《押韻啟應詩篇》

台語押韻啟應詩篇 77

作者 Tīnn Jî-gio̍k

77　　A-sat ê si, Iâ-tōo-tùn ê tsùe-huat ; kau hōo Ga̍k-kuann.

1a　Gúa beh tùi Siōng-tè tshut-siann, kiû-kiò I ê miâ;
　　我 要 對 上 帝 出 聲， 求 叫 祂 的 名；

1b　　　Gúa tùi Siōng-tè tshut-siann, I beh ànn hī-khang lâi thiann.
　　　　我 對 上 帝 出 聲，祂 要 俯 耳 孔 來 聽。

2a　Tī gúa hūan-lān ê ji̍t gúa tshē Tsú;
　　在 我 患 難 的 日 我 尋 主；

2b　　　Gúa tī mî--sî kia̍h-khí tshiú kú-kú,
　　　　我 在 瞑 時 舉 起 手 久 久，
　　　　Gúa ê sim m̄-khíng siū an-ùi piàn khang-hu.
　　　　我 的 心 不 肯 受 安 慰 變 空 虛。

3a　Gúa siàu-liām Siōng-tè , tsiū peh-pak giông beh sí ,
　　我 思 念 上 帝， 就 擘 腹 卬 要 死，

3b　　　Gúa tsīng-tsīng siūnn, sim-sîn hūn--khì.
　　　　我 靜 靜 想， 心 神 昏 去。

4a　Lí hōo gúa ê ba̍k-tsiu bô tsi̍t-sî khueh;
　　你 使 我 的 目 珠 無 一 時 瞌；

4b　　　Gúa hûan-ló kàu lóng būe kóng ūe .
　　　　我 煩 惱 到 攏 不 講 話。

5a　Gúa tui-liām kóo-tsá ê ji̍t ,
　　我 追 念 古 早 的 日，

5b　　　Tsiū-sī ki̍k-tsá ê nî -ji̍t .
　　　　就 是 極 早 的 年 日。

6a　Gúa siūnn-khí gúa mî-kan ê si-kua,
　　我 想 起 我 暝 間 的詩 歌，
　　gúa bong-sim ka-kī mn̄g bô suah,
　　我 摸 心 自 己 問 無 息，

6b　　　Gúa ê sim-sîn ia̍h siông-sè síng-tshat khùann.
　　　　我 的 心 神 亦 詳 細 省 察 看 。

7a　Tsú kiám beh íng-úan pàng-sak mah?
　　主 豈 要 永 遠 放 捨 嗎？

7b　　　Bô koh si -un mah?
　　　　無 復 施 恩 嗎？

8a　I ê tsû-ài kiám íng-úan kiông-tsīn mah?
　　祂 的 慈 愛 豈 永 遠 窮 盡 嗎？

8b　　　I ê ìng-ún kiám tāi-tāi hùe-bô mah?
　　　　祂 的 應 允 豈 代 代 廢 無 嗎？

9a　Siōng-tè kiám būe-kì-tit si -un mah?
　　上 帝 豈 不 記 得 施 恩 嗎？

9b　　　Kiám in -ūi siū-khì that-ba̍t I ê tsû-pi mah?
　　　　豈 因 為 怒 氣 塞 密 祂 的 慈 悲 嗎？

10a　Gúa kóng, “Tse tsiū-sī gúa ê lúan-jio̍k;”
　　　我 講 ，「這 就 是 我 的 軟 弱；」

10b　　　Gúa beh siàu-liām Tsì-kûan--ê tūa tsok-ûi kap kiù-sio̍k.
　　　　　我 要 數 念 至 高 者 大 作 為 及 救 贖。

11a　Gúa beh kóng-khí Iâ-hô-hua ê sóo-kiânn,
　　　我 要 講 起 耶 和 華 的 所 行，

11b　　　Siàu-liām I tsá-sî ê sîn-jiah tsi̍t-kiānn tsi̍t-kiānn.
　　　　　數 念 祂 早 時 的神 蹟 一 件 一 件。

12a　Gúa beh tshún-to̍k Lí ê sóo-kiânn,
　　　我 要 忖 度 你 的 所 行，

12b　　　Tsīng-tsīng siūnn Lí ê sóo-tsùe ê miâ-siann.
　　　　　靜 靜 想 你 的 所 做 的 名 聲。

13a　Siōng-tè ah , Lí ê lōo sī sìng--ê ;
　　　上 帝 啊，你 的 路 是 聖 的；

13b　　　Ū sím-mi̍h sîn-bîng tūa tshin-tshiūnn Siōng-tè ?
　　　　　有 甚 麼 神 明 大 親 像 上 帝？

14a　Lí sī kiânn kî-sū ê Siōng-tè ;
　　　你 是 行 奇事 的 上 帝；

14b　　　Lí bat tī bān peh-sìnn ê tiong-kan, hián-bîng Lí ê kûan-sè .
　　　　　你 曾 在 萬 百 姓 的 中 間， 顯 明 你 的 權 勢。

15a　Lí bat īng Lí ê tshiú sio̍k-hûe Lí ê peh-sìnn,
　　　你 曾 用 你 的 手 贖 回 你 的 百 姓，

15b　　　Tsiū-sī Ngá-kok kap Iok-sik ê kiánn-jî .
　　　　　就 是 雅 各 與 約 瑟 的 子 兒。

16a　Siōng-tè ah , tsiah-ê tsúi kìnn-tio̍h Lí,
　　　上 帝 啊，諸 些 水 見 著 你，
　　tsiah-ê tsúi kìnn-tio̍h Lí , lóng kiann-hiânn,
　　　諸 些 水 見 著 你，攏 驚 惶，

16b　　　Tshim-ian ia̍h ngia̍uh-ngia̍uh-tshuah tio̍h kiann.
　　　　　深 淵 亦 蠕 蠕 惙 著 驚。

17a　Ba̍t-hûn piànn-tshut tsúi kiong-tshong tsiū tshut-siann,
　　　密 雲 傾 出 水 穹 蒼 就 出 聲，

17b　　　Lí ê tsìnn sì-kùe siā .
　　　　　你 的 箭 四 界 射。

18a　Tī kńg-lê-hong-lāi ū Lí lûi ê siann;
　　　在 捲 龍 風 內 有 你 雷 的 聲；

18b　　　Sih-nà ê kng sih kàu thong sè-kan teh siám-iánn;
　　　　　閃 電 的 光 閃 到 通 世 間 在 閃 影；

　　　　 TŌE NGIA̍UH-NGIA̍UH-CHHOAH, KOH TÍnn-TĀNG LÂI KIAnn.
　　　　　地 蠕　　 蠕　　 惙 ， 復 振 動 來 驚。

19a　Lí ê tō -lōo tī hái-tiong, Lí ê lōo-kìng tī tūa-tsúi-tiong,
　　　你 的 道 路 在 海 中 ， 你 的 路 徑 在 大 水 中 ，

19b　　　Lí ê kha-jiah bô lâng ūe tsai, thang hîng-iông.
　　　　　你 的 腳 跡 無 人 會 知， 通 形 容。

20a　Tsá Lí īng Môo-se A-lûn ê tshiú,
　　　早 你 用 摩 西 亞 倫 的 手，

20b　　　Tshūa Lí ê peh-sìnn tshin-tshiūnn kui-kûn ê iûnn.
　　　　　導 你 的 百 姓 親 像 歸 群 的 羊。