《巴克禮普世版聖經(試讀本)》

| | | 轉寄

巴克禮普世版(試讀本) 路加福音第二十三章

Iâ-so͘ Tī Pí-lia̍p-to Bīn-tsîng Siū Sím-mn̄g (Mt 27:1-2, 11-14; Mk 15:1-5; Ih 18:28-38)
1 Tsuân-thé gī-uân lóng khiā khí-lâi, kā Iâ-so͘ ah khì Pí-lia̍p-to ê bīn-tsîng. 2 In khòng-kò kóng, " Guán khuàⁿ tsit-ê lâng bê-hi̍k guán ê bîn-tso̍k, kìm-tsí lâng la̍p suè hō͘ Hông-tè, koh tsū-tshing-tsò Ki-tok, tsò ông." 3 Pí-lia̍p-to mn̄g Iâ-so͘ kóng, " Lí sī Iû-thài-lâng ê ông sī-bô?" Iâ-so͘ ìn kóng, " Sī, tsiàu lí kóng án-ne." 4 Pí-lia̍p-to tuì hiah-ê tsè-si-tiúⁿ kah kui-tīn ê lâng kóng, " Guá khuàⁿ tsit-ê lâng bô tsuē." 5 M̄-koh in jú kian-tshî kóng, " I tuì Ka-lī-lī-síng khai-sí, taⁿ lâi-kàu tsia, tī Iû-thài tsuân-tē kà-sī lâng, siàn-tōng jîn-bîn."

Iâ-so͘ Tī Hi-lu̍t ê Bīn-tsîng
6 Pí-lia̍p-to tsi̍t-ē thiaⁿ-tio̍h, tsiū mn̄g khuàⁿ tsit-ê lâng sī Ka-lī-lī-lâng á m̄-sī. 7 I tsi̍t-ē tsai Iâ-so͘ sio̍k tī Hi-lu̍t só͘ kuán-hat, tsiū kā I sàng khì Hi-lu̍t hia. Hit sî Hi-lu̍t lâng mā tī Iâ-lō͘-sat-líng. 8 Hi-lu̍t khuàⁿ-tio̍h Iâ-so͘ tsin huaⁿ-hí. In-uī i bat thiaⁿ-tio̍h Iâ-so͘ ê tāi-tsì, it-ti̍t ài beh kìⁿ I, koh ǹg-bāng ē-tàng khuàⁿ-tio̍h I kiâⁿ sîn-jiah. 9 Hi-lu̍t mn̄g Iâ-so͘ tsin-tsē tāi-tsì, m̄-koh Iâ-so͘ lóng bô ìn i puàⁿ kù. 10 Tsè-si-tiúⁿ kah king-ha̍k kàu-su khiā khí-lâi, ki̍k-li̍k khòng-kò Iâ-so͘. 11 Hi-lu̍t kah i ê ping mā kā I bú-jio̍k, hì-lāng. Jiân-āu kā I tshīng tsi̍t niá tsin suí ê tn̂g-phàu, tsiah kā I sàng tńg-khì hîng Pí-lia̍p-to. 12 Hi-lu̍t kah Pí-lia̍p-to pún-lâi ū kiat-uàn. Tuì hit tsi̍t ji̍t khí suah piàn-tsò pîng-iú.

