《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第八章

作者 巴克禮普世版小組 2013.11.24

Huān Kan-îm ê Tsa-bó͘-lâng
1 Tsìng-lâng lóng tńg-khì in tau, m̄-koh Iâ-so͘ khì Kan-ná-suaⁿ. 2 Keh-tńg tsá-khí thàu-tsá, Iâ-so͘ koh khì sìng-tiān, kûn-tsiòng lóng lâi I hia, I tsiū tsē lo̍h-lâi kā in kà-sī. 3 King-ha̍k-kàu-su kah Huat-lī-sài-phài ê lâng tshuā tsi̍t-ê tsa-bó͘-lâng lâi, i teh kiâⁿ kan-îm ê sî hō͘ lâng lia̍h-tio̍h. In hō͘ i khiā tī tiong-ng, 4 In tsiū tuì Iâ-so͘ kóng, "Lāu-su, tsit-ê tsa-bó͘-lâng sī tú-teh kiâⁿ kan-îm ê sî hō͘ lâng lia̍h-tio̍h. 5 Mô͘-se ê lu̍t-huat bīng-līng lán, tio̍h īng tsio̍h-thâu kā tsit-tsióng tsa-bó͘-lâng tìm-sí, taⁿ Lí siūⁿ án-tsuáⁿ?" 6 In kóng án-ne sī beh tshì-thàm Iâ-so͘, ài-beh tshuē khang-phāng kā I kò. Iâ-so͘ tsiū àⁿ lo̍h-khì, īng tsíng-thâu-á tī thô͘-kha siá-jī. 7 M̄-koh in it-ti̍t mn̄g bē suah. Iâ-so͘ tsiū khiā khí-lâi tuì in kóng, "Lín tiong-kan bô tsuē ê lâng thang sing īng tsio̍h-thâu kā i tìm." 8 Iâ-so͘ koh àⁿ lo̍h-khì, īng tsíng-thâu-á tī thô͘-kha siá-jī. 9 In thiaⁿ-tio̍h tsiah-ê uē liáu-āu, tuì lāu-ê kàu siàu-liân-ê, tsi̍t-ê tsi̍t-ê liu tshut-khì. Tshun Iâ-so͘ ka-kī tsi̍t-ê lâu tī hia. Hit-ê tsa-bo͘-lâng iû-guân khiā tī tiong-ng. 10 Iâ-so͘ khiā khí-lâi kā i kóng, "Tsa-bó͘-lâng ah, in hiah-ê lâng khì tī tó-uī? Bô-lâng kā lí tīng-tsuē sī-bô?" 11 Tsa-bó͘-lâng ìn kóng, "Sian-siⁿ ah, bô puàⁿ lâng." Iâ-so͘ kóng, "Guá mā bô beh kā lí tīng-tsuē, lí thang tńg-khì, taⁿ í-āu m̄-thang koh huān-tsuē."

