《押韻啟應詩篇》

台語押韻啟應詩篇 89b

作者 Tīnn Jî-gio̍k

89　　Í-su-la̍h-lâng Í-thàm kà-sī ê si .

25a　Gúa beh hōo i ê tshiú tshun kàu hái ;
　　　我 要 使 他 的 手 伸 到 海；

25b　　　Tsiànn-tshiú tshun kàu tsiah-ê hô ê kau-kài.
　　　　　正 手 伸 到 諸 些 河 的 交 界。

26a　I beh tshing-hoo Gúa kóng, Lí sī gúa ê pē,
　　　他要 稱 呼 我 講， 你 是 我 的 父，

26b　　　Sī gúa ê Siōng-tè , sī kiù gúa ê tsio̍h-pûann ê suann-tsē.
　　　　　是 我 的 上 帝，是 救 我 的 石 磐 之 山 寨。

27a　Gúa ia̍h beh siat-li̍p i tsùe tūa-kiánn,
　　　我 亦 要 設 立 他 做 大 子，

27b　　　Tsùe sè-tsiūnn tē -it-kûan ê kun-ông ê miâ.
　　　　　做 世 上 第 一 高 的 君 王 的 名。

28a　Gúa beh ūi-tio̍h i pó-tsûn Gúa ê tsû-ài kàu íng-úan;
　　　我 要 為 著 他 保 存 我 的 慈 愛 到 永 遠；

28b　　　Gúa kap i sóo li̍p ê iok, tik-khak bô ūann-khúan.
　　　　　我 與 他 所 立 的 約，的 確 無 換 款 。

29a　Gúa ia̍h beh pó-tsûn i ê hōo-è kàu tāi-tāi;
　　　我 亦 要 保 存 他的 後 裔 到 代 代；

29b　　　Hōo i ê pó-tsō tshin-tshiūnn thinn ê kú íng-tsāi.
　　　　　使 他的 寶 座 親 像 天 的 久 永 在。

30a　Siat-sú i ê kiánn-sun pàng-sak Gúa ê lu̍t-huat;
　　　設 使 他 的 子 孫 放 捨 我 的 律 法；

30b　　　　Bô kiânn Gúa ê huat-tōo lâi tô-thuat;
　　　　　無 行 我 的 法 度 來 逃 脫 ；

31a　Pūe-biū Gúa ê lu̍t-lē ,
　　　悖 謬 我 的 律 例，

31b　　　Bô siú Gúa ê kài-bīng--ê ;
　　　　　無 守 我 的 誡 命 的；

32a　Gúa tsiū beh īng kúai-á tsik-hu̍at in ê kè-sit ;
　　　我 就 要 用 枴 仔 責 罰 伊 的 過 失；

32b　　　Īng pinn tsik-hu̍at in ê tsūe-ok tsi̍t-pit tsi̍t-pit .
　　　　　用 鞭 責 罰 伊 的 罪 惡 一 筆 一 筆。

33a　Tsóng-sī Gúa tik-khak bô tsiong Gúa ê tsû-ài it-tsīn tùi i siu-hûe;
　　　總 是 我 的 確 無 將 我 的 慈 愛 一 盡 對 他收 回；

33b　　　Ia̍h tik-khak bô hōo Gúa ê sìn-si̍t tsok-hùe.
　　　　　亦 的 確 無 使 我 的 信 實 作 廢。

34a　Gúa tik-khak bô sit gúa ê iok,
　　　我 的 確 無 失 我 的 約，

34b　　　Ia̍h bô kúe-ūann Gúa ê tshùi sóo kóng ê iok-sok.
　　　　　亦 無 改 換 我 的 嘴 所 講 的 約 束。

35a　Gúa tsi̍t-pái kí ka-kī ê sìng-kiat lâi sè-iok.
　　　我 一 次 指 自 己 的 聖 潔 來 誓 約。

35b　　 Gúa kuat-tùan bô khì-sak kap Tāi-pi̍t ê sè-iok.
　　　　　我 決 斷 無 棄 捨 和 大 闢 的 誓 約。

36a　I ê hōo-è beh thûan kàu íng-úan būe-tit-thang sǹg;
　　　他的 後裔 要 傳 到 永 遠 不 得 通 算；

36b　　　I ê pó-tsō tī Gúa ê bīn-tsîng, tshin-tshiūnn ji̍t ê kú-tn̂g;
　　　　　他的 寶 座 在 我 的 面 前， 親 像 日 的 久 長；

37a　Ia̍h tshin-tshiūnn ge̍h kiàn-li̍p bô thîng.
　　　亦 親 像 月 建 立 無 停。

37b　　　Koh tshin-tshiūnn thinn-tíng khak-si̍t ê kan-tsìng.
　　　　　又 親 像 天 頂 確 實 的 干 證。

38a　Tsóng-sī Lí ū siū-khì Lí ê siū-buah-iû--ê ,
　　　總 是 你 有 怒 氣 你 的 受 抹 油 者，

38b　　　Iàm-tsiān khì-sak i , hōo i sit-sè .
　　　　　厭 賤 棄 捨 他，使 他 失 勢。

39a　Lí í -king iàm-òonn kap Lí ê lôo-po̍k sóo li̍p ê iok,
　　　你 已 經 厭 惡 和 你 的 奴 僕 所 立 的 約，

