《押韻啟應詩篇》

台語押韻啟應詩篇 82

作者 Tīnn Jî-gio̍k

82　　A-sat ê si .

1a　Siōng-tè khiā tī Siōng-tè ê hūe-tiong teh khùann,
　　上 帝 立 在 上 帝 的 會 中 在 看，

1b　　　Tī tsiah-ê sîn-bîng ê tiong-kan teh sím-phùann.
　　　　在 諸 些 神 明 的 中 間 在 審 判 。

2a　Lín sím-phùann bô tsiàu kong-gī lah ,
　　恁 審 判 無 照 公 義 啦，

2b　　　Sûn pháinn-lâng ê tsîng-biān beh kàu tī -sî ah ?
　　　　循 歹 人 的 情 面 要 到 底 時 啊？

3a　Lín tio̍h kā sòng-hiong-lâng kap bô-pē ê kiánn sin-uan;
　　恁 著 給 貧 窮 人 及 無 父 的 子 伸 冤；

3b　　　Tio̍h kā khùn-khóo kap khiàm-kheh ê lâng,
　　　　著 給 困 苦 及 欠 缺 的 人，
　　 kiânn kong-gī hōo in pîng-an .
　　　　行 公 義 使 伊 平 安。

4a　Tio̍h tsín-kiù sòng-hiong kap khiàm-kheh ê lâng,
　　著 拯 救 貧 窮 及 欠 缺 的 人，

4b　　　Hōo in thuat-lī pháinn-lâng ê lô-bāng.
　　　　使 伊 脫 離 歹 人 的 羅 網。

5a　In m̄-tsai, ia̍h bô bîng-lí ; in tī oo-àm-tiong kiânn-lâi kiânn-khì;
　　伊 不 知， 亦 無 明 理；伊在 黑 暗 中 行 來 行 去；

5b　　　Tūe lóng iô-tāng kàu kun-ki .
　　　　地 攏 搖 動 到 根 基。

6a　Gúa bat mn̄g kóng, lín kiám-sī sîn-bîng?
　　我 曾 問 講 ， 恁 豈 是 神 明 ？

6b　　　Lín kiám-sī Tsì-kûan--ê ê kiánn sîn-sìng?
　　　　恁 豈 是 至 高 者 的 子 神 聖 ？

7a　Tsóng-sī lín ūe sí , kap sè-kan lâng tsi̍t-iūnn tio̍h sí ,
　　總 是 恁 會 死，及 世 間 人 一 樣 著 死，

7b　　　Beh sue-bî--khì tshin-tshiūnn kùi-tso̍k án-ni .
　　　　要 衰 微 去 親 像 貴 族 按 呢。

8a　Siōng-tè ah , kiû Lí khí--lâi, sím-phùann sè -kài ;
　　上 帝 啊，求 你 起 來，審 判 世 界；

8b　　　In-ūi Lí beh tit-tio̍h bān-kok tsùe ki-gia̍p bô hān-kài.
　　　　因 為 你 要 得 著 萬 國 做 基 業 無 限 界。