《巴克禮普世版聖經(試讀本)》

| | | 轉寄

巴克禮普世版(試讀本) 馬可福音第十二章

Pháiⁿ Tiān-lông ê Phì-jū (Mt 21:33-46; Lk 20:1-8)
Iâ-so͘ koh īng phì-jū kā in kóng, " Ū tsi̍t-ê lâng khai-khún tsi̍t-tè phû-tô-hn̂g, īng tshiûⁿ-uî-á uî khí-lâi, ó͘ tsi̍t khang lâi tsò tsiú-khut, khí tsi̍t-tsō tsiú-kiⁿ-lâu, tso͘ hō͘ tiān-lông, tsiū khì pa̍t-ê só͘-tsāi. 2 Kàu siu-sîng ê sî-kî, i tsiū tshe tsi̍t-ê lô͘-po̍k lâi tshuē tiān-lông, beh tuì tiān-lông siu hn̂g-tso͘. 3 Tiān-hō͘ kā hit-ê lô͘-po̍k lia̍h lâi phah, hō͘ i khang-tshiú tńg-khì. 4 Hn̂g-tsú koh tshe līng-guā tsi̍t-ê lô͘-po̍k khì siu-tso͘, tiān-lông phah-siong i ê thâu-khak, koh kā i lîng-jio̍k. 5 Āu-lâi hn̂g-tsú koh tshe pa̍t-ê lô͘-po̍k khì, in tsiū kā i thâi-sí. I koh tshe tsin-tsē lô͘-po̍k khì, ū-ê hō͘ in phah, ū-ê hō͘ in thâi-sí. 6 I iáu ū tsi̍t-ê i só͘ thiàⁿ ê kiáⁿ, tsuè-āu mā tshe i khì kā tiān-lông siu tso͘, siūⁿ-kóng in ē tsun-kìng i ê kiáⁿ. 7 M̄-koh hiah-ê tiān-lông hō͘-siōng tsham-siông kóng, ' Tsit-ê sī i ê kè-sîng-jîn, lán lâi kā i thâi-sí, i ê tsâi-sán tsiū lóng kui lán.' 8 Tiān-lông tsiū kā i lia̍h khí-lâi, kā i thâi-sí, kā i hiat tshut-khì phû-tô-hn̂g guā-bīn. 9 Án-ne hn̂g-tsú ē án-tsuáⁿ tshù-lí? I ē lâi tsâu-bia̍t hiah-ê tiān-lông, kā i ê hn̂g tso͘ hō͘ pa̍t-lâng. 10 Sìng-king ū kì-tsài: Khí-tshù sai-hū só͘ khì-sak ê tsio̍h, suah tsiâⁿ-tsò tshù-kak-thâu ê ki-tsio̍h. 11 Tse sī Siōng-Tsú ê tsok-uî, tuì lán lâi kóng si̍t-tsāi tsin kî-biāu."( tsù: SPh 118:22-23) 12 Hiah-ê Iû-thài-lâng ê thâu-lâng tsai-iáⁿ tsit-ê phì-jū sī teh tsí in, tsiū ài beh kā I lia̍h khí-lâi, m̄-koh in kiaⁿ kûn-tsiòng huán-tuâⁿ, tsiū lī-khui Iâ-so͘.

La̍p-sè ê Būn-tê (Mt 22:15-22; Lk 20:20-26)
13 In āu-lâi tshe Huat-lī-sài-phài kah Hi-lu̍t-tóng kuí-nā lâng lâi Iâ-so͘ hia, ài beh tshuē I só͘ kóng ê uē-phāng, thang lâi kā I hām-hāi. 14 In lâi kàu-uī tsiū tuì Iâ-so͘ kóng, " Lāu-su, guán tsai Lí sī tsi̍t-ê láu-si̍t-lâng, tuì-thāi muí tsi̍t-ê lâng lóng bô tsha-pia̍t, in-uī Lí bô khuàⁿ lâng ê guā-māu. Lí tiong-si̍t tsiong Siōng-Tsú ê tō-lí kà-sī lâng. La̍p suè hō͘ Lô-má hông-tè kám ū ha̍h lu̍t-huat? Guán tio̍h la̍p-suè á m̄-bián?" 15 M̄-koh Iâ-so͘ khuàⁿ-tshut in ê kuí-kè, tsiū kā in kóng, " Lín ná-ē beh kā Guá tshì-thàm? The̍h tsi̍t-ê gîn-pè lâi hō͘ Guá khuàⁿ." 16 In tsiū the̍h tsi̍t-ê gîn-pè lâi. Iâ-so͘ mn̄g in kóng, " Tsit-ê siōng kah jī-hō sī siáⁿ-lâng ê?" In ìn kóng, " Sī hông-tè ê." 17 Iâ-so͘ kā in kóng, " Lín tio̍h kā hông-tè ê la̍p hō͘ hông-tè, kā Siōng-Tsú ê la̍p hō͘ Siōng-Tsú." In tuì Iâ-so͘ ê huê-tap kám-kak tsin tio̍h-kiaⁿ.

