《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第九章

作者 巴克禮普世版小組 2013.12.01

Iâ-so͘ I-hó Tshut-sì To̍h Tsheⁿ-mê ê Lâng
1 Iâ-so͘ kiâⁿ kuè ê sî, khuàⁿ-tio̍h tsi̍t-ê tshut-sì to̍h tsheⁿ-mê-.ê. 2 I ê bûn-tô͘ mn̄g kóng, "Lāu-su, tsit-ê lâng tshut-sì to̍h tsheⁿ-mê, sī siáⁿ-lâng huān-tsuē? sī i pún-sin, á-sī i ê pē-bú?" 3 Iâ-so͘ ìn kóng, "Tsit-ê lâng bô huān-tsuē, i ê pē-bú mā bô. Sī beh thong-kuè i lâi hián-bîng Siōng-Tsú ê tsok-uî. 4 Thàn iáu ji̍t-sî, lán tio̍h tsò tshe-phài Guá lâi Hit-uī ê kang. Àm-sî tsi̍t-ē kàu, tsiū bô-lâng ē-tàng tsò-kang. 5 Guá tī sè-kan ê sî, sī sè-kan ê kng." 6 Tsiah-ê uē kóng-liáu, tsiū phuì nuā tī thô͘-kha, īng tshuì-nuā kiáu thô͘ lâi kô͘ tsheⁿ-mê lâng ê ba̍k-tsiu, kā i kóng, 7 " Khì Se-lô-a-tî sé lí ê ba̍k-tsiu." (Se-lô-a ê ì-sù sī " Hōng tshe-khián"). I tsiū khì sé, tńg-lâi ê sî í-king ē khuàⁿ-kìⁿ. 8 I ê tshù-piⁿ kah pîng-sî bat khuàⁿ-tio̍h i í-tsîng tsò khit-tsia̍h ê lâng kóng, "Tsit-ê kám m̄-sī put-sî tsē-teh tsò khit-tsia̍h hit-ê lâng?" 9 Ū-lâng kóng, "Tsiū-sī i." Ū-lâng kóng, "M̄-sī, kah-ná tshin-tshiūⁿ i." I ka-kī kóng, "Guá tsiū-sī." 10 Tsìng-lâng tsiū mn̄g i kóng, "Lí ê ba̍k-tsiu án-tsuáⁿ piàn ē khuàⁿ-kìⁿ?" 11 I ìn kóng, "Hit-ê miâ-kiò Iâ-so͘ ê lâng kiáu thô͘ kô͘ guá ê ba̍k-tsiu, kā guá kóng, "Khì Se-lô-a-tî sé." Guá suî-sî khì sé, tsiū piàn ē khuàⁿ-kìⁿ." 12 Tāi-ke mn̄g i kóng, "Hit lâng tī tó-uī?" I ìn kóng, "Guá m̄-tsai."

