《巴克禮普世版聖經(試讀本)》

| | | 轉寄

巴克禮普世版(試讀本) 路加福音第二十二章

Hām-hāi Iâ-so͘ ê Im-bô͘ (Mt 26:1-5, 14-16; Mk 14:1-2, 10-11; Ih 11:45-53)
1 Tû-kàⁿ-tseh, mā kiò-tsò Puâⁿ-kuè-tseh, teh-beh kàu. 2 Tsè-si-tiúⁿ kah king-ha̍k kàu-su in-uī kiaⁿ jîn-bîn huán-tuâⁿ, só͘-í tshuē-khuàⁿ ū sím-mi̍h pān-huat thang hāi-sí Iâ-so͘.

Iû-tāi Tông-ì Tshut-bē Iâ-so͘ (Mt 26:14~16;Mk 14:10~11)
3 Sat-tàn ji̍p tī hit-ê kiò-tsò Ka-lio̍k ê Iû-tāi, i sī tsa̍p-jī sù-tô͘ ê tsi̍t-ê; 4 tsiū khì kah tsiah-ê tsè-si-tiúⁿ í-ki̍p sìng-tiān ê siú-uē-kuaⁿ tsò-hué tsham-siông, khuàⁿ beh īng sím-mi̍h hong-huat tsiong Iâ-so͘ kau hō͘ in. 5 In tsin huaⁿ-hí, iok-tīng beh hō͘ i tsîⁿ. 6 Iû-tāi tông-ì, tsiū tshuē ki-huē tng jîn-bîn bô tī in tiong-kan ê sî, tsiong Iâ-so͘ kau hō͘ in.

Tsún-pī Puâⁿ-kuè-tseh ê Buán-tshan (Mt 26:17-25; Mk 14:12-21; Ih 13:21-30)
7 Tû-kàⁿ-tseh kàu à. Hit ji̍t tio̍h thâi Puâⁿ-kuè-tseh ê iûⁿ-ko. 8 Iâ-so͘ tshe Pí-tik kah Iok-hān kóng, " Lín khì tsún-pī Puâⁿ-kuè-tseh ê buán-tshan." 9 In nn̄g-ê mn̄g kóng, " Lí ài guán khì sím-mi̍h só͘-tsāi tsún-pī?" 10 Iâ-so͘ ìn kóng, " Lín ji̍p-khì siâⁿ-lāi tsiū ē tú-tio̍h tsi̍t-ê lâng kuāⁿ tsuí-pân. Lín tuè i ji̍p-khì hit king tshù, 11 kā hit king tshù ê tsú-lâng kóng, ' Lāu-su teh mn̄g, I beh kah sù-tô͘ tsia̍h Puâⁿ-kuè-tseh buán-tshan ê kheh-thiaⁿ tī tó-uī?.' 12 Hit-ê lâng ē pò lín khuàⁿ lâu-tíng tsi̍t king í-king pò͘-tì hó-sè ê tuā-thiaⁿ. Lín tio̍h tī hia tsún-pī." 13 In khì, kó-jiân ta̍k-hāng lóng tsiàu Iâ-so͘ só͘ kā in kóng ê. In tsiū tī hia tsún-pī Puâⁿ-kuè-tseh ê buán-tshan.

