《巴克禮普世版聖經(試讀本)》

| | | 轉寄

巴克禮普世版(試讀本)_馬太福音第六章

br>
1) Lín tio̍h kín-sīn, m̄-thang uī-tio̍h bueh hō͘ lâng khuàⁿ, kò͘-ì tī lâng ê bīn-tsîng tián lín ê kìng-khiân. Nā án-ne tsò, lín bē-tàng tit-tio̍h Thiⁿ-pē ê pò-siúⁿ.
2) Só͘-í lí tsín-tsè ê sî, m̄-thang tshin-tshiūⁿ ké-hó ê lâng tī huē-tn̂g kap kue-lō͘ pûn kó͘-tshue suan-thuân, ài hō͘ lâng o-ló. Guá si̍t-tsāi kā lín kóng, In í-king tit-tio̍h in ê pò-siúⁿ à.
3) Tsí-ū lí tsín-tsè ê sî, m̄-thang hō͘ lí ê tò-tshiú tsai lí ê tsiàⁿ-tshiú ê só͘ tsò;
4) hō͘ lí ê tsín-tsè ún-ba̍t; tsiū lí ê Pē, kàm-tshat tī ún-ba̍t ê, bueh pò-tap lí.
5) Lín kî-tó ê sî, m̄-thang tshin-tshiūⁿ ké-hó ê lâng; in-uī in ài khiā tī huē-tn̂g kap tuā kue-bīn ê uat-kak kî-tó, bueh hō͘ lâng khuàⁿ-tio̍h. Guá si̍t-tsāi kā lín kóng, In í-king siū-tio̍h in ê pò-siúⁿ à.
6) Tsí-ū lí kî-tó ê sî, tio̍h ji̍p lí ê ba̍t-pâng, kuaiⁿ mn̂g, kiû lí ê Pē, tiàm tī ún-ba̍t ê; tsiū lí ê Pē, kàm-tshat tī ún-ba̍t ê, bueh pò-tap lí.
7) Koh lín kî-tó ê sî, uē m̄-thang ta̍uh-ta̍uh tîng-hok, tshin-tshiūⁿ guā-pang lâng; in-uī in phah-sǹg kóng tsē-tsē uē, tsiah tit-tio̍h thiaⁿ-tio̍h.
8) Só͘-í lín m̄-thang o̍h in; in-uī lín bē kiû I ê tāi-sing, lín ê Pē í-king tsai lín só͘ khiàm-īng ê.
9) Só͘-í lín tio̍h án-ne kî-tó: Guán tī thiⁿ-tíng ê Pē, Guān lí ê miâ sìng.
10) Lí ê kok lîm-kàu. Lí ê tsí-ì tit tsiâⁿ, tī tē-ni̍h tshin-tshiūⁿ tī thiⁿ-tíng.
11) Guán ê ji̍t-si̍t, kin-á-ji̍t hō͘ guán.
12) Sià-bián guán ê ko͘-hū, tshin-tshiūⁿ guán iā ū sià-bián ko͘-hū guán ê lâng.
13) Bo̍h-tit tshuā guán ji̍p tī tshì, tio̍h kiù guán thuat-lī hit ê pháiⁿ-ê.
14) In-uī lín nā sià-bián lâng ê kè-sit, lín ê Thiⁿ Pē iā bueh sià-bián lín.
15) Lín nā bô sià-bián lâng ê kè-sit, lín ê Pē iā bô bueh sià-bián lín ê kè-sit.
16) Koh lín kìm-tsia̍h ê sî, m̄-thang tshin-tshiūⁿ ké-hó ê lâng tài iu-iông; in-uī in tsiong in ê bīn pìⁿ pháiⁿ khuàⁿ, bueh hō͘ lâng khuàⁿ-tio̍h in teh kìm-tsia̍h. Guá si̍t-tsāi kā lín kóng, In í-king siū-tio̍h in ê pò-siúⁿ à.
17) Tsí-ū lí kìm-tsia̍h ê sî, tio̍h buah lí ê thâu, sué lí ê bīn;
