《押韻啟應詩篇》

台語押韻啟應詩篇 79

作者 Tīnn Jî-gio̍k

79　　A-sat ê si .

1a　Siōng-tè ah , gūa-pang-lâng tsìn-ji̍p Lí ê sán-gia̍p,
　　上 帝 啊，外 邦 人 進 入 你 的 產 業，
　　phah lâ-sâm Lí ê sìng-tiān tshiúnn-kiap.
　　拍 垃 墋 你 的 聖 殿 搶 劫。

1b　　　Hōo Iâ-lōo-sat-líng pìnn-tsiânn thôo-tui, būe-tit-thang koh kiàn-gia̍p.
　　　　使 耶 路 撒 冷 變 成 土 堆，不 得 通 復 建 業。

2a　In tsiong Lí ê lôo-po̍k ê sin-si ,
　　伊 將 你 的 奴 僕 的 身 屍，

2b　　　Kau hōo khong-tiong ê pe-tsiáu tsùe tsia̍h-mi̍h;
　　　　交 給 空 中 的 飛 鳥 做 食 物；

2c　Tsiong Lí sìng ê peh-sìnn ê bah,
　　將 你 聖 的 百 姓 的 肉，

2d　　　Kau hōo tūe-tsiūnn ê iá-siù tsia̍h kàu pá .
　　　　交 給 地 上 的 野 獸 食 到 飽。

3a　Tī Iâ-lōo-sat-líng tsiu-ûi , lâu in ê huih tshin-tshiūnn tsúi;　　
　　在 耶 路 撒 冷 周 圍，留 伊 的 血 親 像 水；

3b　　　Ia̍h bô lâng bâi-tsòng in tsùe kui tui .
　　　　亦 無 人 埋 葬 伊 做 歸 堆。

4a　Gúan hōo gúan keh-piah kok sóo lîng-jio̍k biáu-sī ;
　　阮 使 阮 隔 壁 國 所 凌 辱 藐 視；

4b　　　Hōo gúan sì -ûi ê lâng líng-tshiò ki-tshì.
　　　　使 阮 四 圍 的 人 冷 笑 譏 刺。

5a　Iâ-hô-hua ah, Lí ê siū-khì beh jūa-kú , kàu íng-úan mah?
　　耶 和 華 啊，你 的 怒 氣 要 偌 久，到 永 遠 嗎？

5b　　　Lí ê siū-khì beh tshin-tshiūnn hé to̍h mah?
　　　　你 的 怒 氣 要 親 像 火 to̍h 嗎？

6a　Gūan Lí tsiong Lí ê siū-khì
　　願 你 將 你 的 怒 氣
　　piànn-lo̍h tī hiah-ê m̄-bat Lí ê gūa-tso̍k,
　　傾 落 在 那 些 不 識 你 的 外 族，

6b　　　Í- ki̍p hiah-ê bô kiû-kiò Lí ê miâ ê lia̍t-kok.
　　　　以及 那 些 無 求 叫 你 的 名 的 列 國。

7a　In-ūi in thun-tsia̍h Ngá-kok,
　　因 為 伊 吞 食 雅 各，

7b　　　Hōo i khiā-khí ê sóo-tsāi pha-hng sue-lo̍k.
　　　　使 他 居 起 的 所 在 拋 荒 衰 落。

8a　Kiû Lí m̄-thang kì-tit gúan ê tsóo-kong ê tsūe,
　　求 你 不 通 記 得 阮 的 祖 公 的 罪，

8b　　　Lâi tùi gúan thó tsūe sio̍k-hûe.
　　　　來 對 阮 討 罪 贖 回。

8c　Gūan Lí ê tsû-pi kín-kín lîm-kàu gúan;
　　願 你 的 慈 悲 緊 緊 臨 到 阮；

8d　　　In-ūi gúan lo̍h kàu ki̍k pi-bî ê tūe-ūi tsin m̄-gūan.
　　　　因 為 阮 落 到 極 卑微 的 地 位 真 不 願。

9a　Kiù gúan ê Siōng-tè ah ,
　　救 阮 的 上 帝 啊，　　　　kiû Lí in-ūi Lí ê miâ ê îng-kng pang-tsān gúan;　　　　求 你 因 為 你 的 名 的 榮 光 幫 助 阮；

9b　　　In-ūi Lí ê miâ ê iân-kòo sià-bián gúan ê tsūe lâi kiù gúan.
　　　　因 為 你 的 名 的 緣 故 赦 免 阮 的 罪 來 救 阮。

10a　Siánn-sū tì -kàu gūa-pang-lâng lâi kóng gúan,
　　　甚 事 致 到 外 邦 人 來 講 阮，

10b　　　In ê Siōng-tè tī tó -ūi teh kúan?
　　　　　伊 的 上 帝 在 哪 位 在 管？

10c　Gūan Lí sin Lí ê lôo-po̍k lâu-huih ê uan,
　　　願 你 伸 你 的 奴 僕 流 血 的 冤，

10d　　　Hōo gūa-pang-lâng tsai Lí ê put-búan,
　　　　　使 外 邦 人 知 你 的 不 滿，
　　　　hōo gúan tshin-ba̍k khùann-kìnn gúan ê gūan.
　　　　　使 阮 親 目 看 見 阮 的 願。

11a　Gūan siû-hūan ê thóo-khùi thàu-kàu Lí ê bīn-tsîng;
　　　願 囚 犯 的 嘆 氣 透 到 你 的 面 前；

11b　　　Gūan Lí , tsiàu Lí ê tūa kûan-lîng,
　　　　　願 你，照 你 的 大 權 能，
　　　　pó-tsûn hiah-ê gí -tiānn tio̍h sí ê lâng ê sìnn-miā kian-tīng.
　　　　　保 存 那 些 擬 定 著 死 的 人 的 性 命 堅 定。

12a　Tsú ah, gūan Lí tsiong gúan keh-piah-kok sóo lîng-jio̍k Lí ê lîng-jio̍k,
　　　主 啊, 願 你 將 阮 隔 壁 國 所 凌 辱 你 的 凌 辱，

12b　　　Ke-thinn tshit-pē , kui tī in ê sin-tsiūnn tsùe kiat-kio̍k.
　　　　　加 添 七 倍，歸 在 伊 的 身 上 做 結 局。

13a　Án-ni gúan tsùe Lí ê tsú-sun,
　　　按 呢 阮 做 你 的 子 孫，

13b　　　Lí ê tsháu-tiûnn ê iûnn-kûn,
　　　　　你 的 草 場 的 羊 群，

13c　Beh kám-siā Lí kàu íng-úan ê sî -tāi,
　　　要 感 謝 你 到 永 遠 的 時 代，

13d　　　Beh o -ló Lí ê miâ kàu bān sè -tāi .
　　　　　要 讚 美 你 的 名 到 萬 世 代。