Tsú ê Buán-tshan (Mt 26:26-30; Mk 14:22-26; Ih 11:23-25)
14 Buán-tshan ê sî-kan kàu, Iâ-so͘ tsiū kah sù-tô͘ tsò-hué tsē-toh. 15 Iâ-so͘ tuì in kóng, " Tī siū-hāi tsìn-tsîng, guá tsin ì-ài kah lín tsia̍h tsit-ê Puâⁿ-kuè-tseh ê buán-tshan. 16 Guá kā lín kóng, tī Siōng-Tsú ê Kok-tō͘ si̍t-hiān í-tsîng guá bē koh tsia̍h tsit khuán ê buán-tshan." 17 Iâ-so͘ kā pue tsiap kuè-lâi, tsiok-siā liáu-āu, kóng, " Lín phâng tsit-ê pue khì pun hō͘ ta̍k-ke lim. 18 Guá kā lín kóng, tuì tsit-má khí ti̍t-kàu Siōng-Tsú ê Kok-tō͘ lâi-lîm, guá tsua̍t-tuì bē koh lim tsit khuán ê phû-tô-tsiap." 19 Jiân-āu Iâ-so͘ the̍h piáⁿ tsiok-siā liáu-āu peh-khui the̍h hō͘ in, kóng, " Tsit-ê sī guá ê sing-khu, uī-tio̍h lín lâi hiàn ê, lín tio̍h án-ne tsò lâi kì-liām Guá." 20 Tsia̍h liáu-āu koh phâng pue tsiok-siā, kóng, " Tsit-ê pue sī sin-iok, īng guá uī-tio̍h lín lâu ê hueh lâi siat-li̍p ê bîng-iok. 21 Lín khuàⁿ! tshut-bē guá hit-ê lâng kah Guá tsò-hué tshun-tshiú tī toh-tíng. 22 In-uī Jîn-tsú ē tsiàu Siōng-Tsú só͘ tiāⁿ-tio̍h ê lâi lī-khui sè-kan. M̄-koh tshut-bē Jîn-tsú hit-ê lâng ū tsai-hō!" 23 In tsiū hō͘-siōng mn̄g-lâi mn̄g-khì, ài beh tsai in tiong-kan siáⁿ-lâng ē tsò tsit-ê tāi-tsì.

Siáⁿ-lâng Siōng-tuā ê Tsing-lūn
24 In ū teh tsing-lūn, khuàⁿ in tiong-kan siáⁿ-lâng sǹg siōng tuā. 25 Iâ-so͘ tsiū kā in kóng, " Guā-pang-lâng ê kun-ông tsò tsú lâi tī-lí jîn-bîn; thóng-tī-tsiá kiò-tsò un-tsú. 26 M̄-koh lín tsiū m̄-sī án-ne; lín tiong-kan tsò tuā ê tio̍h tshin-tshiūⁿ sī-sè, tsò thâu-lâng ê tio̍h tshin-tshiūⁿ tshe-īng ê. 27 Sím-mi̍h lâng tsò tuā? Sī tsē-toh-ê lâng-kheh, á-sī ho̍k-bū ê lâng? Kám m̄-sī tsē-toh ê lâng-kheh? M̄-koh guá tī lín tiong-kan tshin-tshiūⁿ teh tsò ho̍k-bū ê lâng. 28 Lín tī tshì-thàm tiong siông-siông kah guá tsò-hué. 29 Guá ê Thiⁿ-Pē īng ông ê kuân-pìng hō͘ guá. Guá mā beh án-ne tsiong ông ê kuân-pìng hō͘ lín. 30 Hō͘ lín thang tī guá ê kok-tō͘ kah guá tsò-hué tsē-toh lim-tsia̍h. Koh tsē tuà pó-tsō lâi sím-phuàⁿ Í-sik-lia̍t tsa̍p-jī ê tsi-tso̍k."

Ī-giân Pí-tik M̄-jīn Tsú (Mt 26:31-35; Mk 14:27-31; Ih 13:36-38)
31 Iâ-so͘ koh kóng, Se-bûn, Se-bûn ah, lí khuàⁿ, Sat-tàn í-king tit-tio̍h ín-tsún, beh tshin-tshiūⁿ puà be̍h án-ne kā lín puà. 32 M̄-koh guá ū thè lí kî-tó, hō͘ lí bē sit-khì sìn-sim. Lí huê-sim tsuán-ì liáu-āu, tio̍h kian-kò͘ lí hiaⁿ-tī ê sìn-sim." 33 Pí-tik ìn kóng, " Tsú ah, guá tsún-pī piān-piān beh kah lí khì tsē-kaⁿ, kah lí tsò-hué sí." 34 Iâ-so͘ kā i kóng, " Pí-tik ah, guá kā lí kóng, kin-á-ji̍t ke iáu-buē thî í-tsîng, lí ē saⁿ pái m̄ jīn Guá."

