《巴克禮普世版聖經(試讀本)》

| | | 轉寄

巴克禮普世版(試讀本) 路加福音第八章

Ho̍k-sāi Iâ-so͘ ê Hū-jîn-lâng
1 Kuè bô kuí ji̍t, Iâ-so͘ tī ta̍k-ê siâⁿ-tshī kah ta̍k-ê tsng-siā, sì-kè kiâⁿ-thàu-thàu, suan-káng tō-lí lâi pò-iông Siōng-Tsú Kok-tō͘ ê Hok-im. Tsa̍p-jī ê bûn-tô͘ lóng kah I tsò-tīn. 2 Tsi̍t-kuá bat hō͘ siâ-sîn hū-sin á-sī phuà-pēⁿ hō͘ Iâ-so͘ i-hó ê hū-jîn-lâng mā kah in tsò-hué, kî-tiong ū Bua̍t-tāi-lia̍p ê Má-lī-a. Iâ-so͘ bat tuì tsit-ê Má-lī-a sin-tsiūⁿ kuáⁿ-tshut tshit-ê kuí. 3 Koh ū Hi-lu̍t ê kuán-ke Khó͘-sat ê bó͘ Iok-a-ná kah So͘-sat-ná, í-ki̍p kî-tha tsin-tsē hū-jîn-lâng, lóng īng ka-kī ê tsîⁿ-tsâi lâi ho̍k-sāi Iâ-so͘ kah I ê bûn-tô͘.

Iā Tsíng-tsí ê Phì-jū (Mt 13:1-9;Mk 4:1-9)
4 Ū Kûn-tsiòng kè-sio̍k tuì ta̍k-ê siâⁿ-tshī, tsū-tsi̍p uá-lâi tshuē Iâ-so͘. 5 Iâ-so͘ īng phì-jū kā in kóng, " Ū tsi̍t-ê tsò-sit-lâng tshut-khì iā tsíng-tsí. Teh iā ê sî, ū-ê ka-la̍uh tī lō͘-piⁿ, hō͘ kuè-lō͘-lâng ta̍h, khong-tiong ê pue-tsiáu kā tsuân-pō͘ tsia̍h liáu-liáu. 6 Ū-ê ka-la̍uh tī tsio̍h-puâⁿ tíng, in-uī bô tsuí-hun, gê huat khí-lâi tsiū ta-khì. 7 Ū-ê ka-la̍uh tī tshì-á lāi, tshì-á pêⁿ-pêⁿ tuā-tsâng khí-lâi, suah hō͘ tshì-á hip-sí. 8 Ū-ê ka-la̍uh tī hó ê thó͘-tē, gê huat khí-lâi kiat-si̍t kàu tsi̍t-pah puē." Tsiah-ê uē kóng-liáu, Iâ-so͘ koh tuā-siaⁿ huah kóng, " Ū hīⁿ-khang thang thiaⁿ ê lâng, tio̍h thiaⁿ."

Phì-jū ê Bo̍k-tik (Mt 13:10-17;Mk 4:10-12)
9 Iâ-so͘ ê bûn-tô͘ mn̄g I, tsit-ê phì-jū sī án-tsuáⁿ kóng. 10 Iâ-so͘ kóng, " Siōng-Tsú Kok-tō͘ ê ò-biāu í-king hō͘ lín tsai, m̄-koh tuì it-puaⁿ-lâng tio̍h īng phì-jū, in-uī Sìng-king ū kì-tsài: 'in khuàⁿ mā khuàⁿ bē tshing-tshó; thiaⁿ mā thiaⁿ bē bîng-pi̍k.'"