39b　　　Tsiong i ê bián-liû tsau-that tī tūe--ni̍h tsùe kiat-kio̍k.
　　　　　將 他 的 冕 旒 糟 蹋 在 地 裡 做 結 局。

40a　Lí í -king thiah i it-tshè ê lî- pa hōo in pháinn,
　　　你 已 經 拆 他 一 切 的 籬 笆 使 伊 壞，

40b　　　Hōo i ê hūe-sóo pìnn tsùe pha-hng ê sóo-tsāi.
　　　　　使 他 的 會 所 變 做 拋 荒 的 所 在。

41a　Kè-lōo -lâng lóng tshiúnn-the̍h i ;
　　　過 路 人 攏 搶 提 他；

41b　　　I tsiânn-tsùe keh-piah kok sóo lîng-jio̍k ê tshiò-pìnn.
　　　　　他 成 做 隔 壁 國 所 凌 辱 的 笑 柄。

42a　Lí hōo i ê tùi-ti̍k ê tsiànn-tshiú kia̍h kûan.
　　　你 使 他 的 對 敵 的 右 手 舉 高。

42b　　　Hōo i ê kiû-siû lóng huann-hí sing-kûan.
　　　　　使 他 的 仇 讎 攏 歡 喜 升 高。

43a　Lí hōo i ê to-kiàm tó-mî kiàn-siàu,
　　　你 使 他 的 刀 劍 倒 鋩 見 誚，

43b　　　Hōo i tī kau-tsiàn ê sî khiā-būe-tiâu.
　　　　　使 他在 交 戰 的 時 立 不 住。

44a　Lí hōo i ê îng-hián bô--khì,
　　　你 使 他 的 榮 顯 無 去，

44b　　　Tsiong i ê pó-tsō tshia-tó tī tūe--ni̍h.
　　　　　將 他 的 寶 座 推 倒 在 地 裡。

45a　Lí kiám-tsió i tshing-liân ê ji̍t-tsí;
　　　你 減 少 他 青 年 的 日 子；

45b　　　Koh hōo i múa-múa kiàn-siàu sit-tsì .
　　　　　又 使 他 滿 滿 見 誚 失 志。

46a　Iâ-hô-hua ah , Lí beh jūa-kú ka-kī hong-so̍h,
　　　耶 和 華 啊， 你 要 偌 久 自 己 封 鎖，

46b　　　Kàu íng-úan mah?
　　　　　到 永 遠 嗎？

46c　Lí ê siū-khì tshin-tshiūnn hé to̍h,
　　　你 的 怒 氣 親 像 火 to̍h，

46d　　　Beh jūa-kú lah?
　　　　　要 偌 久 啦？

47a　Kiû Lí kì-tit gúa ê sî-kan,
　　　求 你 記 得 我 的 時 間，

47b　　　Tsáinn-iūnn hiah té koh tsió lah !
　　　　　怎 樣 許 短 又 少 啦！

47c　Lí tshòng-tsō it-tshè ê lâng tī sè-kan,
　　　你 創 造 一 切 的 人 在 世 間，

47d　　　Hōo in kàu hiah khang-hu lah !
　　　　　使 伊 到 許 空 虛 啦！

48a　Sím-mi̍h-lâng ūe tn̂g-tn̂g u̍ah, bô kìnn-tio̍h sí lah,
　　　甚 麼 人 會 長 長 活，無 見 著 死 啦，

48b　　　Ūe kiù i ê lîng-hûn thuat-lī im-kan ê kûan-pìng lah ?
　　　　　會 救 他 的 靈 魂 脫 離 陰 間 的 權 柄 啦？

49a　Tsú ah , lí tsîng pîn Lí ê sìn-si̍t, tùi Tāi-pi̍t sóo iok-sok--ê ,
　　　主 啊，你 前 憑 你 的 信 實，對 大 闢 所 約 束 的，

49b　　　Hiah-ê tsû-ài tann tī tó -ūi leh ?　　
　　　那 些 慈 愛 今 在 哪 位 咧？

50a　Tsú ah , kiû Lí kì-liām Lí ê lôo-po̍k sóo siū ê lîng-jio̍k,
　　　主 啊，求 你 記 念 你 的 奴 僕 所 受 的 凌 辱，

50b　　　Kì -liām gúa tsáinn-iūnn tsûn tī gúa sim-lāi ê khut-jio̍k;
　　　　　記 念 我 怎 樣 存 在 我 心 內 的 屈 辱；
　　　　　It -tshè kiông-sīng ê peh-sìnn ê lîng-jio̍k.
　　　　　一 切 強 盛 的 百 姓 的 凌 辱。

51a　Iâ-hô-hua ah , Lí ê tùi-ti̍k teh lîng-jio̍k,
　　　耶 和 華 啊， 你 的 對 敵 在 凌 辱，

51b　　　Tsiū-sī teh tui-kúann Lí siū buah-iû--ê ê tsong-tsik beh bú-jio̍k.
　　　　　就 是 在 追 趕 你 受 抹 油 者 的 蹤 跡 要 侮 辱。

52a　Tio̍h o -ló Iâ-hô-hua kàu íng-úan bô thîng,
　　　著 讚 美 耶 和 華 到 永 遠 無 停，

52b　　　A- bīng, koh A- bīng.
　　　　　阿 們， 又 阿 們。