18) bô hō͘ lâng khuàⁿ-tio̍h lí teh kìm-tsia̍h, sī hō͘ lí tuà tī ún-ba̍t ê Pē khuàⁿ-tio̍h; tsiū lí ê Pē, kàm-tshat tī ún-ba̍t ê, bueh pò-tap lí.
19) M̄-thang uī-tio̍h ka-kī tsik-tsū tsâi-pó tī tē-ni̍h, ū thâng kap sian phah-pháiⁿ, iā ū tsha̍t iah khang thau-the̍h ê só͘-tsāi.
20) Tsí-ū uī-tio̍h ka-kī tsik-tsū tsâi-pó tī thiⁿ-tíng, thâng kap sian bô phah-pháiⁿ, iā bô tsha̍t iah khang thau-the̍h ê só͘-tsāi.
21) In-uī lín ê tsâi-pó tī hia, lín ê sim iā bueh tī hia.
22) Sing-khu ê ting tsiū-sī ba̍k-tsiu; lí ê ba̍k-tsiu nā kim, tsuân sing-khu tsiū kng.
23) Lí ê ba̍k-tsiu nā hue, tsuân sing-khu tsiū àm. Lí lāi-bīn ê kng nā àm, hit ê àm juā tuā ah!
24) Bô lâng uē ho̍k-sāi nn̄g ê tsú-lâng; in-uī i uē uàn-hūn tsit-ê, thiàⁿ hit-ê; á-sī uē tsun-tiōng tsit-ê, khuàⁿ-khin hit-ê; lín buē-uē ho̍k-sāi Siōng-tsú suà ho̍k-sāi tsîⁿ-tsâi.
25) Só͘-í guá kā lín kóng, Bo̍h-tit khuà-lū lín ê sìⁿ-miā bueh tsia̍h sím-mi̍h, bueh lim sím-mi̍h, á-sī lín ê sing-khu bueh tshīng sím-mi̍h. Lín ê sìⁿ-miā kiám bô khah tuā tī bí-niû, iā lín ê sing-khu kiám bô khah tuā tī i-tsiûⁿ mah?
26) Tshì-khuàⁿ thiⁿ-tiong ê pe-tsiáu, bô tsìng-tsoh, bô siu-sîng, bô tsik-tsū tī tshik-tshng, lín ê Thiⁿ Pē iā teh tshī in. Lín kiám bô pí hiah-ê khah kuì-khì mah?
27) Lín sím-mi̍h lâng uē īng khuà-lū hō͘ sìⁿ-miā khah tn̂g tsi̍t khik kú? 28 Siáⁿ-sū uī-tio̍h i-tsiûⁿ khuà-lū ah? Tshì-siūⁿ suaⁿ-ni̍h ê pik-ha̍p-hue, tsáiⁿ-iūⁿ tuā tsâng; in bô lô-khó͘, bô pháng tseh;
29) tān-sī guá kā lín kóng, tng Só͘-lô-bûn ki̍k hâng-ngó͘ ê sî, i só͘ tshīng ê m̄ ta̍t-tio̍h tsit tsióng hue ê tsi̍t luí.
30) Taⁿ suaⁿ-ni̍h ê tsháu, kin-á-ji̍t tī-teh, bîn-á-ji̍t hiat tī hué-lô͘, Siōng-tsú hō͘ i tshīng kàu án-ne, hô-hòng lín, sió-sìn ê lâng ah?
31) Só͘-í m̄-thang khuà-lū kóng, Guán bueh tsia̍h sím-mi̍h? Bueh lim sím-mi̍h? Bueh tshīng sím-mi̍h?
32) In-uī tsiah-ê lóng sī guā-pang lâng só͘ kiû ê; lín ê Thiⁿ Pē iā tsai tsiah-ê lóng sī lín khiàm-īng ê.
33) Tsí-ū tāi-sing kiû I ê kok kap I ê gī, tsiū tsiah-ê mi̍h lóng bueh suà hō͘ lín.
34) Só͘-í m̄-thang uī-tio̍h bîn-á-ji̍t khuà-lū; in-uī hit ê bîn-á-ji̍t, i bueh ka-kī khuà-lū. Tsi̍t ji̍t ê kan-khó͘ tī tsi̍t ji̍t kàu-gia̍h.