《押韻啟應詩篇》

台語押韻啟應詩篇 45

作者 Tīnn Jî-gio̍k

45　　Khó-la̍h hōo-è kà-sī ê si, koh sī ài-bōo ê kua, kau hōo Ga̍k-kuann, tiāu, sī īng “Pik-ha̍p-hue.”

1a　Gúa ê sim tshìng-tshut hó ê ūe ,
　　我 的 心 凊 出 好 的 話，

　　gúa kóng-khí gúa ūi-tio̍h ông sóo tsùe,
　　我 講 起 我 為 著 王 所 做，

1b　　　Gúa ê tsi̍h sī bín-tsia̍t ê lâng ê pit-u̍eh.
　　　　我 的 舌 是 敏 捷 的 人 的 筆 劃。

2a　Lí pí sè-kan lâng khah hó-khùann,
　　你 比 世 間 人 較 好 看，

2b　　　Tī lí ê tshùi ū un-hūi múa-múa,
　　　　在 你 的 嘴 有 恩 惠 滿 滿，

2c　Sóo -í Siōng-tè sù-hok teh kuan-khùann,
　　所 以 上 帝 賜 福 在 觀 看 ，

2d　　　Ti̍t-kàu íng-úan bô piàn-ūann.
　　　　直 到 永 遠 沒 變 換。

3a　Tūa kûan-lîng--ê ah , lí tio̍h pē kiàm tī io--ni̍h,
　　大 權 能 者 啊，你 當 背 劍 在 腰 裡，

3b　　　Hián-tshut lí ê îng-kng kap ui-giâm tī sin--ni̍h.
　　　　顯 出 你 的 榮 光 及 威 嚴 在 身 裡。

4a　Koh tī ui-giâm ê sî ,
　　又 在 威 嚴 的 時，

4b　　　Ūi-tio̍h tsin-lí , khiam-pi , kong-gī ,
　　　　為 著 真 理、謙 卑、 公 義，

4c　Lí tsē-tshia tsìn-tsîng khì,
　　你 坐 車 進 前 去，

4d　　　Bô m̄ sìng-lī ,
　　　　無 不 勝 利，

4e　Lí ê tsiànn-tshiú beh tsùe thang kiann ê tāi-tsì,
　　你 的 右 手 要 做 通 驚 的 代 誌，

4f　　　Thang hōo lí khùann-kìnn.
　　　　通 讓 你 看 見。

5a　Lí ê tsìnn-bah tsin lāi koh kim-kim,
　　你 的 箭 肉 真 利 又 金 金，

　　siā-tio̍h ông ê tùi-ti̍k ê sim,
　　射 著 王 的 對 敵 的 心，

5b　　　Lia̍t-pang tó tī lí ê ē-bīn siong tsin tshim.
　　　　列 邦 倒 在 你的 下面 傷 真 深。

6a　Siōng-tè siúnn-sù lí ê pó-tsō, sī íng-íng bô thîng,
　　上 帝 賞 賜 你 的 寶 座，是 永 永 沒 停，

6b　　　Lí ê kok ê kûan-pìng sī tsìng-ti̍t ê kûan-pìng.
　　　　你 的 國 的 權 柄 是 正 直 的 權 柄。

7a　Lí ùan-hūn put-huat huann-hí kong-gī ,
　　你 怨 恨 不 法 歡 喜 公 義，

7b　　　Sóo-í Siōng-tè, lí ê Siōng-tè , īng huann-hí ê iû buah lí ,
　　　　所以 上 帝, 你的 上 帝，用 歡 喜 的 油 抹 你，

　　　　iânn-kè lí tsiah-ê ông-phūann bô pí .
　　　　贏 過 你 這 些 王 伴 沒 比。

8a　Lí ê i -tsiûnn lóng ū bu̍t-io̍h, tîm-hiunn, jio̍k-kùi ê phang-bī ,
　　你 的 衣 裳 攏 有 沒 藥，沉 香， 肉 桂 的 香 味，

