《押韻啟應詩篇》

台語押韻啟應詩篇 51

作者 Tīnn Jî-gio̍k

51　　Tāi-pi̍t kap Pu̍at-sī-pa tâng-pâng í-āu, Sian-ti Ná-tan lâi kìnn i.　　　　I tsùe tsit-ê si kau hōo Ga̍k-kuann.

1a　Siōng-tè ah , tsiàu Lí ê tsû-ài lîn-bín gúa,
　　上 帝 啊，照 你 的 慈 愛 憐 憫 我，

1b　　　Tsiàu Lí hong-sīng ê tsû-pi tshat-siau gúa ê tsūe-kùa.
　　　　照 你 豐 盛 的 慈 悲 擦 消 我 的 罪 過。

2a　Tsiong gúa ê tsūe-ok it-tsīn súe-tû ,
　　將　　我 的 罪 惡 一 盡 洗 除，

2b　　　Ia̍h súe-tshing gúa kàu bô sū .
　　　　亦 洗 清 我 到 無 事。

3a　In-ūi gúa ka-kī tsai gúa ê kè-sit,
　　因 為 我 自 己 知 我 的 過 失，

3b　　　Gúa ê tsūe siông-siông sī gúa bīn-tsîng ê hiān-si̍t .
　　　　我 的 罪 常 常 是 我 面 前 的 現 實。

4a　Gúa sóo hūan-tio̍h--ê , tsiū-sī tik-tsūe Lí nā-tiānn,
　　我 所 犯 著 的，就 是 得 罪 你 若 定 ，

4b　　　Tī Lí ê ba̍k-tsiu tsîng tsùe tsit-hō pháinn àn-kiānn.
　　　　在 你 的 目 珠 前 做 此 號 歹 案 件。

5a　Tì-kàu Lí kóng-ūe ê sî , hián-bîng tsùe gī .
　　致 到 你 講 話 的 時，顯 明 做 義。

5b　　　Phùann-tùan ê sî , hián-bîng kong-tō lí -khì.
　　　　判 斷 的 時，顯 明 公 道 理 氣。

6a　Gúa sī tī tsūe-ok tiong sinn ê tsūe-jîn,
　　我 是 在 罪 惡 中 生 的 罪 人，

6b　　　Tī tsūe ê tiong-kan, gúa ê lāu-bú lâi hûai-īn .
　　　　在 罪 的 中 間， 我 的 老 母 來 懷 孕。

7a　Lí ài lâng sim-lāi sîng-si̍t lâi thóo-khùi,
　　你 要 人 心 內 誠 實 來 嘆 氣 ，

7b　　　Tī gúa ê pak-lāi , Lí beh hōo gúa tit-tio̍h tì-hūi.
　　　　在 我 的 腹 內， 你 必 給 我 得 著 智 慧。

8a　Kiû Lí īng giû-tshik-tsháu súe gúa,
　　求 你 用 牛 膝 草 洗 我，

8b　　　Gúa tsiū tshing-khì bô tsūe-kùa.
　　　　我 就 清 氣 無 罪 過。

9a　Kiû Lí súe gúa ná sng-seh,
　　求 你 洗 我 若 霜 雪，

9b　　　Gúa tsiū pí seh khah pe̍h.
　　　　我 就 比 雪 較 白。

10a　Kiû Lí hōo gúa tit-tio̍h thiann-kìnn huann-hí khùai-lo̍k ê siann,
　　　求 你 給 我 得 著 聽 見 歡 喜 快 樂 的 聲，

10b　　　Hōo Lí sóo at-tsi̍h ê kut thang huann-hí Lí ê miâ.
　　　　　使 你 所 揠 折 的骨 通 歡 喜 你 的 名。

11a　Kiû Lí ng Lí ê bīn, bô khùann gúa ê tsūe-ok,
　　　求 你 掩 你 的 面，無 看 我 的 罪 惡，

11b　　　Tshat-siau gúa it-tshè ê tsūe tsùe kiat-sok.
　　　　　擦 消 我 一切 的 罪 做 結 束。

12a　Siōng-tè ah , kiû Lí kā gúa tshòng-tsō tshing-khì ê sim-sìng,
　　　上 帝 啊，求 你 給 我 創 造 清 氣 的 心 性，

12b　　　Hōo gúa ê lāi-bīn ū ūann-sin tsìng-ti̍t ê sîn-lîng.
　　　　　使 我 的 內 面 有 換 新 正 直 的 神 靈。

13a　Gúa tsiū tsiong Lí ê tō -lōo tsí-sī ū kè-sit ê lâng,
　　　我 就 將 你 的 道 路 指 示 有 過 失 的 人，

13b　　　Ū tsūe ê lâng tsiū beh kui-sūn Lí tit ǹg-bāng.
　　　　　有罪 的 人 就 欲 歸 順 你 得 盼 望。

14a　Siōng-tè ah , kiù gúa ê Siōng-tè sī Lí ,
　　　上 帝 啊，救 我 的 上 帝 是 你，

14b　　　Gúa ê tsi̍h beh tūa-siann gîm-si o -ló Lí ê gī .
　　　　　我 的 舌 欲 大 聲 吟 詩 讚 美 你 的 義。

15a　Tsú ah, kiû Lí khui gúa ê tshùi-tûn tshut-siann,
　　　主 啊，求 你 開 我 的 嘴 唇 出 聲，

15b　　　Gúa ê tshùi tsiū beh pò-iông Lí ê hó miâ-siann.
　　　　　我 的 嘴 就 要 報 揚 你 的 好 名 聲。

16a　In-ūi Lí bô ài tsè-mi̍h, nā ài , gúa tsiū beh hiàn,
　　　因為 你 無 愛 祭 物，若 愛，我 就 要 獻，

16b　　　Sio-tsè Lí ia̍h bô huann-hí in ê ian.
　　　　　燒 祭 你 亦 無 歡 喜 伊 的 煙。

17a　Siōng-tè sóo ài ê tsè, tsiū-sī iu-siong ê sim-sîn,
　　　上 帝 所 愛 的 祭，就 是 憂 傷 的 心 神，

17b　　　Siōng-tè ah , iu-siong thòng-húe ê sim, Lí bô beh khùann-khin.
　　　　　上 帝 啊，憂 傷 痛 悔 的 心，你 無 要 看 輕。