《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第六章

作者 巴克禮普世版小組 2013.01.13

Iâ-so͘ Tī Ná-sat-li̍k Hông Kī-tsua̍t (Mt 13:53-58; Lk 4:16-30) 1 Iâ-so͘ lī-khui hia, tńg-khì I ê kò͘-hiong, bûn-tô͘ tuè I khì.

2 Kàu An-hioh-ji̍t tsiū tī huē-tn̂g kà-sī lâng. Tsin-tsē lâng thiaⁿ-tio̍h tsiū kî-kuài kóng, " Tsit-ê lâng ê pún-sū tuì tó-uī lâi? Siáⁿ-lâng siúⁿ-sù hō͘ I tsit khuán ê tì-huī? I án-tsuáⁿ ū kuân-lîng kiâⁿ sîn-jiah?

3 I kám m̄-sī ba̍k-kang sai-hū ê kiáⁿ? Kám m̄-sī Má-lī-a ê kiáⁿ? Ngá-kok, Iok-se, Iû-tāi kah Se-bûn ê hiaⁿ-tī? I ê tsí-muē kám m̄-sī kah lán tī tsia? " In suah tuì Iâ-so͘ khí huán-kám.

4 Iâ-so͘ tsiū kā in kóng, " Sian-ti tī ka-kī ê kò͘-hiong, ka-kī ê tsong-tso̍k, ka-kī ê ka-tîng í-guā, khì kàu tó-uī lóng ē siū lâng tsun-tiōng."

5 I tī kò͘-hiong bē-tàng kiâⁿ sím-mi̍h sîn-jiah, tsí put-kò īng tshiú huāⁿ kuí-ê-á pēⁿ-lâng lâi kā in i-hó.

6 Iâ-so͘ tuì in ê m̄-sìn kám-kak kî-kuài. Iâ-so͘ Tshe-phài Tsa̍p-jī Sù-tô͘ (Mt 10:5-15; Lk 9:1-6)
Tsiū khì sì-tsiu-uî ê tsng-siā kiâⁿ thàu-thàu, lâi kà-sī lâng.

7 Iâ-so͘ tiàu-tsi̍p tsa̍p-jī sù-tô͘ lâi, tsiū tshe in tsi̍t tuì tsi̍t tuì tshut-khì, siúⁿ-sù in ū kuân-lîng lâi tsè-ap hiah-ê siâ-sîn.

8 Koh huan-hù in m̄-thang tuà lō͘-huì, tsí-ū tsi̍t ki kuái-á, m̄-thang tuà kan-niû, m̄-thang tuà hîng-lí-tē, m̄-thang khǹg tsîⁿ tī io-tuà,

9 tio̍h tshīng liâng-ê, mā m̄-thang ke tuà lāi-saⁿ.

10 Iâ-so͘ koh kā in kóng, " Lín bô-lūn khì-kàu sím-mi̍h só͘-tsāi, tio̍h tuà tī huan-gîng lín ê lâng ê tshù, ti̍t-kàu lī-khui hit-ê só͘-tsāi.

11 Bô lūn sím-mi̍h só͘-tsāi, lâng nā m̄ tsiap-la̍p lín, m̄ thiaⁿ lín ê kà-sī, lī-khui hia ê sî, tio̍h tsiong kha-ni̍h ê thô͘-hún puāⁿ tshing-khì, lâi tuì in kíng-kò."

12 Bûn-tô͘ tsiū tshut-khì thuân-tō, kóng lâng tio̍h hué-kái. 13 In mā kuáⁿ-tshut tsin-tsē kuí, īng iû buah tsin-tsē pēⁿ-lâng, kā in i-hó.
Kiâⁿ sé-lé Iok-hān ê Sí-bông (Mt 4:1-12; Lk 9:7-9)
14Hi-lu̍t ông ū thiaⁿ-tio̍h Iâ-so͘ ê tāi-tsì, in-uī I ê miâ-siaⁿ í-king thuân kàu ta̍k só͘-tsāi. Ū-lâng kóng, " I sī kiâⁿ sé-lé Iok-hān tuì sí-lâng tiong koh-ua̍h, só͘-í ū kuân-lîng kiâⁿ tsiah-ê sîn-jiah."

15 M̄-koh mā ū pa̍t-lâng kóng, " I sī Í-lī-a." Koh ū-lâng kóng, " I sī sian-ti, tshin-tshiūⁿ kó͘-tsá ê tsi̍t-ê sian-ti."

16 Hi-lu̍t thiaⁿ-tio̍h tsiū kóng, " I sī guá kā i tsām-thâu ê Iok-hān. I í-king koh-ua̍h khí-lâi."

17 Hi-lu̍t ū phài lâng khì lia̍h Iok-hān lâi kuaiⁿ-kaⁿ. Guân-in sī Hi-lu̍t tshim-tsiàm sió-tī Hui-li̍k ê bó͘ Hi-lô-tí.

18 Iok-hān tiāⁿ-tiāⁿ tuì Hi-lu̍t kóng, " Lí bô ing-kai tsiàm hiaⁿ-tī ê bó͘."

19 Hi-lô-tí tsiū uàn-hūn Iok-hān, ài-beh kā i thâi, m̄-koh bô huat-tō͘ si̍t-hiān.

20 In-uī Hi-lu̍t tsai Iok-hān ê tsò-lâng kong-gī koh sìng-kiat, só͘-í kiaⁿ i, mā ū teh kā i pó-hō͘. Hi-lu̍t muí-pái thiaⁿ-tio̍h Iok-hān ê uē, sim tsiū tshau-huân put-an, m̄-koh iáu sī huaⁿ-hí ài thiaⁿ.