Iâ-so͘ Hông Phuàⁿ Sí-hîng (Mt 27:15-26; Mk 15:6-15; Ih 18:39-19.16)
13 Pí-lia̍p-to tiàu hiah-ê tsè-si-tiúⁿ, kuaⁿ-uân kah jîn-bîn lâi, 14 kā in kóng, " Lín ah tsit-ê lâng lâi guá tsia, khòng-kò I siàn-tōng jîn-bîn. Taⁿ guá tī lín ê bīn-tsîng kā I sím-mn̄g, m̄-koh guá tshâ lóng bô lín kò I ê tsuē. 15 Hi-lu̍t mā jīn-tīng I bô tsuē, tsiah tsiong I sàng tńg-lâi hîng lán. Khó-kiàn I bô tsò sím-mi̍h ing-kai sí ê tāi-tsì. 16 Só͘-í guá beh kā I piⁿ-phah kà-sī tsi̍t-ē tsiah pàng I khì." 17 Muí-nî ê Puâⁿ-kuè-tseh, tsóng-tok tio̍h tsiàu in ê iau-kiû kā in pàng tsi̍t-ê huān-lâng.(Ū ê pán-pún bô tsit tsat) 18 Kûn-tsiòng tâng-tsê tuā-siaⁿ huah kóng, " Tio̍h tû-khì tsit-ê lâng, pàng Pa-lia̍p-pa hō͘ guán." 19 Tsit-ê Pa-lia̍p-pa, in-uī tī siâⁿ-lāi tsok-luān koh thâi-sí lâng, tsiah kuaiⁿ lo̍h-kaⁿ. 20 Pí-lia̍p-to beh ài pàng Iâ-so͘, tsiū koh tuì tsìng-lâng kóng tsi̍t pái. 21 M̄-koh in tuā-siaⁿ huah kóng, " Kā I tìng si̍p-jī-kè, Kā I tìng si̍p-jī-kè." 22 Pí-lia̍p-to tē-saⁿ pái tuì in kóng, " Sī án-tsuáⁿ? I kám ū tsò sím-mi̍h pháiⁿ tāi-tsì? Guá khuàⁿ I bô ing-kai sí ê tsuē, só͘-í guá beh kā I piⁿ-phah kà-sī tsi̍t-ē tsiah pàng I khì." 23 M̄-koh in kè-sio̍k tuā-siaⁿ huah iau-kiû kā Iâ-so͘ tìng si̍p-jī-kè. Tsuè-āu in ê siaⁿ suah khah-iâⁿ. 24 Pí-lia̍p-to tsiū tsiàu in só͘ kiû ê lâi suan-phuàⁿ: 25 pàng in só͘ iau-kiû hit-ê in-uī tsok-luān koh thâi-sí lâng hō͘ lâng kuaiⁿ lo̍h-kaⁿ ê Pa-lia̍p-pa; tsiong Iâ-so͘ kau hō͘ in, sūn in ê ì-sù khì tshù-lí.

Iâ-so͘ Hông Tìng Si̍p-jī-kè (Mt 27:32-44; Mk 15:21-32; Ih 19:17-27)
26 Ping-á ah Iâ-so͘ khì ê sî, ū tsi̍t-ê Kó͘-lī-nāi ê lâng miâ-kiò Se-bûn tuì tsng-kha lâi. In kā i khiú lâi, tsiong si̍p-jī-kè khuà tuà i ê king-thâu hō͘ i giâ, lâi tuè Iâ-so͘ ê āu-bīn kiâⁿ. 27 Ū tsi̍t tuā-tīn lâng teh tuè Iâ-so͘. Kî-tiong ū tsi̍t-kuá hū-jîn-lâng uī I pi-siong thî-khàu. 28 Iâ-so͘ ua̍t thâu tuì in kóng, " Iâ-lō͘-sat-líng ê hū-jîn-lâng ah, lín m̄-bián uī guá thî-khàu, tio̍h uī lín ka-kī kah lín ê kiáⁿ-jî lâi thî-khàu! 29 In-uī sî teh-beh kàu, lâng ē kóng, ' Bē huâi-īn, m̄-bat seⁿ kiáⁿ, m̄-bat hō͘ gín-á tsia̍h ling ê hū-jîn-lâng tsin ū hok-khì.' 30 Hit sî lâng ē tuì tuā-suaⁿ kóng, ' Kā guán teh lo̍h-lâi!' mā tuì sió-suaⁿ kóng, ' Kā guán khàm lo̍h-lâi!'( tsù: HSA 10:8) 31 In-uī liân tsheⁿ ê tshiū-ba̍k to án-ne, ta-khì ê tshiū-ba̍k kám bē koh-khah lī-hāi?" 32 Koh ū nn̄g-ê huān-lâng hō͘ lâng ah khì kah Iâ-so͘ tsò-hué tshù sí-hîng. 33 In khì kàu tsi̍t-ê miâ-kiò Thâu-khak-uáⁿ ê só͘-tsāi, tsiū tī hia kā Iâ-so͘ tìng si̍p-jī-kè. Mā tìng hit nn̄g-ê huān-lâng, tsi̍t-ê tī tsiàⁿ-pîng, tsi̍t-ê tī tò-pîng. 34 Iâ-so͘ kóng, " Thiⁿ-Pē ah, sià-bián in, in-uī in m̄-tsai in só͘ tsò ê." Jiân-āu in tsiū liam-khau pun Iâ-so͘ ê saⁿ. 35 Tsìng-lâng khiā tī hia teh khuàⁿ. Hiah-ê Iû-thài-lâng ê thâu-lâng kā Iâ-so͘ thí-tshiò kóng, " I bat kiù pa̍t-lâng. I nā sī Siōng-Tsú só͘ kíng-suán ê Ki-tok, tio̍h kiù ka-kī!" 36 Hiah-ê ping-á mā kā I hì-lāng, kiâⁿ uá-khì phâng sng-tshò͘ hō͘ I, 37 kóng, " Lí nā sī Iû-thài-lâng ê ông, tio̍h kiù Lí ka-kī." 38 Tī Iâ-so͘ ê thâu-khak tíng-bīn ū tsuē-tsn̄g ê pâi-á siá kóng, " Tsit-ê sī Iû-thài-lâng ê ông." 39 Tsò-hué tìng si̍p-jī-kè ê huān-lâng tiong ê tsi̍t-ê bú-jio̍k Iâ-so͘, kóng, " Lí kám m̄-sī Ki-tok? Tio̍h kiù Lí ka-kī mā tio̍h kiù guán." 40 Līng-guā tsi̍t-ê huān-lâng kā hit-ê tsik-pī, kóng, " Lí kah I kāng-khuán teh siū hîng, lí kám m̄-kiaⁿ Siōng-Tsú? 41 Lán siū hîng sī kong-tō, in-uī lán ū huān-tsuē ing-kai siū tshù-hua̍t. M̄-koh tsit-ê lâng bô tsò m̄-tio̍h ê tāi-tsì." 42 Hit-ê huān-lâng kóng, " Iâ-so͘ ah, Lí tsò ông lâi-lîm ê sî, tshiáⁿ ē-kì-tit guá!" 43 Iâ-so͘ kā i kóng, " Guá si̍t-tsāi kā lí kóng, Kin-á-ji̍t lí ē kah guá tsò-hué tī Lo̍k-hn̂g."