Tsîⁿ-tē kah To-kiàm
35 Koh kā tsa̍p-jī sù-tô͘ kóng, " Guá tsîng tshe lín tshut-khì, kiò lín m̄-thang tuà tsîⁿ-tē, hîng-lí-tē kah ê. Lín kám ū khiàm sím-mi̍h?" Sù-tô͘ ìn kóng, " Bô." 36 Iâ-so͘ kā in kóng, " M̄-koh taⁿ ū tsîⁿ-tē ê tio̍h tuà khì, ū hîng-lí-tē ê mā tio̍h tuà khì. Bô to ê lâng tio̍h bē i ê guā-saⁿ khì bé to lâi tuà khì. 37 Sìng-king ū kì-tsài: I hō͘ lâng sǹg-tsò put-huat ê lâng.( tsù: ISA 53:12) Tsit-kù uē it-tīng ē ìng-giām tī Guá ê sing-khu. Sū-si̍t-siōng, Sìng-king só͘ kì-tsāi kuan-hē Guá ê tāi-tsì í-king teh-beh ìng-giām ā." 38 Sù-tô͘ kóng, " Tsú ah, lí khuàⁿ, tī tsia ū nn̄g ki to." Iâ-so͘ ìn kóng, " Án-ne ū kàu-gia̍h à."
Iâ-so͘ Tī Kan-ná-suaⁿ Kî-tó (Mt 26:36-46; Mk 14:32-42)
39 Iâ-so͘ tsiàu-siông tshut-khì Kan-ná-suaⁿ. Sù-tô͘ mā tuè I khì. 40 Kàu hit só͘-tsāi Iâ-so͘ tsiū kā in kóng, " Lín tio̍h kî-tó, tsiah bē siū tshì-thàm ê bê-hi̍k." 41 Jiân-āu Iâ-so͘ lī-khui in tsha-put-to ū hiat tsio̍h-thâu ê hn̄g, kuī lo̍h-khì kî-tó, kóng, 42 " Thiⁿ-Pē ah, Lí nā khíng, kiû Lí tsiong tsit-ê khó͘-pue phâng lī-khui guá. Tān m̄-thang tsiàu Guá ê ì-sù, tio̍h tsiàu lí ê tsí-ì lâi si̍t-hiān." 43 Ū tsi̍t-ê thiⁿ-sài tuì thiⁿ tshut-hiān lâi ke-thiⁿ I ê khuì-la̍t. 44 Iâ-so͘ hui-siông thòng-khó͘, kî-tó jú pik-tshiat. I ê kuāⁿ tshin-tshiūⁿ tuā-tiám hueh teh tih lo̍h tē. 45 Iâ-so͘ kî-tó suah khiā khí-lâi, khì kàu sù-tô͘ hia khuàⁿ-tio̍h in in-uī iu-būn suah khùn khì. 46 Iâ-so͘ kā in kóng, " Lín ná-ē teh khùn? khí-lâi kî-tó tsiah bē siū tshì-thàm ê bê-hi̍k."

Iâ-so͘ Hông Lia̍h-khì (Mt 26:47-56; Mk 14:43-50; Ih 18:3-11)
47 Iáu teh kóng ê sî ū kui-tīn lâng kàu. Tsa̍p-jī sù-tô͘ ê tsi̍t-ê, tsiū-sī hit-ê kiò-tsò Iû-tāi ê tsò thâu-tsîng tshuā-lō͘. Iû-tāi kiâⁿ uá Iâ-so͘ beh kā I tsim. 48 M̄-koh Iâ-so͘ kā i kóng, " Iû-tāi, lí īng tsim-tshuì lâi tshut-bē Jîn-tsú sī-bô?" 49 Iâ-so͘ sin-piⁿ ê sù-tô͘ khuàⁿ-tio̍h só͘ beh huat-sing ê tāi-tsì tsiū kóng, " Tsú ah, guán īng to lâi kā in thâi hó bô?" 50 Kî-tiong tsi̍t-ê lâng kā tsè-si-tiúⁿ ê lô͘-po̍k phut lo̍h-khì, kā i tsiàⁿ-pîng ê hīⁿ-á siah khí-lâi. 51 Iâ-so͘ kóng, " Suah khì! Án-ne hó à!" I tsiū bong hit-ê lô͘-po̍k ê hīⁿ-á, lâi kā i i-hó. 52 Iâ-so͘ tuì hiah-ê lâi beh lia̍h I ê tsè-si-tiúⁿ, sìng-tiān ê siú-uē-kuaⁿ kah tiúⁿ-ló kóng, " Lín kám tio̍h gia̍h to kah thuî tshut-lâi? Bē su teh-beh lia̍h thó͘-huí leh? 53 Guá ta̍k-ji̍t kah lín tī sìng-tiān, lín bô hē-tshiú kā guá lia̍h. M̄-koh tsit-má sī lín tng âng ê sî, mā sī o͘-àm teh tsiáng- kuân."