21 Tn̄g-tio̍h hó ki-huē ê ji̍t, tsiū-sī Hi-lu̍t tsò seⁿ-ji̍t pān-toh, tshiáⁿ hiah-ê bûn-bú pah-kuaⁿ kah Ka-lī-lī-síng bîn-kan ê thâu-lâng.

22 Hi-lô-tí ê tsa-bó͘-kiáⁿ ji̍p-lâi thiàu-bú, hō͘ Hi-lu̍t kah tâng-toh ê lâi-pin lóng huaⁿ-hí. Hi-lu̍t ông kā tsa-bó͘-gín-á kóng, " Khuàⁿ lí ài sím-mi̍h tsò lí kiû, guá lóng beh hō͘ lí."

23 Hi-lu̍t koh tuì i tsiù-tsuā kóng, " Bô-lūn lí kā guá thó sím-mi̍h, liân guá kok ê tsi̍t puàⁿ, guá mā beh hō͘ lí."

24 Tsa-bó͘-gín-á tshut-khì mn̄g i ê lāu-bú kóng, " Guá tio̍h kiû sím-mi̍h?" Lāu-bú ìn kóng, " Kiâⁿ sé-lé Iok-hān ê thâu-khak."

25 Tsa-bó͘-gín-á tsiū kuáⁿ-kín tńg-lâi tuì ông iau-kiû kóng, " Guá ài lí suî-sî kā kiâⁿ-sé-lé Iok-hān ê thâu-khak, té tī puâⁿ-ni̍h hō͘ guá."

26 Ông ê sim tsiū tuā iu-būn, m̄-koh i bē-tàng kā i kī-tsua̍t, in-uī i ū tī tsìng-lâng bīn-tsîng tsiù-tsuā.

27 Ông suî-sî tshe-phài tsi̍t-ê sī-uē-ping, khì kaⁿ-ni̍h the̍h Iok-hān ê thâu-khak lâi.Sī-uē-ping tsiū khì kaⁿ-ni̍h, tsām Iok-hān ê thâu,

28 kā thâu-khak té tī puâⁿ-ni̍h, phâng lâi hō͘ tsa-bó͘-gín-á. Tsa-bó͘-gín-á tsiū the̍h khì hō͘ in lāu-bú.

29 Iok-hān ê bûn-tô͘ thiaⁿ-tio̍h, tsiū lâi siu i ê sin-si, kā i bâi-tsòng tī bōng-ni̍h.

Iâ-so͘ Hō͘ Gō͘-tshing Lâng Tsia̍h Pá (Mt 14:13-21; Lk 9:10-17; Ih 6:1-15)

30Sù-tô͘ lóng tńg-lâi tsū-tsi̍p tī Iâ-so͘ ê bīn-tsîng, tsiong in só͘ tsò kah só͘ kà-sī ê lóng kā I pò-kò.

31 In-uī hit sî óng-lâi ê lâng tsin-tsē, liân tsia̍h-pn̄g ê sî-kan to bô. Iâ-so͘ kā in kóng, " Án-ne Lín mā tio̍h kah guá lâi khì phian-phiah khah bô-lâng ê só͘-tsāi, sió hioh-khùn tsi̍t-ē."

32 In tsiū siám-khui kûn-tsiòng, tsē tsûn khì phian-phiah ê só͘-tsāi ka-kī tuà.

33 Tsin-tsē lâng khuàⁿ-tio̍h in lī-khui, jīn-tshut sī in, tsiū tuì ta̍k-ê siâⁿ-tshī kiâⁿ lio̍k-lō͘ tsáu tsìn-tsîng, pí in tāi-sing kàu hit só͘-tsāi.

34 Iâ-so͘ tsi̍t-ē tsiūⁿ-huāⁿ to̍h khuàⁿ-tio̍h kui tuā-tīn ê lâng, tsiū liân-bín in, in-uī in tshin-tshiūⁿ iûⁿ bô bo̍k-tsiá. I tsiū kà-sī in tsin-tsē hāng tāi-tsì.

35 Ji̍t beh lo̍h-suaⁿ ê sî, bûn-tô͘ lâi kā Iâ-so͘ kóng, " Tsia tsin phian-phiah, sî-kan mā tsin uàⁿ à,

36 tshiáⁿ kā kûn-tsiòng kái-sàn, hō͘ in thang khì hū-kīn ê tsng-siā, ka-kī bé mi̍h-kiāⁿ tsia̍h."