Huat-lī-sài-phài ê Lâng Tsit-mn̄g Hit-ê Tsheⁿ-mê ê Lâng
13 In tshuā hit-ê tsîng tsheⁿ-mê ê lâng khì kìⁿ Huat-lī-sài-phài ê lâng. 14 Iâ-so͘ kiáu thô͘ lâi khui i ê ba̍k-tsiu ê ji̍t sī An-hioh-ji̍t. 15 Só͘-í Huat-lī-sài-phài ê lâng koh mn̄g i ná-ē khuàⁿ-kìⁿ. I tsiū kā in kóng, "I tsiong thô͘-muê kô͘ guá ê ba̍k-tsiu, guá khì sé, tsiū ū khuàⁿ-kìⁿ. 16 Huat-lī-sài-phài ê lâng tiong-kan ū-ê kóng, "Tsit-ê lâng bô siú An-hioh-ji̍t, m̄-sī tuì Siōng-Tsú lâi." Ū-ê kóng, "Ū tsuē ê lâng ná-ē kiâⁿ tsit khuán sîn-jiah ?" In tsiū án-ne ì-kiàn hun-lia̍t. 17 In koh kā tsheⁿ-mê-.ê kóng, "I í-king khui lí ê ba̍k-tsiu, lí kóng I sī sím-mi̍h khuán lâng?" I ìn kóng, "I sī sian-ti." 18 Iû-thài-lâng m̄ sìn i tsîng tsheⁿ-mê, tsit-má ē koh khuàⁿ-kìⁿ. Tsiū kiò i ê pē-bú lâi, 19 mn̄g in kóng, "Tsit-ê sī lín kóng tshut-sì to̍h tsheⁿ-mê ê kiáⁿ sī-bô? Taⁿ i ná-ē ū khuàⁿ-kìⁿ?" 20 I ê pē-bú ìn kóng, "Guán tsai i sī guán ê kiáⁿ, guán mā tsai i tshut-sì to̍h tsheⁿ-mê. 21 Taⁿ i ná-ē koh ū khuàⁿ-kìⁿ, guán m̄-tsai. Siáⁿ-lâng khui i ê ba̍k-tsiu, guán mā m̄-tsai. I í-king tuā-hàn à, lín khì kā i mn̄g, i ē-hiáu ka-kī kóng." 22 I ê pē-bú án-ne kóng, sī in-uī kiaⁿ Iû-thài-lâng, in-uī Iû-thài-lâng í-king ū iok-sok hó-sè, nā ū-lâng jīn Iâ-so͘ tsò Ki-tok, tio̍h kā i tuì huē-tn̂g kuáⁿ tshut-khì. 23 Só͘-í i ê pē-bú kóng, "I í-king tuā-hàn à, thang khì mn̄g i ka-kī." 24 In tsiū koh kiò tsîng tsheⁿ-mê-.ê lâi mn̄g i kóng, "Tī Siōng-Tsú ê bīn-tsîng tio̍h tsiàu si̍t kóng, guán tsai hit-ê lâng sī ū tsuē ê lâng." 25 I ìn kóng, "I sī ū tsuē ê lâng á m̄-sī, guá m̄-tsai. Guá kan-taⁿ tsai tsi̍t-hāng tāi-tsì, tsîng guá tsheⁿ-mê, taⁿ guá ē khuàⁿ-kìⁿ." 26 In tsiū mn̄g i kóng, "Hit-ê lâng kā lí tsò sím-mi̍h? I án-tsuáⁿ khui lí ê ba̍k-tsiu?" 27 I ìn kóng, "Guá í-king kā lín kóng kuè, lín m̄ thiaⁿ, ná-ē beh koh thiaⁿ? Lín mā siūⁿ-beh tsò I ê bûn-tô͘ sī-bô?" 28 In tsiū kā i mē, kóng, "Lí tsiah sī hit-ê lâng ê bûn-tô͘, guán sī Mô͘-se ê bûn-tô͘. 29 Guán tsai Siōng-Tsú ū tuì Mô͘-se kóng-uē, m̄-koh tsit-ê lâng tuì tó-uī lâi, guán m̄-tsai." 30 Hit-ê lâng ìn kóng, "Tse to̍h tsin kî-kuài à, I i-hó guá ê ba̍k-tsiu, lín iáu-koh m̄-tsai I tuì tó-uī lâi. 31 Lán tsai Siōng-Tsú bô thiaⁿ tsuē-jîn ê kî-kiû, m̄-koh lâng nā kìng-pài Siōng-Tsú lâi tsun-hîng I ê tsí-ì, Siōng-Tsú tsiū ē thiaⁿ i ê kî-kiû. 32 Tuì kó͘-tsá í-lâi, m̄-bat thiaⁿ kuè ū-lâng hō͘ tshut-sì to̍h tsheⁿ-mê ê lâng ē koh khuàⁿ-kìⁿ. 33 Tsit-ê lâng nā m̄-sī tuì Siōng-Tsú hia lâi, bô khó-lîng tsò tsit khuán tāi-tsì." 34 In tsiū tuì i kóng, "Lí tshut-sì to̍h ū tsuē, tī tsuē-ok tiong tuā-hàn, tian-tò beh kà-sī guán?" In tsiū tuì huē-tn̂g kā i kuáⁿ tshut-khì.

Sim-lîng ê Tsheⁿ-mê
35 Iâ-so͘ thiaⁿ-tio̍h in kā i kuáⁿ tshut huē-tn̂g. Āu-lâi tshuē-tio̍h i, tsiū kā i mn̄g kóng, "Lí ū sìn Jîn-Tsú bô?" 36 I ìn kóng, "Sian-siⁿ ah, siáⁿ-lâng sī Jîn-tsú? Tshiáⁿ Lí kā guá kóng thang hō͘ guá sìn I?" 37 Iâ-so͘ kā i kóng, "Lí bat khuàⁿ-tio̍h I, tsit-má kah lí teh kóng-uē ê tsiū-sī." 38 I tsiū kóng, "Tsú ah, guá sìn." I tsiū kuī lo̍h-khì kā I pài. 39 Iâ-so͘ kóng, "Guá uī-tio̍h sím-phuàⁿ lîm-kàu tsit sè-kan, hō͘ bô khuàⁿ-kìⁿ ê lâng ē khuàⁿ-kìⁿ, mā hō͘ ū khuàⁿ-kìⁿ ê lâng piàn-tsò tsheⁿ-mê." 40 Tsi̍t-kuá Huat-lī-sài-phài ê lâng thiaⁿ-tio̍h tsiah-ê uē, tsiū mn̄g Iâ-so͘ kóng, "Tsóng bô guán mā sī tsheⁿ-mê sī-bô?" 41 Iâ-so͘ ìn kóng, "Lín nā tsheⁿ-mê, tsiū bô tsuē; taⁿ lín kóng, ' Guán ū khuàⁿ-kìⁿ.' Án-ne lín guân-tsāi ū tsuē."