《巴克禮普世版聖經（試讀本）》

 | | | 轉寄

巴克禮普世版（試讀本） 約翰福音第二十章

作者 巴克禮普世版小組 2014.02.16

Khang-khang ê Bōng (Mt 28:1-8; Mk 16:1-8; Lk 24:1-12)
1 Tshit ji̍t ê thâu tsi̍t-ji̍t thàu-tsá, thiⁿ iáu-buē kng, Bua̍t-tāi-lia̍p ê Má-lī-a lâi-kàu bōng-tē, khuàⁿ-tio̍h bōng-kháu ê tsio̍h í-king suá-khui. 2 I tsiū tsáu-khì tshuē Se-bûn Pí-tik kah hit-ê Iâ-so͘ só͘ thiàⁿ ê bûn-tô͘, kā in kóng, "Ū-lâng tsiong Tsú tuì bōng-ni̍h suá-tsáu, guán m̄-tsai in kā I hē tī tó-uī." 3 Pí-tik kah hit-ê bûn-tô͘ tsiū khì bōng-tē. 4 Nn̄g lâng tsò-hué tsáu, hit-ê bûn-tô͘ tsáu khah kín, sing kàu bōng-tē. 5 I àⁿ lo̍h-khì khuàⁿ bōng-lāi, khuàⁿ-tio̍h iù-tē-pò͘ hē tī hia, m̄-koh i bô ji̍p-khì. 6 Se-bûn Pí-tik tuè-āu kàu, ji̍p-khì bōng-lāi, khuàⁿ-tio̍h iù-tē-pò͘ hē tī hia. 7 I koh khuàⁿ-tio̍h pau Iâ-so͘ thâu-khak ê kin, bô kah iù-tē-pò͘ hē tsò-hué, kńg teh līng-guā hē. 8 Hit sî hit-ê tāi-sing kàu bōng-tē ê bûn-tô͘ mā ji̍p-khì, khuàⁿ liáu tsiū siong-sìn. 9 In-uī in iáu-buē liáu-kái Sìng-king ê uē, kóng Iâ-so͘ it-tīng tio̍h tuì sí-lâng tiong koh-ua̍h. 10 Jiân-āu, in nn̄g lâng tsiū tńg-khì in tau.

Iâ-so͘ Tuì Bua̍t-tāi-lia̍p ê Má-lī-a Hián-hiān (Mt 28:9-10; Mk 16:9-11)
11 Má-lī-a khiā tī bōng-guā teh thî-khàu. I ná khàu ná àⁿ lo̍h-khì khuàⁿ bōng-lāi. 12 I khuàⁿ-tio̍h nn̄g-ê tshīng pe̍h-saⁿ ê thiⁿ-sài, tsē tī guân-lâi hē Iâ-so͘ sin-si ê só͘-tsāi, tsi̍t-ê tī thâu tsit-pîng, tsi̍t-ê tī kha hit-pîng. 13 Thiⁿ-sài kā i kóng, "Hū-jîn-lâng ah, ná-ē teh khàu?" I ìn kóng, "Ū-lâng kā guá ê Tsú suá tsáu, guá m̄-tsai in kā I hē tī sím-mi̍h só͘-tsāi." 14 Tsiah-ê uē kóng suah, Má-lī-a uat tńg-sin, khuàⁿ-tio̍h Iâ-so͘ khiā tī hia, m̄-koh jīn bē tshut I sī Iâ-so͘. 15 Iâ-so͘ kā i kóng, "Hū-jîn-lâng ah, ná-ē teh khàu? Lí teh tshuē siáⁿ-lâng?" Má-lī-a siūⁿ-kóng I sī kò͘ hn̂g ê lâng, tsiū ìn kóng, "Thâu-ke ah, lí nā ū kā I suá tsáu, tshiáⁿ kā guá kóng lí kā I hē tī sím-mi̍h só͘-tsāi, guá thang lâi-khì kā I siu tńg-lâi." 16 Iâ-so͘ kiò tsi̍t siaⁿ " Má-lī-a ah." I tsiū ua̍t tńg-sin, īng Hi-pik-lâi-uē kóng, "Lia̍p-pho-nî!" Ì-sù tsiū-sī " Lāu-su". 17 Iâ-so͘ kā i kóng, "M̄-thang bong Guá, in-uī Guá iáu-buē tsiūⁿ-thiⁿ khì Thiⁿ-Pē hia. Lí tio̍h khì tshuē Guá ê hiaⁿ-tī kā in kóng, "Guá tsiūⁿ-thiⁿ khì Guá ê Thiⁿ-Pē hia, mā sī lín ê Thiⁿ-Pē hia, khì Guá ê Siōng-Tsú hia, mā sī lín ê Siōng-Tsú hia." 18 Bua̍t-tāi-lia̍p ê Má-lī-a tsiū khì kā bûn-tô͘ kóng, "Guá í-king khuàⁿ-tio̍h Tsú à." Koh kóng Tsú ū kā i kóng hiah-ê uē.