Iâ-so͘ Kái-sueh Iā Tsíng-tsí ê Phì-jū (Mt 13:18-23;Mk 4:13-20)
11 Tsit-ê phì-jū ê ì-sù sī án-ne: Tsíng-tsí tsiū-sī Siōng-Tsú ê tō-lí. 12 Ka-la̍uh tī lō͘-piⁿ ê, sī teh phì-jū lâng thiaⁿ-tio̍h tō-lí, Mô͘-kuí tsiū lâi tuì in ê sim-lāi kā tō-lí tshiúⁿ-khì, hō͘ in bē-tàng sìn tō-lí lâi tit-tio̍h kiù. 13 Ka-la̍uh tī tsio̍h-puâⁿ tíng ê sī teh phì-jū, lâng thiaⁿ-tio̍h tō-lí suî-sî huaⁿ-hí lâi tsiap-siū, m̄-koh in tìng-kin bô tshim, sī tsiām-sî sìn niā-niā, tú-tio̍h tshì-thàm tsiū pàng-sak. 14 Ka-la̍uh tī tshì-á lāi ê, sī teh phì-jū lâng thiaⁿ-tio̍h tō-lí tsiū khì hō͘ sè-kan ê tshau-huân, tsîⁿ-tsâi kah iàn-lo̍k ê tsó͘-gāi, tō-lí suah bē sîng-tióng kiat-si̍t. 15 Ka-la̍uh tī hó thó͘-tē ê sī teh phì-jū, lâng īng hó koh siān-liông ê sim lâi thiaⁿ tō-lí koh tsip-siú, nāi-sim kian-tshî kàu kiat-si̍t."

Bí-táu-ē ê Ting (Mk 4.21-25)
16 Bô-lâng tiám ting īng bí-táu kā i khàm khí-lâi, á-sī hē tī bîn-tshn̂g-kha. Tio̍h kā i tshāi tiàm ting-tâi tíng, hō͘ ji̍p-lâi ê lâng khuàⁿ-tio̍h hit-ê kng. 17 In-uī só͘-ū ún-ba̍t ê tāi-tsì, tsiong-lâi lóng ē lō͘-hiān; só͘-ū pì-bi̍t ê tāi-tsì, kàu-sî lóng ē po̍k-lō͘ tshut-lâi hō͘ lâng tsai. 18 Só͘-í lín tio̍h kín-sīn tio̍h án-tsuáⁿ lâi thiaⁿ; in-uī Sìng-king ū kì-tsāi kóng ' Ū-ê lâng beh hō͘ i koh-khah-tsē; bô ê lâng liân i ka-kī lia̍h-tsò ū ê, mā beh kā i tshiúⁿ-khì.'"

Iâ-so͘ ê Lāu-bú kah Hiaⁿ-tī (Mt 12:46-50;Mk 3:31-35)
19 Iâ-so͘ ê lāu-bú kah hiaⁿ-tī lâi tshuē I, in-uī lâng tsin-tsē, bē-tàng uá-khì. 20 Ū-lâng kā I kóng, " Lí ê lāu-bú kah hiaⁿ-tī khiā tī guā-bīn, ài beh kìⁿ Lí." 21 Iâ-so͘ ìn kóng, " Tsiah-ê thiaⁿ Siōng-Tsú ê tō-lí koh ū tsiàu án-ne khì tsò ê lâng, tsiū-sī Guá ê lāu-bú, Guá ê hiaⁿ-tī."

Iâ-so͘ Pîng-tsīng Hong-íng (Mt 8:23-27;Mk 4:35-41)
22 Ū tsi̍t ji̍t, Iâ-so͘ kah bûn-tô͘ tsiūⁿ tsûn ê sî kā in kóng, " Lán lâi khì ô͘ ê hit-pîng huāⁿ." In tsiū khui tsûn. 23 Tsûn teh kiâⁿ ê sî, Iâ-so͘ khùn-khì. Hut-jiân tsi̍t-tsūn kiông-hong sàu lo̍h-lâi ô͘-ni̍h, tsûn-lāi ji̍p tsuí kiông-beh tīⁿ khí-lâi, hui-siông guî-hiám. 24 Bûn-tô͘ uá-khì kiò tshéⁿ Iâ-so͘, kóng, " Lāu-su ah, lāu-su ah, lán teh-beh bô miā lò͘." Iâ-so͘ tshéⁿ khí-lâi, tsik-pī hong kah hái-íng, hong-íng tsiū tsīng lo̍h-lâi. 25 Iâ-so͘ tsiū tuì bûn-tô͘ kóng, " Lín ná-ē hiah bô sìn-sim?" In tsiū kiaⁿ-hiâⁿ koh kám-kak kî-kuài, hō͘-siōng gī-lūn kóng, " Tsit-ê tàu-té sī siáⁿ-lâng? Liân hong kah íng lóng sūn-ho̍k I ê bīng-līng!"

