《押韻啟應詩篇》

台語押韻啟應詩篇 55

作者 Tīnn Jî-gio̍k

55　　Tāi-pi̍t kà-sī ê si ; kau-hōo Ga̍k-kuann ; īng si-hiân ê ga̍k-khì.

1a　Siōng-tè ah , kiû Lí ànn hī-khang thiann gúa ê kî-kiû,
　　上 帝 啊，求 你 俯 耳 孔 聽 我 的 祈 求，

1b　　　M̄-thang tiàm-ba̍t , m̄ thiann gúa ê khún-kiû.
　　　　不 通 站 密， 不 聽 我 的 懇 求。

2a　Kiû Lí ànn-lo̍h thiann gúa, ìn gúa;
　　求 你 俯 落 聽 我，應 我；

2b　　　Gúa pi-siong bô pîng-an , hainn-hainn-tshan ná thâng-thūa.
　　　　我 悲 傷 無 平 安，哼 哼 孱 若 蟲 豸。

3a　Lóng sī in-ūi tùi-ti̍k ê siann teh huah, pháinn-lâng ê tsè-ap bô suah,
　　攏 是 因 為 對 敵 的 聲 在 喝 ， 歹 人 的 制 壓 無 息，

3b　　　In-ūi in tsiong tsūe-kùa tshia hōo gúa, īng siū-khì pik gúa.
　　　　因為 伊 將 罪 過 推 給 我，用 受 氣 迫 我。

4a　Gúa ê sim tī gúa lāi-bīn tsin khóo-thàng;　　
我 的 心 在 我 內 面 真 苦 痛；

4b　　　Sí-bô ê kiann-hiânn kàu tī gúa ná pháinn-bāng.
　　　　死 無 的 驚 惶 到 在 我 若 歹 夢。

5a　Kiann-hiânn ngia̍uh-ngia̍uh-tshuah kàu tī gúa,
　　驚 惶 蠕 蠕 惙　　到 在 我，

5b　　　Kiann-hiânn im-ba̍t gúa.
　　　　驚 惶 淹 密 我。

6a　Gúa tsiū kóng khí, gūan gúa tit-tio̍h si̍t nn̄g-ki,tshin-tshiūnn kap án-ni,
　　我 就 講 起， 願 我 得 著 翅 兩 支, 親 像 鴿 按 呢,

6b　　　Gúa tsiū pe--khì, tit-tio̍h an-jiân khiā-khí.
　　　　我 就 飛 起，得 著 安 然 居 起。

7a　Gúa beh pe--khì hn̄g-hn̄g,
　　我 欲 飛 去 遠 遠，

7b　　　Hioh tī khòng-iá tiong-ng .
　　　　歇 在 曠 野 中 央。

8a　Gúa beh kín-kín tsáu kàu siám-pī ê sóo-tsāi,
　　我 欲 緊 緊 走 到 閃 避 的 所 在，

8b　　　Thuat-lī kông-hong pò-thâu thang tsū-tsāi.
　　　　脫 離 狂 風 颮 頭 通 自 在。

9a　Tsú ah , kiû Lí thun-bia̍t in , pun-khui in ê tsi̍h;
　　主 啊，求 你 吞 滅 伊，分 開 伊 的 舌；

9b　　　In-ūi gúa tī siânn-lāi bat khùann-kìnn kiông-pō kap sann-tsinn.
　　　　因為 我 在 城 內 曾 看 見 強 暴 及 相 爭。

10a　In mî-ji̍t kiânn-se̍h tī siânn-tshiûnn-tíng;
　　　伊 暝 日 行 踅 在 城 牆 頂；

10b　　　Tī siânn-lāi ū hu-ké ok-to̍k ap-kíng.
　　　　　在 城 內 有 虛 假 惡 毒 壓 境。

11a　Siâ-ok tī hit lāi-bīn oo- oo .　　
　邪 惡 在 彼 內 面 烏 烏。

11b　　　Ap-tsè kan-tsà bô lī-khui i ê kue-lōo .
　　　　　壓 制 奸 詐 無 離 開 它的 街 路。

12a　In-ūi húi-pòng gúa--ê ,
　　　因為 毀 謗 我 的，

12b　　　M̄-sī tùi-ti̍k ê siat-kè , siat-sú sī , tsiū iáu ūe lún--tsi̍t-ē .
　　　　　不 是 對 敵 的 設 計，設 使 是，就 猶 會 忍 一 下。

12c　Tsū-ko kong-kik gúa- -ê ,
　　　自 高 攻 擊 我 的，

12d　　　M̄ -sī ùan-hūn gúa ê lâng teh mē ,
　　　　　不 是 怨 恨 我 的 人 在 罵，
　　　　 siat-sú sī , tsiū ūe bih lâi siám--kè .
　　　　　設 使 是， 就 會 匿 來 閃 過。

13a　Bô phah-sǹg sī lí , to sī kap gúa pînn-pùe--ê jī -í ,
　　　無 打 算 是 你，都 是 與 我 平 輩 的 而 已，