Iâ-so͘ Tuì Bûn-tô͘ Hián-hiān (Mt 28:16-20; Mk 16:14-18; Lk 24:36-49))
19 Hit ji̍t tsiū-sī tshit ji̍t ê thâu tsi̍t-ji̍t ê àm-sî, bûn-tô͘ in-uī kiaⁿ Iû-thài-lâng, tsiū tī in tuà ê só͘-tsāi kā mn̂g kuaiⁿ teh. Iâ-so͘ lâi-kàu in tiong-kan kā in kóng, "Guān lín pîng-an!" 20 Tsiah-ê uē kóng liáu, Iâ-so͘ tsiū tsiong tshiú kah hing-khám-piⁿ hō͘ in khuàⁿ. Bûn-tô͘ khuàⁿ-tio̍h Tsú, tsin huaⁿ-hí. 21 Iâ-so͘ koh kā in kóng, "Guān lín pîng-an! Tshin-tshiūⁿ Thiⁿ-Pē ū tshe-phài Guá, Guá mā beh tshe-phài lín." 22 Iâ-so͘ kóng suah, tsiū tuì in pûn khuì, kóng, "Lín niá-siū Sìng-Sîn. 23 Lín sià-bián siáⁿ-lâng ê tsuē, in tsiū tit-tio̍h sià-bián. Lín nā bô sià-bián lâng ê tsuē, in tsiū bē tit-tio̍h sià-bián. 24 Iâ-so͘ Tuì To-má Hián-hiān To-má, mā kiò-tsò Té-thó͘-má( siang-seⁿ-á ê ì-sù), sī tsa̍p-jī bûn-tô͘ ê tsi̍t-ê, Iâ-so͘ kàu ê sî, i bô tsò-hué tī hia. 25 Kî-tha ê bûn-tô͘ tsiū kā i kóng, "Guán í-king ū khuàⁿ-tio̍h Tsú à." M̄-koh To-má kā in kóng, "Guá nā bô khuàⁿ-tio̍h I tshiú-tiong ê ting-jiah, bô īng tsíng-thâu-á bong hit-ê ting-jiah, bô īng tshiú bong I ê hing-khám-piⁿ, guá tsua̍t-tuì m̄ siong-sìn." 26 Tsi̍t lé-pài āu, bûn-tô͘ koh-tsài tsū-tsi̍p tī tshù-lāi, To-má mā tsò-hué tī hia. Mn̂g kuaiⁿ khí-lâi, Iâ-so͘ tsiū kàu, khiā tī in tiong-ng, kóng, "Guān lín pîng-an!" 27 Iâ-so͘ kā To-má kóng, "Tshun tsíng-thâu-á lâi bong Guá ê tshiú, tshun tshiú lâi bong Guá ê hing-khám-piⁿ. M̄-thang bô sìn, tio̍h siong-sìn." 28 To-má ìn kóng, "Guá ê Tsú ah, Guá ê Siōng-Tsú ah." 29 Iâ-so͘ kā i kóng, "Lí khuàⁿ-tio̍h Guá tsiah siong-sìn. Hiah-ê bô khuàⁿ-tio̍h to lâi sìn ê lâng tsin ū hok-khì."

Tsit Pún Tsheh ê Bo̍k-tik
30 Iâ-so͘ tī bûn-tô͘ ê bīn-tsîng ū koh kiâⁿ tsin-tsē sîn-jiah, bô kì tī tsit pún tsheh. 31 Kì-tsài tsiah-ê tāi-tsì sī beh hō͘ lín sìn Iâ-so͘ sī Ki-tok, sī Siōng-Tsú ê Kiáⁿ, koh hō͘ lín thong-kuè sìn, khò I ê miâ lâi tit-tio̍h ua̍h-miā.