t-ê hō͘ siâ-sîn hū-sin ê lâng tuì bōng-á-po͘ tshut-lâi.

3 Tsit-ê lâng lóng tuà tī bōng-á-po͘. Lâng īng thih-liān to pa̍k i bē tiâu.

4 In-uī lâng siông-siông īng kha-khàu thih-liān kā i pa̍k. M̄-koh thih-liān hō͘ i tshuah-tn̄g, kha-khàu hō͘ i kòng-tshuì. Bô-lâng ū khuì-la̍t kā i tsè-ho̍k.

5 Tsit-ê lâng mê-ji̍t tī bōng-á-po͘ á-sī suaⁿ-ni̍h luān-jióng, koh īng tsio̍h-thâu siong-hāi ka-kī.

6 I uí hn̄g-hn̄g khuàⁿ-tio̍h Iâ-so͘, tsiū tsáu lâi phak tuà Iâ-so͘ ê bīn-tsîng,

7 Tuā-siaⁿ huah kóng," Tsì-kuân Siōng-Tsú ê Kiáⁿ Iâ-so͘, Lí hô-pit lâi kan-sia̍p guá? Guá kí Siōng-Tsú ê miâ lâi khún-kiû Lí m̄-thang kā guá tsik-hua̍t.

8 In-uī Iâ-so͘ bat tuì i kóng, " Siâ-sîn ah, tio̍h tuì hit-ê lâng tshut-khì."

9 Iâ-so͘ mn̄g i kóng, " Lí hō-tsò sím-mi̍h miâ?" Hit-ê lâng ìn kóng, " Guá ê miâ-kiò-tsò 'Kun-thuân', in-uī guán sī kui-tuā-tīn ê kuí."

10 Hit-ê lâng tsiū pik-tshiat kiû Iâ-so͘ m̄-thang kuáⁿ in lī-khui hit-ê tē-khu.

11 Hit sî tī suaⁿ-phiâⁿ ū tsi̍t-tīn ti teh thó-tsia̍h.

12 Siâ-sîn tsiū kiû Iâ-so͘ kóng, " Hō͘ guán khì hiah-ê ti-kûn, hō͘ guán thang ji̍p-khì in lāi-bīn."

13 Iâ-so͘ ín-tsún in khì. Hiah-ê siâ-sîn tsiū tuì hit-ê lâng tshut-lâi ji̍p-khì hiah-ê ti-kûn. Tsha-put-to nn̄g-tshing tsiah ê ti-kûn tsáu lo̍h suaⁿ-phiâⁿ tsông lo̍h-khì ô͘-ni̍h, hō͘ ô͘-tsuí im-sí.

14 Kò͘-ti ê lâng tsiū tsáu-khì kā siâⁿ-lāi kah tsng-siā ê lâng kóng. Tsìng-lâng tsiū tshut-lâi khuàⁿ tāi-tsì sī án-tsuáⁿ.

15 In lâi-kàu Iâ-so͘ hia, khuàⁿ-tio̍h hit-ê hō͘ siâ-sîn hū-sin, tsiū-sī hō͘‘Kun-thuân’ só͘ tîⁿ ê lâng tī hia teh tsē, saⁿ tshīng kah hó-sè-hó-sè, lāu-sîn tsāi-tsāi. Kûn-tsiòng tsiū khí tuā kiaⁿ.

16 Khuàⁿ-tio̍h ê lâng tsiong hō͘ siâ-sîn hū-sin ê lâng só͘ tú-tio̍h ê tāi-tsì kah kui tīn ti ê tāi-tsì lóng kóng hō͘ tsìng-lâng thiaⁿ.

17 In tsiū khún-kiû Iâ-so͘ lī-khui in ê tē-khu.

18 Iâ-so͘ teh-beh tsiūⁿ tsûn ê sî, hit-ê bat hō͘ siâ-sîn hū-sin ê lâng kiû Iâ-so͘ tsún i tsò-hué khì.

19 Iâ-so͘ m̄-tsún kā i kóng, " Tńg-khì lí ê tshù tshuē lí ê tshin-lâng, tsiong Tsú liân-bín lí tuì lí só͘ tsò hiah tuā ê tāi-tsì lóng pò in tsai."

20 Hit-ê lâng tsiū khì, tī Te-ka-pho-lī pò-iông Iâ-so͘ tuì i só͘ tsò ê tuā tāi-tsì. Tsìng-lâng lóng kám-kak kî-kuài.

21Iâ-so͘ koh tsē tsûn kuè-khì hit-pîng huāⁿ. Kui tuā-tīn ê lâng tsū-tsi̍p uá-lâi tī ô͘-piⁿ ê Iâ-so͘ hia.

22 Ū tsi̍t-ê huē-tn̂g ê tsú-kuán miâ-kiò-tsò Gâi-ló͘ ê lâng lâi. I tsi̍t-ē khuàⁿ-tio̍h Iâ-so͘ tsiū phak tī I ê kha-tsîng,

23 pik-tshiat khún-kiû kóng, " Guá sè-hàn ê tsa-bó͘-kiáⁿ teh-beh sí à. Kiû Lí lâi kā i huāⁿ-tshiú, hō͘ i tit-tio̍h i-hó ē-tàng ua̍h khí-lâi."

