《押韻啟應詩篇》

台語押韻啟應詩篇 78c

作者 Tīnn Jî-gio̍k

78　　A-sat kà-sī ê si.

43a　I tsáinn-iūnn tī Ai-ki̍p hián-tshut I ê sîn-jiah;
　　　祂 怎 樣 在 埃 及 顯 出 祂 的 神 蹟；

43b　　　Tī Só-an tshân, hián-tshut kî-sū í- king kàu-gia̍h.
　　　　　在 瑣 安 田 ， 顯 出 奇 事 已 經 夠 額。

44a　Tsiong in ê kang-hô pìnn-tsùe huih būe phīnn--tit,
　　　將 伊 的 江 河 變 做 血 不 鼻 得，

44b　　　Tì-kàu in ê hô-tsúi lóng būe lim--tit.
　　　　　致 到 伊 的 河 水 攏 不 飲 得。

45a　I hōo hôo-sîn kui-tīn kàu in tiong-kan lâi tsam in ;
　　　祂 使 蝴 蠅 歸 陣 到 伊 中 間 來 沾 伊；

45b　　　Koh hōo tshân-kap-á lâi hāi in .
　　　　　復 使 田 蛙 仔 來 害 伊。

46a　Tsiong in ê thóo-sán, kau hōo thâng-thūa;
　　　將 伊 的 土 產， 交 使 蟲 豸；

46b　　　Tsiong in lô-khóo lâi tit-tio̍h--ê , kau hōo tsháu-meh tsùe suah.
　　　　　將 伊 勞 苦 來 得 著 的，交 使 草 蜢 做 息。

47a　I lo̍h-pha̍uh, húi-hūai in ê phû-tô-tshiū,
　　　祂 落 雹 ， 毀 壞 伊 的 葡 萄 樹 ，

47b　　　Lo̍h-sng, húi-hūai in ê sng-tsâi-tshiū.
　　　　　落 霜， 毀 壞 伊 的 桑 椹 樹 。

48a　Koh tsiong in ê tsing-sinn kau hōo pha̍uh,
　　　復 將 伊 的 畜 牲 交 給 雹，

48b　　　Tsiong in kui-kûn ê tsing-sīnn kau hōo sih-nà .
　　　　　將 伊 歸 群 的 畜 牲 交 給 閃 電。

49a　I huat-tshut I ê tūa siū-khì, tsiū-sī thòng-hūn, khóo-lān ê siū-khì,
　　　祂 發 出 祂的 大 怒 氣，就 是 痛 恨、 苦 難 的 怒 氣，

49b　　　Kui-tīn kàng tsai-ē ê sù-tsiá lóng kàu in hia--khì.
　　　　　歸 陣 降 災 禍 的 使 者 攏 到 伊 彼 去。

50a　I ūi-tio̍h ka-kī ê siū-khì phoo-pînn I ê lōo ;
　　　祂 為 著 自 己 的 怒 氣 舖 平 祂 的 路；

50b　　　Hōo in ê sìnn-miā būe bián-tit sí tī tsu̍at-lōo ,
　　 　 　　使 伊 的 性 命 不 免 得 死 在 絕 路，
　　 　　tsiong in ê u̍ah-miā kau hōo un-i̍k tsùe huat-tōo.
　　 　 　　將 伊 的 活 命 交 給 瘟 疫 作 法 度。

51a　Tī Ai-ki̍p phah-sí it-tshè ê tūa-kiánn,
　　　在 埃 及 打 死 一 切 的 大 子，

51b　　　Tī Hâm ê pòo-pînn-tiong phah-sí in ê thâu-tsiūnn-kiánn.
　　　　　在 含 的 布 棚 中 打 死 伊 的 頭 生 子。

52a　Tsóng-sī I tshūa-tshut ka-kī ê peh-sìnn, tshin-tshiūnn iûnn;
　　　總 是 祂 導 出 自 己 的 百 姓， 親 像 羊；

52b　　　Tī khòng-iá tshūa in tshin-tshiūnn kui-kûn ê iûnn.
　　　　　在 曠 野 導 伊 親 像 歸 群 的 羊。

53a　I tshūa in an-ún, hōo in bô kiann-hiânn;
　　　祂 導 伊 安 穩，使 伊 無 驚 惶；

53b　　　Hái tsiū im-sí in ê tùi-ti̍k bô miā.
　　　　　海 就 淹 死 伊 的 對 敵 無 命。

54a　I koh tshūa in kàu sìng-tūe ê kau-kài;
　　　祂 又 導 伊 到 聖 地 的 交 界；

54b　　　Kàu I tsiànn-tshiú sóo tit-tio̍h tsit-ê suann it-tài.
　　　　　到 祂 右 手 所 得 著 此 個 山 一 帶。

55a　I tī in ê bīn-tsîng, kúann-tshut lia̍t-pang-lâng;
　　　祂在 伊 的 面 前 ， 趕 出 列 邦 人；

55b　　　Tsiong gūa-pang-lâng ê tūe, niû hōo in tsùe-gia̍p ná bîn-bāng;
　　　　　將 外 邦 人 的 地，量 給 伊 做 業 若 眠 夢；
　　　　Hōo Í- sik-lia̍t ê tsi-phài khiā-khí in ê pòo-pînn tsùe tsú-lâng.
　　　　　使 以 色 列 的 支 派 居 起 伊 的 布 棚 做 主 人。

56a　In iû-gûan tshì Tsì-kûan ê Siōng-tè , lâi pūe-gi̍k I ;
　　　伊 猶 原 試 至 高 的 上 帝，來 悖 逆 祂；