Iâ-so͘ I-hó Siâ-sîn Hū-sin ê Lâng (Mt 8:28-34;Mk 5:1-2)
26 Iâ-so͘ kah bûn-tô͘ tsē tsûn kuè-khì Ka-lī-lī-ô͘ ê tuì-bīn huāⁿ, lâi-kàu Keh-la̍h-sim-lâng ê tē-hng. 27 Iâ-so͘ lo̍h-tsûn tsiūⁿ huāⁿ ê sî, ū tsi̍t-ê hō͘ siâ-sîn hū-sin ê lâng, tuì siâⁿ-ni̍h tshut-lâi tú-tio̍h I. Tsit-ê lâng í-king tsin kú bô tshīng saⁿ, bô tuà tī tshù-lāi, lóng tiàm tī bōng-á-po͘. 28 Hit-ê lâng tsi̍t-ē khuàⁿ-tio̍h Iâ-so͘, tsiū phak tī I ê bīn-tsîng tuā-siaⁿ huah, " Tsì-kuân Siōng-Tsú ê Kiáⁿ Iâ-so͘, Lí hô-pit lâi kan-sia̍p guá ê tāi-tsì? Kiû Lí m̄-thang kā guá khó͘-tshó͘." 29 I án-ne kóng sī in-uī Iâ-so͘ ū bīng-līng siâ-sîn tuì hit-ê lâng tshut-lâi. Í-tsîng siâ-sîn siông-siông kā i lia̍h-tiâu-tiâu. Lâng īng thih-liān-á kā i liān teh, koh īng kha-khàu kā i khàu teh, lâi kā i kuaiⁿ khí-lâi, m̄-koh i kā pa̍k i ê khì-kū tshuah-tn̄g, siâ-sîn koh hō͘ i tsông tshut-khì khòng-iá. 30 Iâ-so͘ mn̄g hit-ê lâng kóng, " Lí kiò siáⁿ-mi̍h miâ?" Ìn kóng, " Kun-thuân." In-uī ū tsin-tsē siâ-sîn kā i hū-sin. 31 Siâ-sîn ai-kiû Iâ-so͘, m̄-thang bīng-līng in ji̍p-khì bô-té tshim-kheⁿ. 32 Hit sî ū kui tuā-tīn ê ti tī suaⁿ-ni̍h teh thó-tsia̍h. Siâ-sîn kiû Iâ-so͘ tsún in ji̍p-khì hiah-ê ti ê lāi-bīn. Iâ-so͘ ū tsiàu in só͘ kiû ín-tsún. 33 Siâ-sîn tsiū tuì hit-ê lâng tshut-khì, ji̍p-khì hiah-ê ti. Kui tīn ê ti tsiū tuì suaⁿ-phiâⁿ tsông lo̍h-khì ô͘-ni̍h, hō͘ tsuí kik-sí. 34 Hiah-ê kò͘ ti ê lâng khuàⁿ-tio̍h tsit-ê tāi-tsì, tsiū tsáu-khì pò hō͘ siâⁿ-lāi kah tsng-siā ê lâng tsai. 35 Thiaⁿ-tio̍h ê lâng lóng tshut-lâi ài-beh khuàⁿ tsit-ê tāi-tsì. In lâi-kàu Iâ-so͘ hia, siâ-sîn í-king tuì hit-ê lâng tshut-lâi. Hit lâng ū tshīng saⁿ, tsing-sîn tsìng-siông, tsē tī Iâ-so͘ ê kha-tsîng. In tsiū tuā tio̍h-kiaⁿ. 36 Tshin-ba̍k khuàⁿ-tio̍h ê lâng, kā hō͘ siâ-sîn hū-sin ê lâng án-tsuáⁿ tit-tio̍h i-hó ê tāi-tsì, pò hō͘ tsìng-lâng tsai. 37 Keh-la̍h-sim sì-tsiu-uî ê lâng lóng kiû Iâ-so͘ lī-khui in, in-uī in tsin kiaⁿ-hiâⁿ. Iâ-so͘ tsiū tsē tsûn tńg-khì. 38 Thuat-lī siâ-sîn hit-ê lâng, kiû beh tuè Iâ-so͘ khì, m̄-koh Iâ-so͘ kiò i tńg-khì, kóng, 39 " Tńg-khì lín tau, kā Siōng-Tsú uī lí só͘ tsò hiah tuā ê tāi-tsì, pò hō͘ tsìng-lâng tsai." Hit lâng tsiū tńg-khì, kā Iâ-so͘ uī i só͘ tsò ê tāi-tsì, pò hō͘ tsuân-siâⁿ ê lâng tsai.

