《押韻啟應詩篇》

台語押韻啟應詩篇 80

作者 Tīnn Jî-gio̍k

80　　A-sat ê si; kau hōo Ga̍k-kuann; tiāu īng “ Tsùe kan-tsìng ê pik-ha̍p-hue.”

1a　Í- sik-lia̍t ê bo̍k-tsiá ah, tshūa Iok-sik tshin-tshiūnn iûnn-kûn--ê ,
　　以色 列 的 牧 者 啊，導 約 瑟 親 像 羊 群 者，

1b　　　Kiû Lí ànn hī-khang lâi thiann;
　　　　求 你 俯 耳 孔 來 聽；

1c　Tsē tī ki-lōo-ping ê tíng-bīn--ê ,
　　坐 在 基 路 兵 的 頂 面 者，

1d　　　Kiû Lí huat-tshut kng, hōo i kng -iànn-iànn.
　　　　求 你 發 出 光， 使 它光 映 映。

2a　Tī Í -huat-liân, Piān-ngá-bín, Má-ná-se ê bīn-tsîng,
　　在 以 法 蓮， 便 雅 憫， 瑪 拿 西 的 面 前，
　　tián-tshut Lí ê kûan-lîng,
　　展 出 你 的 權 能，

2b　　　Lâi kiù gúan ê khóo-tsîng.
　　　　來 救 阮 的 苦 情。

3a　Siōng-tè ah, hōo gúan tò-tńg; hōo Lí ê bīn huat-tshut kng;
　　上 帝 啊，使 阮 倒 返；使 你 的 面 發 出 光；

3b　　　Gúan tsiū tit-tio̍h kiù bô siū phah-sǹg.
　　　　阮 就 得 著 救 無 受 打 算。

4a　Bān-kun ê Siōng-tè Iâ-hô-hua ah ,
　　萬 軍 的 上 帝 耶 和 華 啊，

4b　　　Lí ǹg Lí ê peh-sìnn ê kî-tó huat-tshut siū-khì, beh jūa-kú ah?
　　　　你 向 你 的 百 姓 的 祈 禱 發 出 怒 氣，要 偌 久 啊？

5a　Lí īng ba̍k-sái tsùe tsia̍h-mi̍h, hōo in tsia̍h;
　　你 用 目 屎 做 食 物， 使 伊 食；

5b　　　Koh niû tsūe-tsūe ba̍k-sái hōo in lim iáu bô kàu-gia̍h.
　　　　復 量 多 多 目 屎 使 伊 飲 猶 無 到 額。

6a　Lí hōo keh-piah-kok in-ūi gúan lâi sann-tsinn,
　　你 使 隔 壁 國 因 為 阮 來 相 爭，

6b　　　Gúan ê tùi-ti̍k sann-kap teh tshiò tī tshùi-pinn.
　　　　阮 的 對 敵 相 與 在 笑 在 嘴 邊。

7a　Bān-kun ê Siōng-tè ah, hōo gúan tò-tńg,
　　萬 軍 的 上 帝 啊，使 阮 倒 返，
　　hōo Lí ê bīn huat-tshut kng,
　　使 你 的 面 發 出 光，

7b　　　Gúan tsiū tit-tio̍h kiù bô siū phah-sńg.
　　　　阮 就 得 著 救 無 受 打 損。

8a　Lí tùi Ai-ki̍p súa tsi̍t-tsâng phû-tô-tshiū,
　　你 對 埃 及 徙 一 欉 葡 萄 樹，

8b　　　Kúann-tshut lia̍t-pang, lâi tsai i tsùe tsín-kiù.
　　　　趕 出 列 邦， 來 栽 它 做 拯 救。

9a　Lí tī i ê thâu-tsîng piànn-khang thóo-tūe;
　　你 在 它 的 頭 前 傾 空 土 地；

9b　　　I ê kun tìng tshim, tsiū sinn-thùann múa-tūe.
　　　　它 的 根 釘 深 ， 就 生 湠 滿 地。

10a　I ê iánn jia-ba̍t tsiah-ê suann-búe-liu,　　
　它的 影 遮 密 諸 些 山 尾 遛，

10b　　　I ê ki tshin-tshiūnn tsin-hó ê pik-hiunn-tshiū.
　　　　　它 的 枝 親 像 真 好 的 柏 香 樹 。

11a　Huat-tshut i ê ki , tshun kàu Tūa-hái,
　　　發 出 它 的 枝，伸 到 大 海，

11b　　　I ê tîn thùann kàu Tūa-hô kau-kài.
　　　　　它 的 籐 湠 到 大 河 交 界。

12a　Lí siánn-sū thiah-húi i ê lî- pa , hōo i pháinn--khì,
　　　你 啥 事 拆 毀 它 的 籬 笆，使 它 壞 去，

12b　　　Tshut-tsāi it -tshè kè -lōo-lâng bán--i ?
　　　　出 在 一 切 過 路 人 挽 它？

13a　Tshiū-nâ-lāi tshut-lâi ê suann-ti tsau-that--i ,
　　　樹 林 內 出 來 的 山 豬 蹧 蹋 它，

13b　　　Khòng-iá ê tsáu-siù tsia̍h i .
　　　　　曠 野 的 走 獸 食 它。

14a　Bān-kun ê Siōng-tè ah, kiû Lí tò-tńg lâi tshun-tshiú,
　　　萬 軍 的 上 帝 啊，求 你 倒 返 來 伸 手，

14b　　　Tùi thinn ànn-lo̍h khùann, tsiàu-kòo tsit tsâng phû-tô-tshiū,
　　　　　對 天 俯 落 看 ， 照 顧 此 欉 葡 萄 樹，

15a　Pó-hōo Lí tsiànn-tshiú sóo tsai ê phû-tô - ínn,
　　　保 護 你 右 手 所 栽 的 葡 萄 樣，

15b　　　Kap Lí ūi ka-kī sóo kian-kòo ê ki .
　　　　　及 你 為 自 己 所 堅 固 的 枝。

16a　I í- king siū hé sio, siū to tshò;
　　　它已 經 受 火 燒， 受 刀 剉；

16b　　　Ūi-tio̍h Lí ê bīn ê siū-khì, in tsiū bia̍t-bô .
　　　　　為 著 你 的 面 的 怒 氣，伊 就 滅 無。

17a　Gūan Lí ê tshiú hūann tī Lí tsiànn-pîng ê jîn-sū ,
　　　願 你 的 手 按 在 你 右 傍 的 人 士，

17b　　　Tsiū-sī Lí ūi ka-kī sóo kian-kòo ê jîn-tsú.　　
　　　就 是 你 為 自 己 所 堅 固 的 人 子。

18a　Án-ni , gúan tsiū tit-tio̍h bô tò-thè lī-khui Lí oo-pe̍h kiânn;
　　　按 呢，阮 就 得 著 無 倒 退 離 開 你 黑 白 行；

18b　　　Kiû Lí hōo gúan tit-tio̍h u̍ah-miā.
　　　　　求 你 使 阮 得 著 活 命。

19a　Bān-kun ê Siōng-tè Iâ-hô-hua ah , hōo gúan tò-tńg;
　　　萬 軍 的 上 帝 耶 和 華 啊，使 阮 倒 返；

19b　　　Hōo Lí ê bīn huat-tshut kng, gúan tsiū tit-tio̍h kiù, lâi kui ǹg .
　　　　　使 你 的 面 發 出 光， 阮 就 得 著 救，來 歸 向。