Sí-lâng Koh-ua̍h ê Būn-tê (Mt 22:23-33; Lk 20:27-40)
18 Ū tsi̍t-kuá bô tsú-tiuⁿ koh-ua̍h ê Sat-to͘-kai-phài ê lâng, lâi tshuē Iâ-so͘. 19 In mn̄g Iâ-so͘ kóng, " Lāu-su, Mô͘-se só͘ siá ê lu̍t-huat tsí-sī guán kóng, ' Nā ū-lâng ê hiaⁿ-ko sí-khì, lâu lo̍h-lâi i ê bó͘, m̄-koh bô lâu kiáⁿ. Tsò sió-tī ê tio̍h tshuā hiaⁿ-só tsò bó͘, thang hó seⁿ-kiáⁿ lâi thè i ê hiaⁿ-ko thuân-tsong tsiap-tāi.'( SBK 25:5; CSK 38:8) 20 Bat ū hiaⁿ-tī tshit lâng, tuā-hiaⁿ tshuā bó͘ bô seⁿ kiáⁿ tsiū sí-khì. 21 Tē-jī ê tshuā hiaⁿ-só tsò bó͘, mā bô seⁿ kiáⁿ to̍h sí-khì. Tē-saⁿ ê mā sī án-ne. 22 Tsit tshit-ê hiaⁿ-tī lóng bô seⁿ-kiáⁿ to̍h sí-khì. Kàu lō͘-bué hit-ê hū-jîn-lâng mā sí-khì. 23 Kàu koh-ua̍h ê sî, tsit-ê hū-jîn-lâng beh tsò in tiong-kan tó tsi̍t lâng ê bó͘? In-uī tsit tshit-ê lâng lóng ū tshuā i tsò bó͘." 24 Iâ-so͘ kā in kóng, " Lín siūⁿ m̄-tio̍h khì à. Lín m̄-bat Sìng-king mā m̄-bat Siōng-Tsú ê kuân-lîng. 25 In-uī tuì sí-lâng tiong koh-ua̍h ê sî, kah thiⁿ-tíng ê thiⁿ-sài kāng-khuán bô kè bô tshuā. 26 Kuan-hē sí-lâng koh-ua̍h, lín kám bô tha̍k-tio̍h Mô͘-se ê tsheh, ' Teh to̍h ê tshì-phè' hit phiⁿ só͘ kì-tsài ê? Siōng-Tsú kā Mô͘-se kóng, ' Guá sī A-pik-la̍h-hán ê Siōng-Tsú, Í-sat ê Siōng-Tsú, Ngá-kok ê Siōng-Tsú.'( tsù: CAK 3:6, 15-16) 27 I m̄-sī sí-lâng ê Siōng-Tsú, sī ua̍h-lâng ê Siōng-Tsú. Lín huān-tio̍h tsin tuā ê tshò-gō͘!"