Pí-tik M̄-jīn Iâ-so͘ (Mt 26:57-58, 69-75; Mk 14:53-54, 66-72; Ih 18:12-18, 25-27)
54 In tsiū lia̍h Iâ-so͘, kā I ah-khì tsè-si-tiúⁿ ê kong-kuán. Pí-tik lī hn̄g-hn̄g teh tuè Iâ-so͘. 55 Ū-lâng tī tiâⁿ-ni̍h khí hué, tsò-hué uî teh tsē. Pí-tik mā tsē tī in tiong-kan. 56 Ū tsi̍t-ê lí-pī khuàⁿ-tio̍h Pí-tik tsē tī hia teh hang-hué, tsiū ba̍k-tsiu kim-kim kā i siòng, kóng, " Tsit-ê lâng mā sī kah Iâ-so͘ teh tsò tīn." 57 Pí-tik m̄ sîng-jīn, kóng, " Hū-jîn-lâng ah, guá m̄-bat I." 58 Koh kuè bô juā kú, līng-guā tsi̍t-ê lâng khuàⁿ-tio̍h Pí-tik tsiū kóng, " Lí mā sī kah in tàu-tīn ê lâng." Pí-tik ìn kóng, " Pîng-iú ah, guá m̄-sī." 59 Tsha-put-to kuè tsi̍t-tiám tsing kú, koh ū tsi̍t-ê lâng kian-tshî kóng, " Tsit-ê lâng tsin-tsiàⁿ kah Iâ-so͘ tsò tīn. In-uī i mā sī Ka-lī-lī-lâng." 60 M̄-koh Pí-tik kóng, " Pîng-iú ah, lí teh kóng sím-mi̍h, guá m̄-tsai." Iáu teh kóng ê sî, ke suî-sî thî. 61 Hit sî Tsú ua̍t thâu khuàⁿ Pí-tik. Pí-tik tsiū siūⁿ-khí Tsú tuì i kóng ê uē: " Kin-á-ji̍t ke thî í-tsîng, lí ē saⁿ pái m̄ jīn Guá." 62 Pí-tik tsiū tshut-khì guā-bīn tuā-siaⁿ thî-khàu.

Iâ-so͘ Siū Hí-lāng Piⁿ-phah (Mt 26:67-68; Mk 14:65)
63 Hiah-ê kò͘-siú Iâ-so͘ ê lâng kā I hì-lāng, koh kā I piⁿ-phah. 64 In am Iâ-so͘ ê bīn, mn̄g I kóng, " Lí nā sī sian-ti, ioh khuàⁿ siáⁿ-lâng kā Lí phah?" 65 In koh kóng tsin-tsē uē lâi kā I bú-jio̍k.

Iâ-so͘ Tī Gī-huē Siū Sím-mn̄g (Mt 26:59-66; Mk 14:55-64; Ih 18:19-24)
66 Thiⁿ tsi̍t-ē kng, Iû-thài-lâng ê tsè-si-tiúⁿ kah king-ha̍k kàu-su tsū-tsi̍p khui-huē kuat-tīng kā Iâ-so͘ ah khì in ê gī-huē. 67 In mn̄g Iâ-so͘ kóng, "Lí nā sī Ki-tok tio̍h kā guán kóng." 68 Iâ-so͘ kā in kóng, " Guá kā lín kóng, lín mā m̄ sìn. Guá nā mn̄g lín, lín mā m̄ ìn. 69 M̄-koh tuì tsit-má khí, Jîn-tsú ē tsē tī kuân-lîng Siōng-Tsú ê tsiàⁿ-pîng."( tsù: SPh 110:1) 70 Tsìng-lâng lóng kóng, " Án-ne, Lí tsiū-sī Siōng-Tsú ê Kiáⁿ sī-bô?" Iâ-so͘ ìn kóng, " Tsiàu lín só͘ kóng ê, Guá tsiū-sī." 71 In kóng, " Lán ná-tio̍h koh su-iàu sím-mi̍h tsìng-kì? Lán í-king ū thiaⁿ-tio̍h I tshin-tshuì kóng à."