24 Iâ-so͘ kah i khì, kui tuā-tīn ê lâng e-e-kheh-kheh tuè I khì.

25 Ū tsi̍t-ê hū-jîn-lâng huān-tio̍h hiat-lāu-pēⁿ tsa̍p-jī nî kú à.

26 I ū tshuē-kuè tsin-tsē ê i-sing tī-liâu mā siū-tio̍h tsin-tsē kan-khó͘, koh kā i só͘ ū ê tsîⁿ khai liáu-liáu. M̄-koh lóng bô tsi̍t-si-á hāu-kó, tian-tò ná siong-tiōng.

27 I thiaⁿ-tio̍h Iâ-so͘ ê tāi-tsì, tsiū kheh ji̍p-khì kûn-tsiòng lāi-bīn, uá-khì Iâ-so͘ ê āu-piah lâi bong I ê saⁿ,

28 in-uī i siūⁿ-kóng, " Guá kan-taⁿ bong I ê saⁿ, pēⁿ tsiū ē hó-khì."

29 I tsi̍t-ē bong-tio̍h Iâ-so͘ ê saⁿ, hiat-lāu suî-sî thîng-tsí, mā kám-kak ka-kī ê pēⁿ-thiàⁿ í-king hó-khì à.

30 Iâ-so͘ suî-sî huat-kak ū kuân-lîng tuì I huat-tshut, tsiū ua̍t-tńg-sin mn̄g kûn-tsiòng kóng, " Siáⁿ-lâng bong guá ê saⁿ?"

31 Bûn-tô͘ kā I kóng, " Lí khuàⁿ kui-tīn lâng teh kā Lí e-kheh, ná-ē mn̄g kóng ' Siáⁿ-lâng ū bong guá?'"

32 Iâ-so͘ sì-kho͘-lián-tńg khuàⁿ tsi̍t-ē, ài tshuē tsò tsit-ê tāi-tsì ê hū-jîn-lâng.

33 Hit-ê hū-jîn-lâng tsai-iáⁿ ka-kī sin-tsiūⁿ só͘ huat-sing ê tāi-tsì, kiaⁿ kah phi̍h-phi̍h-tshuah, tsiū lâi phak tuà Iâ-so͘ ê kha-tsîng, lóng-tsóng tsiàu-si̍t kā I kóng.

34 Iâ-so͘ kā i kóng, " Hū-jîn-lâng ah, lí ê sìn-sim í-king hō͘ lí ê pēⁿ tit-tio̍h i-hó. Lí thang pîng-an tńg-khì, lí ê pēⁿ uân-tsuân hó-khì à."

35 Iâ-so͘ iáu-teh kóng ê sî, ū-lâng tuì huē-tn̂g tsú-kuán ê tshù lâi kā Gâi-ló͘ kóng, " Lí ê tsa-bó͘-kiáⁿ í-king sí-khì à, ná tio̍h koh lô-huân lāu-su?"

36 Iâ-so͘ put-kuán in só͘ kóng ê uē, kā huē-tn̂g ê tsú-kuán kóng, " M̄-bián kiaⁿ, tsí ū tio̍h sìn."

37 Iâ-so͘ tsiū tshuā Pí-tik, Ngá-kok, kah Ngá-kok ê hiaⁿ-tī Iok-hān tsò-hué khì, m̄-tsún pa̍t-lâng tuè khì.

38 Lâi-kàu huē-tn̂g tsú-kuán ê tshù, Iâ-so͘ khuàⁿ-tio̍h tiûⁿ-bīn huā-huā-háu, mā ū-lâng teh thî-khàu tuā-siaⁿ háu. 39 Iâ-so͘ ji̍p-khì tsiū kā in kóng, " Lín ná-ē huā-huā-háu teh thî-khàu? Tsit-ê gín-ná bô sí, sī teh khùn niā-niā."

40 Tsìng-lâng tsiū kā I thí-tshiò. M̄-koh Iâ-so͘ kā kûn-tsiòng kuáⁿ tshut-khì, tsiū tshuā gín-á ê pē-bú í-ki̍p kah I lâi ê bûn-tô͘ ji̍p-khì gín-á ê pâng-king.

41Iâ-so͘ tsiū khan gín-á ê tshiú kā i kóng, " Tāi-lī-tāi-kó͘-bí." Ì-sù tsiū-sī kóng, " Tsa-bó͘-gín-á, guá bīng-līng lí, khí-lâi!"

42 Tsa-bó͘-gín-á suî-sî khí-lâi kiâⁿ, in-uī i í-king tsa̍p-jī huè à. Tsìng-lâng tsiū tio̍h-kiaⁿ kah sit-sîn khì.

43 Iâ-so͘ giâm-giâm kìng-kài in m̄-thang hō͘ lâng tsai tsit-ê tāi-tsì. I tsiū huan-hù tio̍h hō͘ tsa-bó͘-gín-á tsia̍h mi̍h-kiāⁿ.