Iâ-so͘ Sī Sè-kan ê Kng
12 Iâ-so͘ koh tuì kûn-tsiòng kóng, "Guá sī sè-kan ê kng. Tuè Guá ê lâng bô tī o͘-àm tiong sing-ua̍h, tian-tò ē ū ua̍h-miā ê kng." 13 Huat-lī-sài-phài ê lâng tsiū kā I kóng, "Lí teh uī ka-kī tsò kiàn-tsìng, Lí ê kiàn-tsìng bô hāu." 14 Iâ-so͘ ìn kóng, "Guá sui-jiân uī ka-kī tsò kiàn-tsìng, Guá ê kiàn-tsìng mā sī ū hāu, in-uī Guá tsai ka-kī tuì tó-uī lâi, beh khì tó-uī. Lín m̄-tsai Guá tuì tó-uī lâi, beh khì tó-uī. 15 Lín īng lâng ê phiau-tsún phuàⁿ-tuàn lâng. Guá bô kā lâng phuàⁿ-tuàn. 16 Guá nā phuàⁿ-tuàn lâng, Guá ê phuàⁿ-tuàn sī tsìng-khak ê, in-uī Guá m̄-sī ka-kī teh sím-phuàⁿ, sī tshe-phài Guá lâi ê Thiⁿ-Pē kah Guá tsò-hué sím-phuàⁿ. 17 Koh kóng tsiàu lín ê lu̍t-huat ê kì-tsài, Ū nn̄g lâng ê kiàn-tsìng tsiū ū hāu. 18 Guá uī ka-kī tsò kiàn-tsìng, tshe-phài Guá lâi ê Thiⁿ-Pē mā uī Guá tsò kiàn-tsìng." 19 In tsiū mn̄g Iâ-so͘ kóng, "Lí ê Thiⁿ-Pē tī tó-uī?" Iâ-so͘ ìn kóng, "Lín m̄-bat Guá, mā m̄-bat Guá ê Thiⁿ-Pē. Lín nā bat Guá, mā ē bat Guá ê Thiⁿ-Pē." 20 Iâ-so͘ tī sìng-tiān kà-sī lâng, tī hōng-hiàn-siuⁿ ê piⁿ-á kóng tsiah-ê uē, m̄-koh bô-lâng kā I lia̍h, in-uī I ê sî iáu-buē kàu. 21 Guá Beh Khì ê Só͘-tsāi Lín Bē-tàng Khì Iâ-so͘ koh kā in kóng, "Guá beh lī-khui à, lín ē tshuē Guá, m̄-koh lín ē uī-tio̍h ka-kī ê tsuē lâi sí. Guá khì ê só͘-tsāi, lín bē-tàng khì." 22 Hiah-ê Iû-thài-lâng kóng, "I kóng, ' Guá khì ê só͘-tsāi, lín bē-tàng khì.' Kám kóng I beh khì tsū-sat?" 23 Iâ-so͘ kā in kóng, "Lín sī tuì ē-bīn lâi, Guá sī tuì tíng-bīn lâi. Lín sī sio̍k tī tsit sè-kan, Guá bô sio̍k tsit sè-kan. 24 Só͘-í Guá tsiah kā lín kóng, lín ē uī-tio̍h ka-kī ê tsuē lâi sí, in-uī lín nā m̄ sìn Guá tsiū-sī Hit-uī, lín ē sí tī lín ê tsuē-ok tiong." 25 In tsiū mn̄g Iâ-so͘, " Lí sī siáⁿ-lâng?" Iâ-so͘ ìn kóng, "Guá tuì khí-thâu to̍h kā lín kóng kuè à. 26 Kuan-hē lín ê tāi-tsì, Guá ū tsin-tsē thang kóng, thang kā lín tīng-tsuē, m̄-koh tshe-phài Guá lâi Hit-uī sī tsin-si̍t. Guá kā tuì I só͘ thiaⁿ-tio̍h ê thuân hō͘ sè-kan-lâng." 27 In bô liáu-kái Iâ-so͘ tuì in kóng ê sī teh tsí Thiⁿ-Pē. 28 Só͘-í Iâ-so͘ kā in kóng, "Lín kú-khí Jîn-tsú ê sî, tsiū tsai Guá sī Hit-uī. Guá só͘ tsò ê tāi-tsì bô tsi̍t hāng sī tsiàu ka-kī ê ì-sù, lóng sī tsiàu Thiⁿ-Pē kà-sī Guá ê lâi kóng. 29 Tshe-phài Guá lâi Hit-uī kah Guá tông-tsāi, I bô pàng Guá ka-kī tsi̍t-ê tī-teh, in-uī Guá put-sî teh tsò I só͘ huaⁿ-hí ê tāi-tsì." 30 Iâ-so͘ kóng tsiah-ê uē ê sî, ū tsin-tsē lâng sìn I.

Tsū-iû ê Lâng kah Lô͘-lē
31 Iâ-so͘ tsiū tuì sìn I ê Iû-thài-lâng kóng, "Lín nā siông-siông tsun-siú Guá ê tō-lí, tsiū tsin-tsiàⁿ sī Guá ê bûn-tô͘. 32 Lín ē bat tsin-lí, tsin-lí ē hō͘ lín tit-tio̍h tsū-iû." 33 Hiah-ê lâng ìn I kóng, "Guán sī A-pik-la̍h-hán ê kiáⁿ-sun, tsiông-lâi m̄-bat tsò lâng ê lô͘-lē, lí ná-ē kóng, ' Lín ē tit-tio̍h tsū-iû?" 34 Iâ-so͘ ìn kóng, "Guá si̍t-tsāi kā lín kóng, huān-tsuē ê lâng tsiū-sī tsuē ê lô͘-lē. 35 Lô͘-lē bô íng-uán sio̍k tī tsú-lâng ê ka-tîng, kiáⁿ tsiū íng-uán sio̍k hit-ê ka-tîng. 36 Só͘-í Siōng-Tsú ê Kiáⁿ nā hō͘ lín tsū-iû, lín tsiū tsin-tsiàⁿ tsū-iû. 37 Guá tsai lín sī A-pik-la̍h-hán ê kiáⁿ-sun, m̄-koh lín siūⁿ-beh thâi guá, in-uī lín m̄ tsiap-siū Guá ê tō-lí. 38 Guá sī tsun-tsiàu Guá tuì Thiⁿ-Pē hia khuàⁿ-tio̍h ê lâi kóng. Lín sī tuì lín ê pē hia thiaⁿ-tio̍h ê lâi tsò."