Siōng Tiōng-iàu ê Kài-bīng (Mt 22:34-40; Lk 10:25-28)
28 Ū tsi̍t-ê king-ha̍k kàu-su uá-lâi thiaⁿ-tio̍h in teh piān-lūn, khuàⁿ Iâ-so͘ ìn liáu tsin hó, tsiū mn̄g I kóng, " Tsiah-ê kài-bīng tiong tó tsi̍t tiâu siōng iàu-kín?" 29 Iâ-so͘ ìn kóng, " Siōng iàu-kín ê sī:Í-sik-lia̍t-lâng ah, lín tio̍h thiaⁿ! Tsú lán ê Siōng-Tsú sī to̍k-it ê Tsú. 30 Lí tio̍h tsīn-sim, tsīn-sìng, tsīn-ì, tsīn la̍t thiàⁿ Tsú, tsiū-sī lí ê Siōng-Tsú.( tsù: SBK 6:4-5) 31 Tē jī sī: Tio̍h thiàⁿ lí ê tshù-piⁿ tshin-tshiūⁿ ka-kī.( tsù: LBK 19:18) Bô pa̍t-ê kài-bīng pí tsit nn̄g tiâu khah tiōng-iàu." 32 Hit-ê King-ha̍k-kàu-su tuì Iâ-so͘ kóng, " Lāu-su, Lí kóng liáu tsin tio̍h, Siōng-Tsú tsí-ū tsi̍t-ê, I í-guā bô pa̍t-ê; 33 Koh-tsài tio̍h tsīn-sim, tsīn-ì, tsīn la̍t thiàⁿ Siōng-Tsú, koh tio̍h thiàⁿ tshù-piⁿ tshin-tshiūⁿ ka-kī, tse pí hiàn kui-tsiah tsing-seⁿ ê sio-tsè kah tsè-mi̍h koh-khah iàu-kín." 34 Iâ-so͘ khuàⁿ-tio̍h i ìn-liáu tsin sik-tòng, tsiū kā i kóng, " Lí lī Siōng-Tsú Kok-tō͘ bô hn̄g à." Tuì hit sî khí, bô-lâng káⁿ koh mn̄g Iâ-so͘ siáⁿ-mi̍h būn-tê.

Kuan-hē Ki-tok ê Būn-tê (Mt 22:41-46; Lk 20:41-44)
35 Iâ-so͘ tī sìng-tiān kà-sī ê sî, mn̄g in kóng, " Tsiah-ê king-ha̍k kàu-su ná-ē kóng Ki-tok sī Tāi-pi̍t ê kiáⁿ-sun? 36 Tāi-pi̍t hō͘ Sìng-Sîn kám-tōng kóng: Tsú kā guá ê Tsú kóng, tsē Guá ê tuā-pîng, Thìng-hāu Guá kā Lí ê tuì-ti̍k khut-ho̍k tī Lí ê kha-ē.( tsù: SPh 110:1) 37 Tāi-pi̍t kì-jiân ka-kī tshing Ki-tok tsò Tsú, án-ne Ki-tok ná-ē tsò Tāi-pi̍t ê kiáⁿ-sun?"

Thê-hông King-ha̍k-kàu-su (Mt 23:1-36; Lk20:45-47)
Kûn-tsiòng lóng ài thiaⁿ Iâ-so͘ ê kà-sī. 38 Iâ-so͘ kà-sī kóng, " Tio̍h tî-hông hiah-ê king-ha̍k kàu-su, in ài tshīng tn̂g-saⁿ sì-kè kiâⁿ, ài tī ke-lō͘-ni̍h hō͘ lâng tshíng-an, 39 koh tī huē-tn̂g lāi ài tsē kuân-uī, tī iàn-si̍k tsē tuā-uī. 40 in tshim-tsiàm kuáⁿ-hū ê ke-hué, thiau-kang kî-tó tsin tn̂g. In ē siū koh-khah tāng ê hîng-hua̍t."

Kuáⁿ-hū ê Hōng-hiàn (Lk 21:1-4)
41 Iâ-so͘ tsē tī hiàn-kim-siuⁿ ê tuì-bīn teh khuàⁿ tsìng-lâng hiàn tsîⁿ lo̍h-khì. Ū tsin-tsē hó-gia̍h-lâng hiàn tsin-tsē tsîⁿ. 42 Ū tsi̍t-ê sàn-tshiah-ê kuáⁿ-hū, lâi hiàn nn̄g-ê tâng-tsîⁿ-á, tsiū-sī tsi̍t kak gîn. 43 Iâ-so͘ tsiū kiò bûn-tô͘ lâi, kā in kóng, " Guá si̍t-tsāi kā lín kóng, tsit-ê sàn-tshiah-ê kuáⁿ-hū só͘ hiàn ê, pí tsìng-lâng hiàn ê khah-tsē. 44 In-uī hiah-ê kûn-tsiòng sī tuì in ū tshun ê lâi hiàn, m̄-koh tsit-ê hū-jîn-lâng sui-jiân tsin sàn-tshiah, iáu-koh kā tsuân-pō͘ ê sing-ua̍h-huì lóng hiàn lo̍h-khì."