《押韻啟應詩篇》

台語押韻啟應詩篇 74

作者 Tīnn Jî-gio̍k

74　　A-sat kà-sī ê si.

1a　Siōng-tè ah , Lí siánn-sū íng-úan pàng-sak gúan tāi-ke ?
　　上 帝 啊，你 甚 事 永 遠 放 捨 阮 大 家？

1b　　　Lí siánn-sū siū-khì Lí tsháu-tiûnn ê iûnn tsûan-thé,
　　　　你 甚 事 受 氣 你 草 場 的 羊 全 體，
　　　　tshin-tshiūnn tshut hé- ian teh sio tsùe iām-hé ?
　　　　親 像 出 火 煙 在 燒 作 焰 火？

2a　Kiû Lí kì-liām Lí tsá-sî sóo tit-tio̍h ê tsú-bîn,
　　求 你 記 念 你 早 時 所 得 著 的 子 民，
　　tsiū-sī Lí sóo sio̍k-hûe tsùe gia̍p ê tsi-phài ê jîn-bîn,
　　 就 是 你 所 贖 回 做 業 的 支 派 的 人 民，

2b　　　Iā tio̍h kì-liām Lí pîng-sî sóo khiā-khí ê Sik-an ê tsū-bîn.
　　　　也 著 記 念 你 平 時 所 居 起 的 錫 安 的 住 民。

3a　Kiû Lí kiânn kàu hiah-ê kú-kú pha-hng ê tē ,
　　求 你 行 到 那 些 久 久 拋 荒 的 地，

3b　　　Khùann tùi-ti̍k tī sìng-sóo it-tshè sóo húi-hūai--ê .　　　　　看 對 敵 在 聖 所 一 切 所 毀 壞 的。

4a　Lí ê tùi-ti̍k tī Lí ê hūe-lāi hua-hua-háu;
　　你 的 對 敵 在 你 的 會 內 譁 譁 吼；

4b　　　In khiā in ê kî tsùe kì-hō khua-kháu.
　　　　伊 豎 伊 的 旗 做 記 號 誇 口 。

5a　In tshin-tshiūnn lâng kia̍h-khí póo-thâu,
　　伊 親 像 人 舉 起 斧 頭，

5b　　　Lâi tshò tshiū-nâ ê tshiū kàu tshiū-thâu.
　　　　來 剉 樹 林 的 樹 到 樹 頭。

6a　Sìng-sóo ê lāi-bīn it-tshè tiau-khik--ê ,
　　聖 所 的 內 面 一切 雕 刻 的，

6b　　　In hiān-tsāi īng póo-thâu kap thûi it-tsīn phah-pháinn kàu pînn-tē .
　　　　伊 現 在 用 斧 頭 及 槌 一 盡 打 壞 到 平 地。

7a　In pàng-hé sio Lí ê sìng-sóo,
　　伊 放 火 燒 你 的 聖 所，

7b　　　Phah lâ-sâm Lí ê miâ sóo khiā-khí ê hūe-sóo , tsiânn-tsùe pînn-thôo !
　　　　扑 垃 墋 你 的 名 所 居 起 的 會 所，成 做 平 土！

8a　In sim-lāi kóng, “Lán tio̍h it-tsīn húi-hūai in ; “
　　伊 心 內 講，「咱 著 一 盡 毀 壞 伊；」

8b　　　In tī piàn-tūe, tsiong Siōng-tè ê hūe-tn̂g lóng sio-lio--khì,
　　　　伊 在 遍 地， 將 上 帝 的 會 堂 攏 燒 燎 去，
　　　　hōo in hōo lâng khùann khin.
　　　　使 伊 受 人 看 輕。

9a　Gúan bô khùann-kìnn gúan ê tiāu-thâu tsí-sī , bô koh ū sian-ti ;
　　阮 無 看 見 阮 的 兆 頭 指 示，無 復 有 先 知；

9b　　　Gúan tiong-kan iā bô lâng tsai beh kàu sím-mi̍h sî .
　　 阮 中 間 也 無 人 知 要 到 甚 麼 時。

10a　Siōng-tè ah , tùi-ti̍k ki-tshì beh kàu sím-mi̍h sî ah ?
　　　上 帝 啊，對 敵 譏 刺 要 到 甚 麼 時 啊？

10b　　　Kiû-siû siat-to̍k Lí ê miâ beh kàu íng-úan mah?
　　　　　仇 讎 褻 瀆 你 的 名 要 到 永 遠 嗎？

