《押韻啟應詩篇》

台語押韻啟應詩篇 85

作者 Tīnn Jî-gio̍k

85　　Khó-la̍h ê hōo-è ê si; kau hōo Ga̍k-kuann.

1a　Iâ-hô-hua ah , Lí í- king si-un tī Lí ê tūe-kài,
　　耶 和 華 啊， 你 已 經 施恩 在 你 的 地 界，

1b　　　Ngá-kok siū-lia̍h ê lâng, Lí kiù i tò--lâi .
　　　　雅 各 受 掠 的 人， 你 救 他 返 來。

2a　Lí sià-bián Lí ê peh-sìnn ê tsūe-ok,
　　你 赦 免 你 的 百 姓 的 罪 惡，

2b　　　Lí jia-khàm in it-tshè ê tsūe-kùa, siū-khì iā kiat-sok.
　　　　你 遮 蓋 伊 一 切 的 罪 過， 怒 氣 也 結 束。

3a　Lí siu-hûe Lí it-tshè ê siū-khì,
　　你 收 回 你 一 切 的 怒 氣，

3b　　　Suah Lí bíng-lia̍t ê lōo-khì.
　　　　息 你 猛 烈 的 怒 氣。

4a　Kiù gúan ê Siōng-tè ah, kiû Lí hōo gúan tò-tńg,
　　救 阮 的 上 帝 啊，求 你 使 阮 返 轉，

4b　　　Suah Lí ǹg gúan ê siū-khì bô koh kā gúan sǹg.
　　　　息 你 向 阮 的 怒 氣 無 復 給 阮 算。

5a　Lí beh siū-khì gúan kàu íng-úan mah?
　　你 要 怒 氣 阮 到 永 遠 嗎？

5b　　　Lí beh tsiong Lí ê siū-khì lâu kàu bān-tāi mah?
　　　　你 要 將 你 的 怒 氣 留 到 萬 代 嗎？

6a　Lí kiám m̄ koh tsiong gúan kiù u̍ah mah?
　　你 豈 不 又 將 阮 救 活 嗎？

6b　　　Hōo Lí ê peh-sìnn in-ūi Lí lâi huann-hí mah?
　　　　使 你 的 百 姓 因 為 你 來 歡 喜 嗎？

7a　Iâ-hô-hua ah, kiû Lí hōo gúan khùann-kìnn Lí ê tsû-ài ;
　　耶 和 華 啊，求 你 使 阮 看 見 你 的 慈 愛；

7b　　　Koh tsiong Lí ê kiù-un siúnn-sù gúan tsit-tāi.
　　　　復 將 你 的 救 恩 賞 賜 阮 此 代。

8a　Gúa gūan thiann Tsûan-lîng ê Iâ-hô-hua sóo beh kóng ê tāi-tsì,
　　我 願 聽 全 能 的 耶 和 華 所 要 講 的 事 情，

8b　　　In -ūi I beh kóng pîng-an ê sìng-tsí.
　　　　因 為 祂 要 講 平 安 的 聖 旨。

8c　I beh tùi I ê peh-sìnn,
　　祂要 對 祂 的 百 姓，
　　kap u̍ah tī I ê tsû-ài ê tsú-bîn tshut-siann,
　　及 活 在 祂 的 慈 愛 的 子 民 出 聲，

8d　　　Hōo in m̄-thang koh khì lām-sám kiânn.
　　　　使 伊 不 通 又 去 濫 糝 行。

9a　I ê kiù-un si̍t-tsāi kūn tī kiann-ùi I ê lâng;
　　祂 的 救 恩 實 在 近 在 驚 畏 祂 的 人；

9b　　　Hōo îng-kng tiàm-tī lán ê kíng-lāi ta̍k-kang.
　　　　使 榮 光 站 在 咱 的 境 內 逐 工。

10a　Tsû-ài kap tsin-si̍t sann tú--tio̍h;
　　　慈 愛 及 真 實 相 遇 著；

10b　　　Kong-gī kap pîng-an sann tsim--tio̍h.　　
　　　公 義 及 平 安 相 親 著。

11a　Tsin-si̍t tùi tūe--ni̍h huat-sinn tshut--lâi,
　　　真 實 對 地 裡 發 生 出 來，

11b　　　Kong-gī tùi thinn khùann--lo̍h--lâi .
　　　　　公 義 對 天 看 落 來。

12a　Iâ-hô-hua beh siúnn-sù hó-mi̍h hōo lán,
　　　耶 和 華 要 賞 賜 好 物 給 咱，

12b　　　Lán ê thóo-tūe beh tshut i ê thóo-sán,
　　　　　咱 的 土 地 要 出 它 的土 產，

13a　Kong-gī beh kiânn tī I ê thâu-tsîng,
　　　公 義 要 行 在 祂 的 頭 前 ，

13b　　　Hōo I ê kha-jiah tsiânn-tsùe lōo bîng-bîng.
　　　　　使 祂 的 腳 跡 成 做 路 明 明。