《押韻啟應詩篇》

台語押韻啟應詩篇 64

作者 Tīnn Jî-gio̍k

64　　Tāi-pi̍t ê si, kau hōo Ga̍k-kuann.

1a　Siōng-tè ah , gúa ai-siong ê sî , kiû Lí thiann gúa ê siann;
　　上 帝 啊， 我 哀 傷 的 時，求 你 聽 我 的 聲；

1b　　　Kiû Lí pó-hōo gúa ê u̍ah-miā,
　　　　求 你 保 護 我 的 活 命，
　　　　tùi-ti̍k nā lâi, hōo gúa bián kiann.
　　　　對 敵 若 來，使 我 免 驚。

2a　Kiû Lí tsiong gúa khǹg-ba̍t tsiàu-kòo,
　　求 你 將 我 放 密 照 顧，

2b　　　Hōo gúa thuat-lī tsùe-pháinn ê lâng àm-tsīnn ê kè-bôo,
　　　　使 我 脫 離 做 歹 的 人 暗 靜 的 計 謀，
　　　　kap kiânn put-gī ê lâng ê jiáu-lūan beh hāi bû-koo .
　　　　與 行 不 義 的 人 的 擾 亂 欲 害 無 辜。

3a　In bûa in ê tsi̍h tshin-tshiūnn to hiah lāi,
　　伊 磨 伊 的 舌 親 像 刀 許 利，

3b　　　In pí-tsún in ê tsìnn, tsiū-sī ok-to̍k ê ūe iā hiah lāi,　　
　　伊 比 準 伊 的 箭， 就 是 惡 毒 的 話 也 許 利，

4a　Beh tī àm-tsīnn ê sóo-tsāi siā bû-koo ê lâng;
　　欲 在 暗 靜 的 所 在 射 無 辜 的 人；

4b　　　In hut-jiân siā-tio̍h i , ia̍h m̄-kiann siánn-lâng.
　　　　伊 忽 然 射 著 他，亦 不 驚 甚 人。

5a　In sann bián-lē siat pháinn kè-bôo beh hāi-lâng,
　　伊 相 勉 勵 設 歹 計 謀 欲 害 人，

5b　　　In tsham-siông àm-tsīnn tiunn lô-bāng;
　　　　伊 參 詳 暗 靜 張 羅 網；
　　　　Kóng, tsī-tsūi ūe khùann-kìnn in ê hām-khang.
　　　　講， 是 誰 會 看 見 伊 的 陷 坑 。

6a　In ūi pháinn-tāi tôo -bôo,
　　伊 為 歹 事 圖 謀，

6b　　　Kóng, gúan tsīn-la̍t tôo -bôo,
　　　　講， 阮 盡 力 圖 謀，

6c　Í -king ū tú-hó ê kè-bôo ;
　　已 經 有 抵 好 的 計 謀；

6d　　　In ta̍k-lâng ê liām-thâu kap sim-su khùn-lân po̍k-lōo .
　　　　伊 逐 人 的 念 頭 及 心 思 困 難 暴 露。

7a　Tsóng-sī Siōng-tè beh īng tsìnn siā in ;
　　總 是 上 帝 要 用 箭 射 伊；

7b　　　In hut-jiân tio̍h-siong bia̍t sin.
　　　　伊 忽 然 著 傷 滅 身。

8a　In beh tio̍h-tak khut-kē ,
　　伊 必 著 觸 屈 低，

8b　　　In ê tsi̍h ūe hāi in pún-sin;
　　　　伊 的 舌 會 害 伊 本 身；

8c　Hūan-nā khùann-kìnn in--ê ,
　　 凡 若 看 見 伊 的，

8d　　　Lóng beh iô-thâu siám-sin.
　　　　攏 必 搖 頭 閃 身。

9a　Tsìng-lâng lóng beh kiann-hiânn,
　　眾 人 攏 必 驚 惶，
　　beh pò-iông Siōng-tè sóo tsùe ta̍k-kiānn.
　　必 報 揚 上 帝 所 做 逐 件。

9b　　　Koh siông-sè siūnn I ê sóo-kiânn.
　　　　復 詳 細 想 祂 的 所 行。

10a　Gī-lâng beh in-ūi Iâ-hô-hua lâi huann-hí , ia̍h beh úa-khò I ;
　　　義 人 必 因 為 耶 和 華 來 歡 喜，亦 必 倚 靠 祂；

10b　　　Hūan-nā sim tsìng-ti̍t ê lâng, lóng beh khua-kháu tik -ì .
　　　　　凡 若 心 正 直 的 人， 攏 必 誇 口 得 意。