11a　Lí ūi-hô kiu Lí ê tshiú,
　　　你 為 何 縮 你 的 手，

11b　　　Tsiū-sī Lí ê tsiànn-tshiú?
　　　　　就 是 你 的 右 手？

11c　Kiû Lí tùi Lí ê hing-tsîng tshun--tshut--lâi ,
　　　求 你 對 你 的 胸 前 伸 出 來，

11d　　　Húi-bia̍t in bô tsûn-tsāi.
　　　　　毀 滅 伊 無 存 在。

12a　Tsóng-sī Siōng-tè tùi tsá í -lâi tsùe gúa ê Ông,
　　　總 是 上 帝 對 早 以 來 做 我 的 王，

12b　　　Tī tūe--ni̍h kiânn tsín-kiù ê bān-ông ê Ông.
　　　　　在 地 裡 行 拯 救 的 萬 王 的 王。

13a　Lí bat īng Lí ê kûan-lîng tsiong hái pun-khui;
　　　你 曾 用 你 的 權 能 將 海 分 開；

13b　　　Tsiong tsúi-tiong tūa tōng-bu̍t ê thâu-khak phah tshùi.
　　　　　將　　水 中 大 動 物 的 頭 殼 拍 碎 。

14a　Lí bat kòng-tshùi go̍k-hî ê thâu-khak tshùi-mi-mi,
　　　你 曾 摃 碎 鱷 魚 的 頭 殼 碎 綿 綿，

14b　　　Tsiong i hōo khòng-iá ê iá -siù tsùe tsia̍h-mi̍h.
　　　　　將 牠 讓 曠 野 的 野 獸 做 食 物。

15a　Lí bat pun-khui tsúi-gûan kap hô ê kun-ki ,
　　　你 曾 分 開 水 源 及 河 的 根 基，

15b　　　Lí bat hōo tn̂g-lâu ê kang-hô ta--khì.
　　　　　你 曾 使 長 流 的 江 河 乾 去。

16a　Ji̍t--sî sio̍k Lí , mî--sî iā sio̍k Lí;
　　　日 時 屬 你，暝 時 也 屬 你；

16b　　　Kng kap ji̍t-thâu sī Lí sóo tsún-pī .
　　　　　光 及 日 頭 是 你 所 準 備。

17a　Tūe-tsiūnn it-tshè ê kài-hān sī Lí sóo siat-tīng,
　　　地 上 一 切 的 界 限 是 你 所 設 定，

17b　　　Ju̍ah-thinn kap tang-thinn sī Lí sóo hun-bîng.
　　　　　熱 天 及 冬 天 是 你 所 分 明。

18a　Iâ-hô-hua ah , kiû Lí kì-tit , tùi-ti̍k ū húi-pòng,
　　　耶 和 華 啊， 求 你 記 得，對 敵 有 誹 謗，

18b　　　Gōng ê peh-sìnn siat-to̍k Lí ê miâ ing-kai bia̍t-bông.
　　　　　戇 的 百 姓 褻 瀆 你 的 名 應 該 滅 亡。

19a　Lí ê ka-tsui ê sìnn-miā,
　　　你 的 鳩 鵻 的 性 命，

19b　　　M̄-thang kau hōo iá-siù tsùe tsia̍h-si̍t ;
　　　　　不 通 交 給 野 獸 做 吃 食；

19c　Lí sòng-hiong lâng ê u̍ah-miā,
　　　你 貧 窮 人 的 活 命，

19d　　　M̄-thang íng-úan kā in būe-kì-tit .
　　　　　不 通 永 遠 將 伊 不 記 得。

20a　Kiû Lí siàu-liām sóo li̍p ê iok sī kiàn-siat;
　　　求 你 數 念 所 立 的 約 是 建 設；

20b　　　In-ūi tūe-tsiūnn oo-àm ê sóo-tsāi múa-múa sī kiông-pō ê tsâu-hia̍t.
　　　　　因為 地 上 烏 暗 的 所 在 滿 滿 是 強 暴 的 巢 穴。

21a　Siū ap-tsè ê lâng, m̄-thang hōo in kiàn-siàu tò--khì;
　　　受 壓 制 的 人， 不 通 使 伊 見 誚 返 去；

21b　　　Khùn-khóo sòng-hiong ê lâng
　　　　　困 苦 貧 窮 的 人
　　　　tio̍h hōo in o-ló Lí ê miâ tsùe huann-hí.
　　　　　著 使 伊 讚美 你 的 名 作 歡 喜。

22a　Siōng-tè ah , kiû Lí khí-lâi hun-sòo , sī ūi Lí ka-kī .
　　　上 帝 啊，求 你 起 來 分 訴，是 為 你 自 己。

22b　　　Tio̍h kì--tit gōng-lâng thong-ji̍t tsáinn-iūnn teh húi-pòng Lí .

　　　　　著 記 得 戇 人 通 日 怎 樣 在 誹 謗 你。

23a　Kiû Lí m̄-thang būe-kì-tit Lí ê tùi-ti̍k ê siann;
　　　求 你 不 通 不 記 得 你 的 對 敵 的 聲；

23b　　　Tsiū-sī hiah-ê khí-lâi kong-kik Lí ê miâ,　　　　　就 是 那 些 起 來 攻 擊 你 的 名，
　　　　in siông-siông teh hán-huah ê siann.
　　　　　伊 常 常 在 喊 喝 的 聲。