《押韻啟應詩篇》

台語押韻啟應詩篇 46

作者 Tīnn Jî-gio̍k

46　　Khó-la̍h hōo-è ê si, kau hōo Ga̍k-kuann; tiāu, sī īng lú-im.

1a　Siōng-tè sī gúan tô-siám ê sóo-tsāi kap khùi-la̍t,
　　上 帝 是 阮 逃 閃 的 所 在 及 氣 力，

1b　　　Ia̍h sī hūan-lān tiong ki̍p-sî pang-tsān ê tshiú-la̍t .
　　　　亦 是 患 難 中 及 時 幫 助 的 手 力。

2a　Sóo -í tūe sui-jiân piàn-tshian,
　　所 以 地 雖 然 變 遷 ，

2b　　　Suann sui-jiân iô-tāng kàu hái-tiong tshim-ian,
　　　　山 雖 然 搖 動 到 海 中 深 淵，

3a　Kî-tiong ê tsúi sui-jiân hua-hua-háu giâ-íng,
　　其 中 的 水 雖 然 嘩 嘩 吼 夯 浪，

3b　　　Suann sui-jiân in-ūi hái-tiòng iô-tsuah teh beh píng,
　　　　山 雖 然 因 為 海 漲 搖 泏 在 要 反，

　　　　gúan ia̍h bô kiann tsīng-tsīng.
　　　　阮 亦 無 驚 靜 靜。

4a　Ū tsi̍t tiâu hô súi bô pí ,
　　有 一 條 河 美 無 比，

　　i ê khui-tshe hōo Siōng-tè ê siânn huann-hí ,
　　它的 開 叉 使 上 帝 的 城 歡 喜，

4b　　　Tsiū-sī sìng ê tūe-tsí, Tsì-kûan--ê teh khiā-khí.
　　　　就 是 聖 的 地 址， 至 高 者 在 居 起。

5a　Siōng-tè tī hit tiong-kan,
　　上 帝 在 彼 中 間，

5b　　　Siânn tik-khak būe iô-tāng pîng-an,
　　　　城 的 確 未 搖 動 平 安，

5c　Thinn phú- kng,
　　天 曙 光，

5d　　　Siōng-tè beh pang-tsān i tit îng-kng.
　　　　上 帝 要 幫 助 它 得 榮 光。

6a　Ī -pang hūa-hūa-háu,
　　異 邦 嘩 嘩 吼，

6b　　　Lia̍t-kok iô-tāng lâi tsáu,
　　　　列 國 搖 動 來 走，

6c　Siōng-tè tshut I ê siann,
　　上 帝 出 祂 的 聲，

6d　　　Tūe tsiū siau-iûnn tio̍h-kiann.
　　　　地 就 消 溶 著 驚。

7a　Bān-kun ê Iâ-hô-hua kap gúan tī--teh tsiū tsū-tsāi,
　　萬 軍 的 耶 和 華 與 阮 在 的 就 自 在，

7b　　　Ngá-kok ê Siōng-tè tsùe gúan ê kûan-tâi .
　　　　雅 各 的 上 帝 做 阮 的 高 台。

8a　Lâi ah , lâi khùann Iâ-hô-hua ê sóo tsùe,
　　來 啊， 來 看 耶 和 華 的 所 作，

8b　　　Khùann I hōo tūe kàu tsáinn-iūnn hong-hùe.
　　　　看 祂 使 地 到 怎 樣 荒 廢。

9a　I hōo kau-tsiàn suah, kàu tī tūe-ki̍k,
　　祂 使 交 戰 息， 到 在 地 極，

9b　　　I at-tsi̍h king bia̍t tùi-ti̍k,
　　　　祂 揭 折 弓 滅 對 敵，

9c　Tsām-tn̄g tshiunn hōo i bô lōo- iōng,
　　斬 斷 槍 使 它 無 路 用，

9d　　　Tsiong tsiàn-tshia sio tī hé-tiong.
　　　　將 戰 車 燒 在 火 中。

10a　Lín tio̍h tiānn-tiānn, tio̍h tsai Siōng-tè sī Gúa;
　　　恁 著 定 定 ， 著 知 上 帝 是 我；

10b　　　Gúa beh tī lia̍t-pang tiong tsùe kûan-tūa, siū tsun tsùe tūa,
　　　　　我 要 在 列 邦 中 做 高 大，受 尊 做 大，

11a　Bān-kun ê Iâ-hô-hua kap gúan tī--teh tsiū tsū-tsāi,
　　　萬 軍 的 耶 和 華 與 阮 在 的 就 自 在，

11b　　　Ngá-kok ê Siōng-tè tsùe gúan ê kûan-tâi .
　　　　　雅 各 的 上 帝 做 阮 的 高 台。