《押韻啟應詩篇》

台語押韻啟應詩篇 62

作者 Tīnn Jî-gio̍k

62　　Tāi-pi̍t ê si , tsiàu Iâ-tōo-tùn ê tsùe-huat ; kau hōo Ga̍k-kuann.

1a　Gúa ê sim tsīng-tsīng khut-kē , tsuan-bū thìng-hāu Siōng-tè ,
　　我 的 心 靜 靜 屈 低，專 務 聽 候 上 帝，

1b　　　Gúa ê tsín-kiù sī tùi I tshut--lâi--ê .
　　　　我 的 拯 救 是 對 祂 出 來 的。

2a　To̍k-to̍k I sī gúa ê tsio̍h-pûann,
　　獨 獨 祂 是 我 的 石 磐 ，

2b　　　Tsín-kiù gúa ê suann.
　　　　拯 救 我 的 山。

2c　I sī gúa ê kûan-tâi ,
　　祂 是 我 的 高 台，

2d　　　Gúa būe tūa iô -tāng tsū-tsāi.
　　　　我 不 大 搖 動 自 在。

3a　Lín tāi-ke kong-kik lâng,
　　恁 大 家 攻 擊 人，

3b　　　Tsiong i húi-hūai bô làng,
　　　　將 他 毀 壞 無 閬，

3c　Tshin-tshiūnn húi-hūai khi-tshiâ ê tshiûnn,
　　親 像 毀 壞 攲 斜 的 牆 ，

3d　　　Beh tó ê piah tsi̍t-iūnn.
　　　　欲 倒 的 壁 一 樣 。

4a　In sann-kap kè-bôo tsham-gī ,
　　伊 相 與 計 謀 參 議。

4b　　　Tsuan-bū beh tùi i tsun-kùi ê ūi kā i tshia--lo̍h-khì,
　　　　專 務 欲 對 他 尊 貴 的位 給 他 捙 落 去，

4c　In huann-hí pe̍h-tsha̍t bô siū iok-sok,
　　伊 歡 喜 白 賊 無 受 約 束，

4d　　　In tshùi tsiok-hok, sim tsiù-tsóo ok-to̍k.
　　　　伊 嘴 祝 福，心 咒 詛 惡 毒。

5a　Gúa ê sîn ah , lí tio̍h tsīng-tsīng, tsuan-bū thìng-hāu Tsú,
　　我 的 神 啊，你 著 靜 靜 ， 專 務 聽 候 主，

5b　　　In-ūi gúa ê ǹg-bāng sī tùi I tsiah ū .
　　　　因 為 我 的 盼 望 是 對 祂 才 有。

6a　To̍k-to̍k I sī gúa ê tsio̍h-pûann,
　　獨 獨 祂 是 我 的 石 磐，

6b　　　Sī tsín-kiù gúa ê suann,
　　　　是 拯 救 我 的 山，

6c　I sī gúa ê kûan-tâi,
　　祂 是 我 的 高 台，

6d　　　Gúa būe iô-tāng tsū-tsāi.
　　　　我 不 搖 動 自 在。

7a　Gúa ê tsín-kiù, gúa ê îng-kng, tsāi-tī Siōng-tè ;
　　我 的 拯 救，我 的 榮 光， 在 於 上 帝；

7b　　　Gúa ê khùi-la̍t ê gûan-iû , gúa ê siám-pī- -ê ,
　　　　我 的 氣 力 的 源 由，我 的 閃 避 者，
　　　　ia̍h tsāi-tī Siōng-tè .　　
　　亦 在 於 上 帝。

8a　Lín tsìng peh-sìnn,
　　恁 眾 百 姓，

8b　　　Tio̍h sî -sî úa-khò I ;
　　　　著 時 時 倚 靠 祂；

8c　Tī I ê bīn-tsîng piànn-tshut lín ê sim-ì ,
　　在 祂 的 面 前 傾 出 恁 的 心 意，

8d　　　Siōng-tè sī lán tô-siám ê sóo-tsāi, thang hōo lán bih .
　　　　上 帝 是 咱 逃 閃 的 所 在， 通 讓 咱 匿。

9a　Pi -bî ê lâng tsin-tsiànn sī khang-hi ,
　　卑 微 的 人 真 正 是 空 虛，

9b　　　Tsun-kùi ê lâng iā sī .
　　　　尊 貴 的 人 也 是。

9c　Hē tī thian-phîng-úann, tik-khak phû--khí-lâi ,
　　下 在 天 秤 碗， 的 確 浮 起 來，

9d　　　In it-khài pí hoo-khip ê khì khah-khin ná tîn-ai .
　　　　伊 一 概 比 呼 吸 的 氣 較 輕 如 塵 埃。

10a　M̄-thang úa-khò pō-gio̍k,
　　　不 通 倚 靠 暴 虐，

10b　　　M̄-thang in-ūi tshiúnn-the̍h lâi kiau-ngōo búan-tsiok;
　　　　　不 通 因 為 搶 提 來 驕 傲 滿 足；

10c　Nā tsâi-pó ke -thinn,
　　　若 財 寶 加 添，

10d　　　M̄-thang tsù-ì hiah-ê tsînn.
　　　　　不 通 注 意 那 些 錢。

11a　Siōng-tè kóng tsi̍t-hāng tāi-tsì,
　　　上 帝 講 一 項 事 情，

11b　　　Gúa ū thiann-kìnn nn̄g-hāng tāi-tsì,
　　　　　我 有 聽 見 兩 項 事 情，
　　　　tsiū-sī kûan-lîng sio̍k tī Siōng-tè I ka-kī .
　　　　　就 是 權 能 屬 在 上 帝 祂 自 己。

12a　Tsú ah , tsû-ài ia̍h sī sio̍k tī Lí ;
　　　主 啊， 慈 愛 亦 是 屬 在 你；

12b　　　In -ūi Lí tsiàu ta̍k-lâng ê sóo-kiânn lâi pò-ìng i .
　　　　　因 為 你 照 逐 人 的 所 行 來 報 應 他。