39 Hiah-ê lâng ìn I kóng, "Guán ê tsó͘-sian sī A-pik-la̍h-hán." Iâ-so͘ kā in kóng, "Lín nā sī A-pik-la̍h-hán ê kiáⁿ-sun, lín ē tsò A-pik-la̍h-hán só͘ tsò ê tāi-tsì. 40 Taⁿ Guá tsiong tuì Siōng-Tsú só͘ thiaⁿ ê tsin-lí lâi kā lín kóng, lín suah beh thâi guá. A-pik-la̍h-hán pīng-bô tsò tsit khuán tāi-tsì. 41 Lín sī teh tsò lín ê pē só͘ tsò ê tāi-tsì." Hiah-ê lâng ìn kóng, "Guán m̄-sī put-gī ê kiáⁿ-jî. Siōng-Tsú sī guán î-it ê Thiⁿ-Pē." 42 Iâ-so͘ kā in kóng, "Siōng-Tsú nā tsin-tsiàⁿ sī lín ê Thiⁿ-Pē, lín ē thiàⁿ Guá, in-uī Guá sī tuì Siōng-Tsú hia lâi ê, tsit-má tī tsia. M̄-sī tsiàu Guá ka-kī ê ì-sù lâi, sī Siōng-Tsú tshe-phài Guá lâi-.ê. 43 Lín ná-ē bē bîng-pi̍k Guá ê uē? Sī in-uī Guá ê tō-lí lín thiaⁿ bē ji̍p-khì. 44 Lín ê pē sī Mô͘-kuí, lín kan-taⁿ siūⁿ-beh si̍t-hîng lín lāu-pē ê su-io̍k. I tsū khí-thâu to̍h sī thâi-lâng ê hiong-tshiú, bô tsun-siú tsin-lí, in-uī i sim-lāi bô tsin-lí. Kóng pe̍h-tsha̍t sī i ê pún-sìng, in-uī i sī kóng pe̍h-tsha̍t ê lâng, mā sī kóng pe̍h-tsha̍t ê lāu-pē. 45 In-uī guá kóng tsin-lí, lín m̄ sìn Guá. 46 Lín tiong-kan siáⁿ-lâng ē-tàng tsí-tsik Guá ū tsuē? Guá nā kóng tsin-lí, lín ná-ē m̄ sìn Guá? 47 Sio̍k Siōng-Tsú ê lâng thiaⁿ Siōng-Tsú ê uē. Lín m̄ thiaⁿ, in-uī lín m̄-sī sio̍k Siōng-Tsú ê lâng."

Iâ-so͘ kah A-pik-la̍h-hán 48 Hiah-ê Iû-thài-lâng ìn Iâ-so͘ kóng, "Guán kóng Lí sī Sat-má-lī-a-lâng, koh hō͘ siâ-sîn hū-sin, kám m̄-tio̍h?" 49 Iâ-so͘ ìn kóng, "Guá m̄-sī hō͘ siâ-sîn hū-sin, Guá sī tsun-kìng Guá ê Thiⁿ-Pē, m̄-koh lín tian-tó bú-jio̍k Guá. 50 Guá bô kiû ka-kī ê îng-kng. m̄-koh ū tsi̍t-ê teh thè Guá kiû koh tsò tsit-hāng tāi-tsì ê sím-phuàⁿ-tsiá. 51 Guá si̍t-tsāi kā lín kóng, Lâng nā tsun-siú Guá ê tō-lí, tsiū íng-uán bē sí." 52 Hiah-ê Iû-thài-lâng ìn kóng, "Taⁿ guán tsai Lí sī hō͘ siâ-sîn hū-sin, A-pik-la̍h-hán sí, tsìng sian-ti mā sí, m̄-koh Lí kóng, 'Lâng nā tsun-siú Guá ê tō-lí tsiū íng-uán bē sí!' 53 Lí kám ē pí guán ê tsó͘-sian A-pik-la̍h-hán khah uí-tāi? I í-king sí, tsìng sian-ti mā sí. Lí siūⁿ-kóng Lí sī siáⁿ-lâng?" 54 Iâ-so͘ ìn kóng, "Guá nā îng-kng ka-kī, guá ê îng-kng tsiū bô kè-ta̍t. Îng-kng Guá ê sī Guá ê Thiⁿ-Pē, tsiū-sī Hit-uī lín só͘ kóng ê sī lín ê Siōng-Tsú. 55 Lín m̄-bat I, m̄-koh Guá bat I. Guá nā kóng Guá m̄-bat I, Guá tsiū kah lín kāng-khuán sī pe̍h-tsha̍t, m̄-koh Guá bat I, mā tsun-siú I ê tō-lí. 56 Lín ê tsó͘-sian A-pik-la̍h-hán huaⁿ-hí teh thìng-hāu Guá lâi-lîm ê ji̍t-tsí, i ū khuàⁿ-tio̍h, khuàⁿ-liáu tsin huaⁿ-hí." 57 Hiah-ê Iû-thài-lâng tuì Iâ-so͘ kóng, "Lí iáu-buē gō͘-tsa̍p huè, kám bat khuàⁿ-tio̍h A-pik-la̍h-hán?" 58 Iâ-so͘ ìn kóng, "Guá si̍t-tsāi kā lín kóng, A-pik-la̍h-hán iáu-buē tshut-sì, Guá to̍h tsûn-tsāi." 59 Hiah-ê Iû-thài-lâng tsiū the̍h tsio̍h-thâu beh kā I tìm, m̄-koh Iâ-so͘ siám-khui, tuì sìng-tiān tshut-khì.