《押韻啟應詩篇》

 | | | 轉寄

台語押韻啟應詩篇 3

作者 Tīⁿ Jî-gio̍k 2006.01.15

　Tāi-pi̍t siám-pī i ê kiáⁿ Ap-sa-liông ê sî, lâi tsuè ê si.

1a　Iâ-hô-hua ah, guá ê tuì-ti̍k tsiah-ni̍h tsē !
　　耶和華　啊，我　的對　敵　這　麼　多！
1b　　　Tsuē-tsuē lâng khí-lâi kong-kik guá bô thè.
　　　　多　多　人　起　來　攻　擊　我　無　退。

2a　Tsuē-tsuē lâng gī-lūn guá lâi káng-kiù,
　　多　多　人　議　論　我　來　講　究，
2b　I kiám uē-tit-thang tit-tio̍h Siōng-tè ê tsín-kiù.
　　他豈　會得　通　得　到　上　帝　的拯　救。

3a　Tsóng-sī, Iâ-hô-hua, Lí sī guá sì -uî ê tîn-pâi;
　　總　是，耶和華，您　是　我　四　圍　的盾　牌；
3b　　　Sī guá ê îng-kng; koh sī hō͘ guá ê thâu kia̍h-kuân lâi khiā-tsāi.
　　　　是　我　的榮　光；又　是使　我　的頭　舉　高　來　立　在。

4a　Guá īng guá ê siaⁿ kiû-kiò Iâ-hô-hua,
　　我　用　我　的聲　求　叫　耶和華，
4b　　　I tuì I ê sìng-suaⁿ ìn guá.
　　　　祂從　祂的聖　山　應　我。

5a　Guá tó--teh, guá khùn, guá tsing-sîn,
　　我　倒　在，我　睡，我　精　神，
5b　　　In-uī Iâ-hô-hua lóng pó-hō͘ guá kín-kín.
　　　　因為　耶和華　攏　保　護　我　緊　緊。

6a　Sui-jiân tshing-bān lâng khí-lâi hán-huah, uî-luî kong-kik guá,
　　雖　然　千　萬　人　起　來　喊　喝，圍壘　攻　擊　我，
6b　　　Guá ia̍h bô kiaⁿ bô iô-tsuah.
　　　　我　亦　無驚　無　搖泏。

7a　Iâ-hô-hua ah, kiû Lí khí--lâi ;
　　耶和華　啊，求　您　起　來；
7b　　　Guá ê Siōng-tè ah, kiû Lí tsín-kiù guá khiā-tsāi,
　　　　我　的上　帝　啊，求　您拯　救　我　站　在，

7c　In-uī Lí siàn guá it-tshè tuì-ti̍k ê tshuì-phué,
　　因為　您搧　我　一切　對　敵　的嘴　頰，
7d　　　Phah-tsi̍h pháiⁿ-lâng ê tshuì-khí tsok-huè.
　　　　打　折　歹　人　的嘴　齒　作　廢。

8a　Tsín-kiù sio̍k-tī Iâ-hô-hua;
　　拯　救　屬　在　耶和華；
8b　　　Guān Lí sù-hok Lí ê peh-sìⁿ bô suah.
　　　　願　您　賜福　您的百　姓　無　息。