8b　　　Tùi tshiūnn-gê ê ông-kiong, ū si-hiân ê ga̍k-khì hōo lí huann-hí .
　　　　對 象 牙 的 王 宮， 有 絲 弦 的 樂 器 讓 你 歡 喜。

9a　Ū ông ê tsa-bóo-kiánn tī lí tsun-kùi hū-lú ê tiong-kan,
　　有 王 的 查 某 子 在 你 尊 貴 婦 女 的 中 間，

9b　　　Ông-hōo īng Gô-hui ê kim tsng-thānn,
　　　　王 后 用 俄 斐 的 金 裝 飾，

　　　　khiā tī lí ê tsiànn-pîng tshíng-an .
　　　　站 在 你 的 右 傍 請 安。

10a　Tsa-bóo-gín-á ah, lí tio̍h thiann,
　　　查 某 囝 子 啊，你 著 聽，

10b　　　Tio̍h ànn hī-khang lâi thiann.
　　　　　著 俯 耳 孔 來 聽。

10c　Tio̍h khùann i ,
　　　著 看 他，

10d　　　M̄-thang kì-tit lí ê peh-sìnn, kap lāu-pē ê sin-pinn.
　　　　　不 通 記 得 你的 百 姓，和 老 父 的 身 邊。

11a　Ông tsiū beh him-bōo lí ê súi,
　　　王 就 要 欣 慕 你 的 美，

11b　　　In -ūi i sī lí ê tsú, lí tio̍h kun-sûi .
　　　　　因 為 他 是 你 的 主，你 著 跟 隨。

12a　Tshui-lô ê peh-sìnn beh lâi sàng lé-mi̍h kui tùn,
　　　推 羅 的 百 姓 要 來 送 禮 物 歸 噸，

12b　　　Peh-sìnn-tiong ê hó-gia̍h-lâng beh tùi lí kiû un .
　　　　　百 姓 中 的 好 額 人 要 對 你 求 恩。

13a　Ông ê tsa-bóo-kiánn tī ông-kiong-lāi, ki̍k-kî îng-hûa,
　　　王 的 查 某 子 在 王 宮 內，極 其 榮 華，

13b　　　I ê i- ho̍k sóo siù--ê , sī īng kim-sùann.
　　　　　她 的 衣 服 所 鏽 的，是 用 金 線。

14a　I beh tshīng siù-hue ê i- ho̍k, siū tshūa kàu ông ê bīn-tsîng,
　　　她要 穿 鏽 花 的衣 服，受 導 到 王 的 面 前 ，

14b　　　Tsùe-phūann kun-sûi i ê tsāi-sik-lú ū hok,
　　　　　作 伴 跟 隨 她 的 在 室 女 有 福，

　　　　ia̍h beh siū tshūa kàu lí ê bīn-tsîng,
　　　　　亦 要 受 領 到 你 的 面 前，

15a　In beh huann-hí khùai-lo̍k siū ín-tshūa,
　　　伊 要 歡 喜 快 樂 受 引 導，

15b　　　In beh tsìn-ji̍p ông-kiong tī hia tùa.
　　　　　伊 要 進 入 王 宮 在 彼 住。

16a　Lí ê kiánn-sun beh sùa-tsiap lí ê lia̍t-tsóo hing-ōng,
　　　你 的 子 孫 要 續 接 你 的 列 祖 興 旺，

16b　　　Lí beh siat-li̍p in tī tsûan-tūe tsùe ông.
　　　　　你 要 設 立 伊 在 全 地 作 王。

17a　Gúa beh hōo lí ê miâ tī bān-tāi hōo lâng kì-liām i ,
　　　我 要 使 你 的 名 在 萬 代 讓 人 記 念 它，

17b　　　Sóo -í bān peh-sìnn beh íng-íng úan-úan kám-siā lí .
　　　　　所 以 萬 百 姓 要 永 永 遠 遠 感 謝 你。