56b　　　Bô siú I kan-tsìng ê ūe , lâi biáu-sī I .
　　　　　無 守 祂 干 證 的 話，來 藐 視 祂。

57a　Sit-sìn pūe-gi̍k, bô koh-iūnn in ê tsóo-kong;
　　　失 信 悖 逆，無 胳 樣 伊 的 祖 公；

57b　　　Piàn-khúan tshin-tshiūnn king píng-lìn-tńg.
　　　　　變 款 親 像 弓 反 輪 轉。

58a　In-ūi in īng in suann-thâu ê tûann, jiá--tio̍h I ê siū-khì;
　　　因 為 伊 用 伊 山 頭 的 壇， 惹 著 祂 的 怒 氣；

58b　　　Īng in tiau-khik ê ngóo-siōng, hōo I thòng-hūn put-tsí.
　　　　　用 伊 雕 刻 的 偶 像 ， 使 祂 痛 恨 不 止。

59a　Siōng-tè thiann-kìnn tsiū siū-khì,
　　　上 帝 聽 見 就 怒 氣，

59b　　　Tūa iàm-òonn Í- sik-lia̍t bô sîng-ì .
　　　　　大 厭 惡 以 色 列 無 誠 意。

60a　　Sīm-tsì khì-sak Sī-lô ê hūe-bōo kàu pînn-pînn,
　　甚 至 棄 捨 示 羅 的 會 幕 到 平 平，

60b　　　Tsiū-sī I tī lâng ê tiong-kan sóo tah ê pòo-pînn.
　　　　　就 是 祂 在 人 的 中 間 所 搭 的 布 棚。

61a　Koh tsiong I ê khùi-la̍t, kau hōo ī -pang-lâng--khì;
　　　復 將 祂 的 氣 力，交 給 異 邦 人 去；

61b　　　Tsiong I ê îng-kng kau tī in ê tùi-ti̍k ê tshiú--khì.
　　　　　將 祂 的 榮 光 交 在 伊 的 對 敵 的 手 去。

62a　Ia̍h tsiong I ê peh-sìnn kau hōo to-kiàm,
　　　亦 將 祂 的 百 姓 交 給 刀 劍，

62b　　　I pún-sin ê ke-gia̍p, I siū-khì koh thó-iàm.
　　　　　祂 本 身 的 家 業， 祂 怒 氣 又 討 厭。

63a　In ê siàu-liân-lâng hōo hé sio-bia̍t--khì,
　　　伊 的 少 年 人 給 火 燒 滅 去，

63b　　　In ê tsāi-sik-lú bô tit-tio̍h lâng ê tsiok-hō kiong-hí .
　　　　　伊 的 在 室 女 無 得 著 人 的 祝 賀 恭 喜。

64a　Tsè-si tó tī to- ē , ia̍h būe tsáu,
　　　祭 司 倒 在 刀 下，亦 不 走，

64b　　　Tsiú-kúann-lâng ia̍h būe thî- khàu.
　　　　　守 寡 人 亦 不 啼 哭。

65a　Hit-sî Tsú tshin-tshiūnn khùn ê lâng tsing-sîn khí lâi khùann,
　　　彼 時 主 親 像 睡 的 人 精 神 起 來 看，

65b　　　Tshin-tshiūnn ióng-bíng ê lâng, lim-tsiú teh huah.
　　　　　親 像 勇 猛 的 人， 飲 酒 在 喝。

66a　I phah thè I ê tùi-ti̍k kàu kiat-kio̍k,
　　　祂 打 退 祂 的 對 敵 到 結 局，

66b　　　Hōo in íng-íng siū lîng-jio̍k.
　　　　　使 伊 永 永 受 凌 辱。

67a　I koh khì-sak Iok-sik ê pòo-pînn tsùe tîn-ai ,
　　　祂 又 棄 捨 約 瑟 的 布 棚 做 塵 埃，

67b　　　Bô kíng-súan Í- huat-liân ê tsi-phài;
　　　　　無 揀 選 以 法 蓮 的 支 派；

68a　Tsóng-sī kíng Iû-tāi ê tsi-phài,
　　　總 是 揀 猶 大 的 支 派，

68b　　　I sóo ì- ài ê Sik-an-suann tit tsû-ài .
　　　　　祂 所 意愛 的 錫 安 山 得 慈 愛。

69a　Koh khí-tsō I ê sìng-sóo, kûan tshin-tshiūnn thinn,
　　　復 起 造 祂 的 聖 所，高 親 像 天，

69b　　　Koh tshin-tshiūnn I kiàn-li̍p íng-íng tī-teh ê tūe bô pinn .
　　　　　復 親 像 祂 建 立 永 永 佇 在 的 地 無 邊。

70a　Koh kíng I ê lôo-po̍k Tāi-pi̍t,
　　　又 揀 祂 的 奴 僕 大 闢，

70b　　　Tshūa i tùi iûnn-tiâu lâi jīm-tsit.
　　　　　導 他 對 羊 寮 來 任 職。

71a　Hōo i bô koh tè hiah-ê iûnn-bú siū iok-sok,
　　　使 他 無 復 隨 那 些 羊 母 受 約 束，

71b　　　Beh hōo i iúnn-tshī I ê peh-sìnn Ngá-kok,
　　　　　要 使 他 養 飼 祂 的 百 姓 雅 各，
　　　　kap I ê ke-gia̍p Í- sik-lia̍t, I sóo tsiok-hok.
　　　　　與 祂 的家 業 以 色 列，祂所 祝 福。

72a　Tāi-pi̍t tsiū tsiàu i sim-lāi ê tsìng-ti̍t iúnn-tshī in ;
　　　大 闢 就 照 他 心 內 的 正 直 養 飼 伊；

72b　　　Koh īng i khiáu-biāu ê tshiú ín-tshūa in .
　　　　　又 用 他 巧 妙 的 手 引 導 伊。