《雙文開講》

 | | | 轉寄

沒人beh 學烏手

作者 Ông Tsiau-bûn 2005.12.11

出對工作上ê需要，我有一台中古車。我對機械[一竅不通]，個性又koh pîn-tuāⁿ，beh hō͘車維持良好狀況，全依賴汽車保養廠ê照顧。Ē-tàng tshuē-tio̍h一個技術精良koh細膩，buē kā人亂騙ê保養廠，實在是ài大聲huah講：「感謝上帝！」

我tshuē-tio̍h ê保養廠頭家是一個真難得ê好師傅，做人實在，無ài講話，真恬，bē曉推銷家己，對家己ê專業真有自信，而且追求新知識真phah拚。伊專門處理冷門ê歐洲車系，tī這總ē-tàng看tio̍h一kuá平常街路頂無常看tio̍h ê車種。保養廠規模不大，常常khǹg滿等beh修理ê車，koh khah無閒，場地lóng會收拾kah真整潔，真hō͘人佩服。

每pái車送修，lóng感覺ná親像去看醫生。先問診(是啥物毛病)，然後就進行檢查kap診斷，續落來進行治療(該換什麼、修什麼)。有可能是tsit位頭家ê專業態度，hō͘我特別有tsit種感覺。人o-ló醫生講「視病猶親」，我仝款也感受tio̍h tsit位頭家對我ê車ê關心kap責任感。一個好ê家庭醫生kap一個好ê保養廠頭家，tī現代人ê生活中，lóng是幸福ê要件pah。

今á日車去做定期保養。少年ê司á(學徒)無tī-teh，頭家一個人無閒。Hit位人客真o-ló ê學徒，學無到一年，就決定放棄tsit-ê行業。我問，為什麼án- ne？頭家娘講，司á薪水低，加上頭家tī工作上ê要求khah嚴，伊可能感覺壓力大、厭倦pah。伊講，司á真páiⁿ tshuē，無人beh學烏手，少年人寧可做送貨員或是店員，無to繼續求學，真少人願意下工夫學一門技術。

照我對tsit位頭家ê了解，伊是bē苛薄人，但是一定會是一個要求嚴格ê老師。我一直真欽佩伊做事細膩、認真，hit種敬業ê態度，是台灣社會漸漸消失ê美德之一。做tsit種人ê司á當然是辛苦ê，但是若忍耐得過，所得tio̍h ê專業能力應該是真好ê。我為hit位少年人感覺到可惜。

另一方面，tuì tsit-ê tāi-tsì也hō͘我想tio̍h，目前技術人員ê訓練kap考驗，已經tuì傳統ê師徒制轉向技職教育、證照制度ê搭配。我教過ê技術學院，就有汽車修理系。但是大學程度ê汽修科畢業生，tī技術上真正比會過七年經驗ê烏手學徒mah？通過證照考試，kám to̍h有獨當一面實際操作ê能力mah？tī tsit種新ê技職系統形成ê時，kah-ná也排除一kuá有經驗、技術磨練得真好ê技師進一步發展ê機會。

汽車進步ê日新月異，hō͘小規模ê家庭工廠式汽修廠面臨危機。大廠有koh-khah精密ê電腦儀器、koh-khah有效率ê流程、koh-khah低ê零件成本等等條件，人事方面應該也較有制度，所以對汽車有興趣ê少年人，會行向tsit-pîng就業pah。小汽車保養廠勤懇工作、自我剝削ê烏手頭家，kám bē被逼去大車廠吃頭路、甚至失業？

若看病愛tshuē老醫師，汽車ê保養照顧我也iáu是歡喜tshuē一個關心tsit台車、了解tsit台車ê人。希望iáu是有少年人願意認真研究所歡喜ê汽車，願意接受嚴格訓練，做一個優秀ê烏手。也希望師徒制kap一人工廠漸漸稀微ê時，技術精良、工作認真ê技師也有出頭天ê機會。