《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十五章

作者 巴克禮普世版小組 2013.03.31

Iâ-so͘ Tī Pí-lia̍p-to Bīn-tsîng Siū Sím-mn̄g (M̄t:1-2,11-14;Lk23:1-5;Ih18:28-38)
1 Kàu thiⁿ-kng, hiah-ê tsè-si-tiúⁿ, tiúⁿ-ló, king-ha̍k kàu-su kah tsuân gī-huē, tsò-hué thó-lūn hó-sè, kā Iâ-so͘ pa̍k khí-lâi, ah I khì kau hō͘ Pí-lia̍p-to. 2 Pí-lia̍p-to mn̄g Iâ-so͘ kóng, " Lí sī Iû-thài-lâng ê ông, sī-bô?" Iâ-so͘ ìn kóng, " Tsiàu lí kóng án-ne." 3 Tsè-si-tiúⁿ kò Iâ-so͘ tsin-tsē hāng. 4 Pí-lia̍p-to koh mn̄g Iâ-so͘ kóng, " Lí ná-ē lóng bô ìn? Lí khuàⁿ, in kò Lí hiah-tsē hāng!" 5 Iâ-so͘ iû-guân bô ìn puàⁿ-kù. Pí-lia̍p-to suah kám-kak tsin kî-kuài.

Iâ-so͘ Hông Phuàⁿ Sí-hîng (Mt 27:15-26;Lk 23:13-25;Ih 18:39-19:16)
6 Tī ta̍k-nî ê Puâⁿ-kuè-tseh, tsóng-tok lóng ū tsiàu jîn-bîn só͘ kiû ê, lâi pàng tsi̍t-ê huān-lâng hō͘ in. 7 Hit sî ū tsi̍t-ê kah hiah-ê tsok-luān ê lâng tsò-hué kuaiⁿ-kaⁿ, miâ-kiò Pa-la̍h-pa ê huān-lâng, 8 Kûn-tsiòng tsū-tsi̍p uá-khì, iau-kiû Pí-lia̍p-to tsiàu kuàn-lē lâi pàng tsi̍t-ê huān-lâng. 9 Pí-lia̍p-to mn̄g in kóng, " Lín ài guá pàng Iû-thài-lâng ê ông hō͘ lín, sī-bô?" 10 In-uī i tsai hiah-ê tsè-si-tiúⁿ, sī uī-tio̍h uàn-tò͘ tsiah kā Iâ-so͘ kau hō͘ i. 11 M̄-koh hiah-ê tsè-si-tiúⁿ siàn-tōng kûn-tsiòng, tian-tó iau-kiû Pí-lia̍p-to pàng Pa-la̍h-pa hō͘ in. 12 Pí-lia̍p-to koh ìn kóng, " Án-ne lín kiò-tsò Iû-thài-lâng ê ông Hit-uī, guá tio̍h án-tsuáⁿ kā I pān?" 13 In koh tuā-siaⁿ huah kóng, " Kā I tìng si̍p-jī-kè!" 14 Pí-lia̍p-to kā in kóng, " Sī án-tsuáⁿ lè, I kám ū huān siáⁿ-mi̍h tsuē?" M̄-koh kûn-tsiòng ná tuā-siaⁿ huah kóng, " Kā I tìng si̍p-jī-kè!" 15 Pí-lia̍p-to uī-tio̍h beh hō͘ kûn-tsiòng huaⁿ-hí, tsiū pàng Pa-la̍h-pa hō͘ in. I koh bīng-līng lâng piⁿ-phah Iâ-so͘. Jiân-āu kā Iâ-so͘ kau hō͘ in khì tìng si̍p-jī-kè.