Iâ-so͘ ê Sí-bông (Mt 27:45-56;Mk 15:33-41;Ih 19:28-30)
44 Tsha-put-to tiong-tàu ê sî, tsuân tē o͘-àm kàu ē-po͘ saⁿ-tiám ê sî, ji̍t-thâu sit kng. 45 sìng-tiān lāi ê tiùⁿ-lî tuì tiong li̍h-khui. 46 Iâ-so͘ tuā-siaⁿ kiò, kóng, " Thiⁿ-Pē ah, Guá ê lîng-hûn kau-thok Lí." Kóng suah tsiū tn̄g-khuì. 47 Liân-tiúⁿ khuàⁿ-tio̍h só͘ huat-sing ê tāi-tsì, tsiū o-ló Siōng-Tsú, kóng, " Tsit-ê tsin-tsiàⁿ sī gī-lâng!" 48 Tsū-tsi̍p tī hia teh khuàⁿ ê kûn-tsiòng khuàⁿ-tio̍h só͘ huat-sing ê tāi-tsì, lóng ná kiâⁿ ná tuî sim-kuaⁿ pi-siong tńg-khì. 49 Hiah-ê bat Iâ-so͘ ê lâng kah tuì Ka-lī-lī-síng tuè Iâ-so͘ lâi ê hū-jîn-lâng, lóng khiā hn̄g-hn̄g teh khuàⁿ tsiah-ê tāi-tsì.

Iâ-so͘ ê Bâi-tsòng (Mt 27:57-61; Mk 15:42-47; Ih 19:38-42)
50 Ū tsi̍t-ê lâng miâ-kiò Iok-sik, i sī tsi̍t-ê gī-uân, tsò lâng liông-siān koh ū tsìng-gī. 51 I bô tsàn-sîng kî-tha gī-uân ê kè-bô͘ kah hîng-tōng. I sī Iû-thài-lâng ê siâⁿ-tshī A-lī-má-thài ê lâng, pîng-sî ū teh kî-thāi Siōng-Tsú Kok-tō͘ ê lâi-lîm. 52 Tsit-ê lâng khì kìⁿ Pí-lia̍p-to, tshíng-kiû siu-bâi Iâ-so͘ ê sin-si. 53 I tsiong Iâ-so͘ ê sin-si siu lo̍h-lâi, īng iù-tē-pò͘ pau. Jiân-āu kā I bâi-tsòng tī tsio̍h-piah phah-hó ê bōng lāi. Tsit-ê bōng lóng iáu m̄-bat īng kuè. 54 Hit ji̍t sī tseh ê Tsún-pī-ji̍t, An-hioh-ji̍t teh-beh kàu à. 55 Tuì Ka-lī-lī-síng kah Iâ-so͘ tsò-hué lâi hiah-ê hū-jîn-lâng tuè tī Iok-sik ê āu-bīn. In tsim-tsiok khuàⁿ hit-ê bōng, khuàⁿ Iâ-so͘ ê uî-thé án-tsuáⁿ hē. 56 In tsiū tńg-khì tsún-pī phang-liāu kah phang-iû. An-hioh-ji̍t, hiah-ê hū-jîn-lâng tsiàu lu̍t-huat ê kui-tīng hioh-khùn.