13b　　　Gúa ê iú-phūann, gúa ê pîng-iú ti- kí ,
　　　　　我 的 友 伴 ， 我 的 朋 友 知 己。

14a Lán pîng-sòo sann-kap tâm-lūn tsin tshin-bi̍t, bô má-hu,
　咱 平 素 相 及 談 論 真 親 密，無 馬 虎，

14b　　　Lán kap tsìng-lâng sann-kap kiânn tī Siōng-tè ê tshù.
　　　 　　咱 及 眾 人 相 及 行 在 上 帝 的 厝。

15a　Gūan sí- bô hut-jiân kàu tī in ,
　　　願 死 無 忽 然 到 在 伊，

15b　　　Hōo in u̍ah-u̍ah lo̍h im-kan ê lāi-bīn.
　　　　　使 伊 活 活 落 陰 間 的 內 面。

15c　In -ūi siâ-ok tī in khiā-khí ê sóo-tsāi,
　　　因 為 邪 惡 在 伊 居 起 的 所 在，

15d　　　Tī in tiong-kan ê tūe-tài.
　　　　　在 伊 中 間 的 地 帶。

16a　Lūn-kàu gúa, gúa beh kiû-kiò Siōng-tè ;
　　　論 到 我， 我 要 求 叫 上 帝；

16b　　　Iâ-hô-hua beh kiù gúa thuat-lī tsai-ē .
　　　　　耶 和 華 要 救 我 脫 離 災 禍。

17a　Ê -hng, tsá-khí, ji̍t--tàu, gúa beh ai-siong thóo-khùi;
　　　 暝 昏， 早 起，日 晝， 我 欲 哀 傷 嘆 氣；

17b　　　I ia̍h beh thiann gúa ê siann lâi sù un-hūi.
　　　　　祂亦 要 聽 我 的 聲 來 賜 恩 惠。

18a　I kiù-sio̍k gúa ê sìnn-miā lâi tháu-pàng,
　　　祂救 贖 我 的 性 命 來 釋 放，

18b　　　Thuat-lī kong-kik gúa ê lâng;
　　　　　脫 離 攻 擊 我 的 人 ；

18c　Hōo gúa tit-tio̍h pîng-an ;
　　　使 我 得 著 平 安；

18d　　　In -ūi húan-tùi gúa ê lâng kui-bān.
　　　　　因 為 反 對 我 的 人 歸 萬。

19a　Tùi kóo-tsá siông-siông tī-teh ê Siōng-tè ,
　　　對 古 早 常 常 在 的 之 上 帝，

19b　　　Beh thiann-kìnn, ia̍h beh pò-ìng in ê khúi-kè ,
　　　　　要 聽 見，亦 要 報 應 伊 的 詭 計，
　　　　tsiū-sī hiah-ê bô kúe-pìnn, bô kìng-ùi Siōng-tè--ê .
　　　　　就 是 彼 個 無 改 變，無 敬 畏 上 帝 的。

20a　Gúa tsîng ê pîng-iú tshun-tshiú kong-kik kap i sann-hô ê lâng;
　　　我 前 的 朋 友 伸 手 攻 擊 與 他 相 和 的 人；

20b　　　I í -king pūe iok hōo lâng sit-bāng.
　　　　　他已 經 背 約 使 人 失 望。

21a　I ê tshùi ku̍t-tia̍h, tshin-tshiūnn ling-iû ;
　　　他的 嘴 滑 澤， 親 像 奶 油；

21b　　　I ê sim khǹg kau-tsiàn tshin-tshiūnn iá-siù.
　　　　　他的 心 藏 交 戰 親 像 野 獸。

21c　I ê ūe jiû-lúan, khah-iânn ko-iû,
　　　他的 話 柔 軟， 較 贏 膏 油，

21d　　　Kî-si̍t sī to tshut-siù .
　　　　　其 實 是 刀 出 鞘。

22a　Tio̍h tsiong lí ê tànn, sià hōo Iâ-hô-hua;
　　　著 將 你 的 擔，卸 給 耶 和 華；

22b　　　I beh hû-tshî lí , I íng-íng bô hōo gī-lâng iô-tsuah.
　　　　　祂欲 扶 持 你, 祂 永 永 無 使 義 人 搖 泏。

23a　Siōng-tè ah , Lí beh hōo in hām-lo̍h tī bia̍t-bô ê hām-khinn;
　　　上 帝 啊，你 欲 使 伊 陷 落 在 滅 無 的 陷 坑；

23b　　　Thâi-sí lâng kiânn kan-tsà tsiū sí ,
　　　　　殺 死 人 行 奸 詐 就 死，

23c　In būe u̍ah kàu tiong-liân-kî ,
　　　伊 不 活 到 中 年 期，

23d　　　To̍k-to̍k gúa beh úa-khò Lí .
　　　　　獨 獨 我 要 倚 靠 你。