Píng-á Hí-lāng Iâ-so͘ (Mt 27:27-31;Ih 19:2-3)
16 Ping-á thua Iâ-so͘ ji̍p-khì tsóng-tok-hú ê īⁿ-lāi, koh tiàu tsuân tuī ê ping-á lâi. 17 In kā Iâ-so͘ tshīng tsi̍t-niá tsí-sik ê phàu, koh pīⁿ tshì-á ê bián-liû kā I tì. 18 Jiân-āu kā Iâ-so͘ tshíng-an kóng, " Iû-thài-lâng ê ông, pîng-an!" 19 In koh īng lô͘-tik sut Iâ-so͘ ê thâu-khak, kā I phuì tshuì-nuā, kuī lo̍h-khì kā I pài. 20 In hì-lāng suah, kā hit niá tsí-sik ê tn̂g-phàu thǹg khí-lâi, koh tsiong Iâ-so͘ ka-kī ê saⁿ kā i tshīng lo̍h-khì. Jiân-āu ah I khì tìng si̍p-jī-kè.

Iâ-so͘ Siū Tìng Si̍p-jī-kè (Mt 27:32-44;Lk 23:26-43;Ih 19:17-27)
21 Ū tsi̍t-ê Kó͘-lī-nāi-lâng Se-bûn, tsiū-sī A-li̍k-san-tāi kah Ló͘-hu ê lāu-pē, tuì tsng-kha lâi, àn hia king-kuè. In tsiū kiông-pik i lâi giâ Iâ-so͘ ê si̍p-jī-kè. 22 In kā Iâ-so͘ tuà kàu Kok-kok-thaⁿ ê só͘-tsāi, hit-ê tē-miâ huan-i̍k tsiū-sī " Thâu-khak-uáⁿ ê só͘-tsāi". 23 In īng kiáu bu̍t-io̍h ê tsiú hō͘ Iâ-so͘ lim. I m̄ lim. 24 In kā Iâ-so͘ tìng si̍p-jī-kè liáu-āu, pun I ê saⁿ-khò͘, liam-khau lâi khuàⁿ siáⁿ-lâng tit-tio̍h siáⁿ-mi̍h. 25 In kā Iâ-so͘ tìng tī si̍p-jī-kè-tíng, sī tsá-khí-sî káu tiám. 26 I ê tsuē-tsōng ê pâi-á siá kóng, "Iû-thài-lâng ê ông". 27 Ū nn̄g-ê tsha̍t-huān kah Iâ-so͘ tâng-tsê tìng si̍p-jī-kè, tsi̍t-ê tī tsiàⁿ-pîng, tsi̍t-ê tī tò-pîng. 28 Án-ne lâi ìng-giām Sìng-king só͘ kì-tsài:: “I mā hō͘ lâng kā I sǹg-tsò tsuē-huān.”(ū ê tshau-pún bô tsit tsat) 29 Tuì hia king-kuè ê lâng kā I bú-jio̍k, iô thâu kóng, " Ai-ah, Lí tsit-ê kóng beh huí-huāi sìng-tiān, saⁿ ji̍t lāi beh koh khí khí-lâi ê lâng! 30 Taⁿ tio̍h kiù Lí ka-kī, tuì si̍p-jī-kè lo̍h-lâi!" 31 Hiah-ê tsè-si-tiúⁿ kah king-ha̍k kàu-su mā sī án-ne kā I thí-tshiò, hō͘-siōng kóng-lâi kóng-khì, " I bat kiù pa̍t-lâng, taⁿ bē-tàng kiù ka-kī! 32 Í-sik-lia̍t ê ông Ki-tok, taⁿ tio̍h tuì si̍p-jī-kè lo̍h-lâi hō͘ guán khuàⁿ, guán tsiah beh sìn." Tâng-tsê tìng tī si̍p-jī-kè ê nn̄g-ê tsha̍t-thâu mā kā I bú-jio̍k.