37 Iâ-so͘ ìn kóng, " Lín hō͘ in tsia̍h." Bûn-tô͘ ìn kóng, " Tsóng bô guán tio̍h īng nn̄g-pah ê gîn-á khì bé piáⁿ lâi hō͘ in tsia̍h?"

38 Iâ-so͘ mn̄g in kóng, "Lín ū juā-tsē piáⁿ, khì khuàⁿ-māi lè." In khuàⁿ liáu tsiū kóng, " Ū gō͘ tè piáⁿ, mā ū nn̄g bué hî."

39 Iâ-so͘ tsiū huan-hù bûn-tô͘ kā kûn-tsiòng hun-tso͘, tsē tuà tshiⁿ-tshuì ê tsháu-po͘.

40 Kûn-tsiòng tsiū hun-tso͘ lâi tsē, ū-ê tsi̍t-pah lâng, ū-ê gō͘-tsa̍p lâng.

41 Iâ-so͘ the̍h-khí hit gō͘-tè piáⁿ kah nn̄g-bué hî, ǹg thiⁿ kám-siā liáu-āu, kā piáⁿ peh-khui hō͘ bûn-tô͘ khì pun hō͘ kûn-tsiòng. Mā kā hit nn̄g-bué hî pun hō͘ kûn-tsiòng.

42 Tāi-ke lóng tsia̍h kah tsin pá.

43 Āu-lâi bûn-tô͘ khioh hiah-ê tsia̍h tshun ê piáⁿ-tshuì kah hî-sut-á, muá tsa̍p-jī nâ.

44 Tsia̍h piáⁿ ê tsa-po͘-lâng tsiū ū gō͘-tshing. Iâ-so͘ Tī Ô͘ ê Tsuí-bīn Kiâⁿ (Mt 14:22~33;Ih 6:16~21)

45Iâ-so͘ suî-sî kiò bûn-tô͘ kín tsiūⁿ-tsûn, tāi-sing kuè-khì hit-pîng huāⁿ, kàu Pik-sài-tāi. I ka-kī lâu teh lâi kái-sàn kûn-tsiòng.

46 Kûn-tsiòng lī-khui liáu-āu, Iâ-so͘ tsiū khì suaⁿ-ni̍h kî-tó.

47 Thiⁿ í-king àm à, tsûn kiâⁿ kàu ô͘-tiong, kan-taⁿ Iâ-so͘ ka-kī tī huāⁿ-tíng.

48 Iâ-so͘ khuàⁿ-tio̍h bûn-tô͘ tsìⁿ-hong kò-tsiúⁿ tsin kan-khó͘. Mê-sî tsha-put-to sì keⁿ, Iâ-so͘ tuì ô͘ ê tsuí-bīn kiâⁿ lâi in hia, ài beh tuì in ê piⁿ-á kuè-khì.
49 Bûn-tô͘ khuàⁿ-tio̍h I kiâⁿ tī tsuí-bīn, lia̍h tsò sī kuí, tsiū tuā-siaⁿ huah.

50 In-uī tāi-ke lóng ū khuàⁿ-tio̍h I, tsiū tio̍h-kiaⁿ. Iâ-so͘ suî-sî kā in kóng, " An lín ê sim, sī guá, m̄-bián kiaⁿ."

51 Iâ-so͘ tsiū tsiūⁿ tsûn khì kah in tsò-hué. hong tsiū tiām-khì. Bûn-tô͘ put-tsí tio̍h-kiaⁿ koh kî-kuài,
52 in-uī in iáu-buē liáu-kái hit gō͘-tè piáⁿ ê sîn-jiah, in ê sim tsin tūn. Iâ-so͘ Tī Kik-nî-sat-li̍k I-hó Pēⁿ-lâng (Mt 14:34~36)
53Iâ-so͘ kah bûn-tô͘ kuè ô͘ liáu-āu, lâi-kàu Kik-nî-sat-li̍k tsiūⁿ-huāⁿ, kā tsûn pha tuà huāⁿ-piⁿ.

54 Tsi̍t-ē lo̍h tsûn, tsìng-lâng suî-sî jīn-tshut Iâ-so͘.
55 Tsìng-lâng tī hit tē-hng kiâⁿ thàu-thàu, thiaⁿ-tio̍h Iâ-so͘ tī sím-mi̍h só͘-tsāi, tsiū īng tshn̂g-pho͘ kng pēⁿ-lâng khì hia.

56 Iâ-so͘ bô-lūn ji̍p-khì sím-mi̍h tsng-siā, siâⁿ-tshī, hiong-tshuan, lâng tsiū kā pēⁿ-lâng khǹg tuà ke-lō͘, kiû Iâ-so͘ tsì-tsió hō͘ in bong I ê saⁿ-á-ki ê tshiu. Só͘-ū bong-tio̍h ê lâng lóng tit-tio̍h i-hó.