Huē-tn̂g Tsú-kuán ê Tsa-bó͘-kiáⁿ kah Tài Hiat-lāu-pēⁿ ê Hū-jîn-lâng (Mt 9:18-26;Mk 5:21-43)
40 Iâ-so͘ tńg-lâi ê sî, tsìng-lâng lóng kā I gîng-tsiap, in-uī ta̍k-ke lóng teh thìng-hāu I. 41 Ū tsi̍t-ê huē-tn̂g ê tsú-kuán miâ-kiò Gâi-ló͘, lâi phak tī Iâ-so͘ ê kha-tsîng, khún-kiû I khì i ê tshù. 42 In-uī i tsa̍p-jī huè ê to̍k-seⁿ tsa-bó͘-kiáⁿ teh-beh sí à. Iâ-so͘ tsiū kah i khì, kûn-tsiòng mā e-e-kheh-kheh tsò-hué khì. 43 Hit sî ū tsi̍t-ê hū-jîn-lâng, tài hiat-lāu-pēⁿ í-king tsa̍p-jī nî kú à, sui-jiân ke-hué khai liáu-liáu tshuē i-sing i-tī, m̄-koh bô kah tsi̍t-ê lâng ē-tàng kā i i-hó. 44 Tsit-ê hū-jîn-lâng kiâⁿ uá-lâi Iâ-so͘ ê kha-tsiah-āu, bong I saⁿ-á-ki ê tshiu, i ê hiat-lāu suî-sî tsí. 45 Iâ-so͘ mn̄g kóng, " Siáⁿ-lâng kā Guá bong?" Tāi-ke lóng kóng bô. Pí-tik tsiū kóng, " Lāu-su, kûn-tsiòng pik uá-lâi, kā Lí kheh-tio̍h lah." 46 Iâ-so͘ kóng, " Tik-khak ū-lâng bong-tio̍h Guá, in-uī Guá tsai, ū kuân-lîng tuì Guá sing-khu tshut-khì." 47 Hū-jîn-lâng tsai-iáⁿ am-khàm bē tiâu, tsiū phi̍h-phi̍h-tshuah lâi phak tī Iâ-so͘ ê kha-tsîng. I tī kûn-tsiòng ê bīn-tsîng, kóng-bîng bong Iâ-so͘ ê guân-in, kah i ê pēⁿ án-tsuáⁿ suî-sî hó-khì. 48 Iâ-so͘ kā i kóng, " Hū-jîn-lâng ah, lí ê sìn-sim hō͘ lí ê pēⁿ hó-khì. Tsò lí an-sim tńg-khì." 49 Iâ-so͘ iáu teh kóng ê sî, ū-lâng tuì huē-tn̂g tsú-kuán ê tshù lâi kā Gâi-ló͘ kóng, " Lí ê tsa-bó͘-kiáⁿ í-king sí-khì à, hô-pit koh lô-huân lāu-su?" 50 Iâ-so͘ thiaⁿ-tio̍h tsiū ìn kóng, " M̄ bián kiaⁿ, tsí-ū tio̍h sìn, i ē hó khí-lâi." 51 Iâ-so͘ khì kàu in tshù ê sî, tû-liáu Pí-tik, Iok-hān, Ngá-kok, kah tsa-bó͘-gín-á ê pē-bú í-guā, m̄ tsún pa̍t-lâng kah I ji̍p-khì. 52 Tsìng-lâng lóng uī-tio̍h sí-khì ê tsa-bó͘-gín-á teh thî-khàu pi-siong. Iâ-so͘ kóng, " M̄-thang thî-khàu, in-uī i m̄-sī sí, sī teh khùn niā-niā." 53 In-uī tāi-ke lóng tsai tsa-bó͘-gín-á í-king sí-khì à, tsiū thí-tshiò Iâ-so͘. 54 Iâ-so͘ khan tsa-bó͘-gín-á ê tshiú, tuā-siaⁿ huah kóng, " Tsa-bó͘-gín-á, khí-lâi!" 55 Tsa-bó͘-gín-á tsiū huê-hûn, suî-sî peh khí-lâi. Iâ-so͘ huan-hù tio̍h hō͘ tsa-bó͘-gín-á tsia̍h mi̍h-kiāⁿ. 56 I ê pē-bú tio̍h-kiaⁿ koh kî-kuài. Iâ-so͘ bīng-līng in m̄-thang tsiong só͘ huat-sing ê tāi-tsì kā lâng kóng.