Iâ-so͘ ê Sí-bông (Mt 27:45-56;Lk 23:44-49;Ih 19:28-30)
33 Tiong-tàu ê sî, tsuân tē o͘-àm, suà-kàu ē-po͘ saⁿ tiám. 34 Saⁿ tiám ê sî, Iâ-so͘ tuā-siaⁿ huah kóng, " Í-lô-i, Í-lô-i, la̍h-má sat-pak-tāi-nî," Tsit-kù ê ì-sù sī, " Guá ê Siōng-Tsú, Guá ê Siōng-Tsú, Lí ná-ē pàng-sak Guá?" 35 Ū tsi̍t-ê tī piⁿ-á teh khiā ê ū-lâng thiaⁿ-tio̍h, tsiū kóng, " Lí khuàⁿ, I teh kiò Í-lī-a." 36 Ū tsi̍t-ê lâng tsáu uá-khì, īng hái-mî tsìm sng-tsiú, pa̍k tī lô͘-tik-á bué, tu khì hō͘ Iâ-so͘ suh, kóng, " Bān-tshiáⁿ lè, lán lâi khuàⁿ Í-lī-a ē lâi kā I kiù lo̍h-lâi á bē?" 37 Iâ-so͘ tuā-siaⁿ âu-kiò tsi̍t siaⁿ, tsiū tn̄g-khuì. 38 sìng-tiān lāi ê tiùⁿ-lî, tuì tíng kàu ē li̍h tsò nn̄g-pîng. 39 Khiā tī Iâ-so͘ tuì-bīn ê liân-tiúⁿ, khuàⁿ-tio̍h I án-ne tn̄g-khuì, tsiū kóng, " Tsit-ê lâng tsin-tsiàⁿ sī Siōng-Tsú ê Kiáⁿ!" 40 Koh ū kuí-nā-ê hū-jîn-lâng tuì hn̄g-hn̄g teh khuàⁿ, kî-tiong ū Bua̍t-tāi-lia̍p ê Má-lī-a, kah sió Ngá-kok Iok-sik ê lāu-bú Má-lī-a, í-ki̍p Sat-lô-bí, 41 In tsiū-sī Iâ-so͘ tī Ka-lī-lī-síng ê sî, kin-tuè lâi ho̍k-sāi Iâ-so͘ ê hū-jîn-lâng. Mā ū tsin-tsē hū-jîn-lâng kah Iâ-so͘ tâng-tsê tsiūⁿ Iâ-lō͘-sat-líng ê. In lóng tuì hn̄g-hn̄g teh khuàⁿ.

Iâ-so͘ ê Bâi-tsòng (Mt 27:57-61;Lk 23:50-56;Ih 19:38-42)
42 Sî í-king àm, in-uī hit ji̍t sī Puâⁿ-kuè-tseh ê Pī-pān-ji̍t, tsiū-sī An-hioh-ji̍t ê tsîng tsi̍t ji̍t. 43 Ū A-lī-má-thài ê Iok-sik lâi, hó-táⁿ ji̍p-khì kìⁿ Pí-lia̍p-to, tshíng-kiû hō͘ i siu Iâ-so͘ ê sin-si. Iok-sik sī tsun-kuì ê gī-uân, pún-sin mā sī him-bō͘ Siōng-Tsú Kok-tō͘ ê lâng. 44 Pí-lia̍p-to thiaⁿ-tio̍h Iâ-so͘ í-king sí, kám-kak kî-kuài. I kiò liân-tiúⁿ lâi mn̄g khuàⁿ Iâ-so͘ sí-khì á buē. 45 I tuì hit-ê liân-tiúⁿ tsai-iáⁿ Iâ-so͘ í-king sí-khì, tsiū ín-tsún kā sin-si kau hō͘ Iok-sik. 46 Iok-sik bé tsi̍t tè iù-tē-pò͘ lâi, kā Iâ-so͘ tuì si̍p-jī-kè tíng siu lo̍h-lâi. I īng iù-tē-pò͘ pau sin-si, kā I an-tsòng tī tsio̍h-puâⁿ só͘ phah ê bōng. I mā kō tsi̍t-tè tsio̍h-thâu lâi that tī bōng-kháu. 47 Bua̍t-tāi-lia̍p ê Má-lī-a, kah Iok-sik ê lāu-bú Má-lī-a, ū khuàⁿ-tio̍h bâi-tsòng Iâ-so͘ ê só͘-tsāi.