《《陳夫人》日譯台ê台灣小說》

《陳夫人》第一部 第八章

作者 庄司總一　著 楊東傑 指導 林俊育 台譯

清文ê決意真堅定，安子雖然有kā伊苦勤，但無法改變伊ê決定。安子期待這對in翁來講是好ê試煉，以後有新生活ê出發，ǹg望對in翁本身或是對in兩人會成做thang歡喜ê tāi-tsì。

退出官界無久，清文就受聘去長老教ê中學教冊，he是長老教會經營ê學校，學生差不多全部 lóng是台灣人。起初清文頭殼內對學校教師有輕視感，認為 in 是無法度駛向人生大海ê細koh無力ê小船，或者是一旦出帆就遇tio̍h悽慘海難hit種人。事實上，hit當時景氣好kah會驚人，tuì遠遠來到殖民地ê教員中，mā有teh混日子ê流浪者。但是，清文實際做老師了後，教育事業並m̄是伊所想ehiah5-ni̍h無價值koh無效果的事業。一個原因是伊m̄免靠做老師來生活，而且hit間學校ê前身是伊細漢時所讀ê學堂，也to̍h是伊ê教育搖籃地ê關係，hōo伊ē-tàng有親密感來教學。尤其這是宗教教育ê學園，環境自然清純，氣氛mā真好，所以伊對教員ê看法有改變。

辭掉官廳ê頭路，逃出濁流，開始ē-tàng靜思自由學習ê身份，清文感覺顛倒放落重擔，感覺真輕鬆。Hit時伊常常tī食暗頓tsìn前，陪安子出去散步，tiānn-tiānn行向南pîng ê郊外去。Hit-tah是台灣人ê墓地，m̄是bueh去掃墓，是因為tī hia ē-tàng靜思，thang好來敬虔祈禱。

起起落落ê曠野，一面是重重疊疊ê墓蓋(khàm)teh,是叫做風水ê馬蹄形扁扁土饅頭ê墓。Hit-eph5òng-naih ê土崙á對面有一段 kuân起來ê所在，hit-tah是無墓地ê草坪，看起來有各各他ê頭殼碗(譯註：耶穌受釘十字架ê所在)ê款式，所以清文in兩人kā伊號做「各各他之丘」。Khiā tī hit-ê土崙á ê頂kuân,對市區參雜厝頂看過去，ē-tàng恍忽看tio̍h台灣中央山脈tī雲中連綿不斷，mā ē-tàng眺望tī-hia附近ê城牆殘骸。Hit-îkā古早市街圍起來ê婉轉城牆，也被文明ê潮流衝擊崩壞去，兩百年前kah-ná夢teh過去ê清朝遺跡，tsit-má kan-ta一部分留落來，石灰泥kap石頭崩落，露出紅土，雜草茂盛。Hit-ê留落來ê城牆一端，有一個叫做「大南門」ê城門。沿hit棟雙重厝頂四界生湠青苔，tsit種古城ê雅氣會引起人ê藝術感，時常有人tī-hia tshāi起畫布動起畫筆。土崙á ê草坪頂面，有tsiânn十個thǹg赤腳ê台灣gín-á發出可愛ê ki-ki聲，悠哉悠哉lóng無驚惶ê款式，tī hia牽牛食草。黃牛kap水牛ê腳脊phiann頂，有台灣鳥kah-ná khiā-tī島嶼ê石頭頂面，一屑á都無驚，牛mā歡喜kā腳脊phiann借in khiā。日頭一下落山，雀鳥á kap白頭殼á雖罔無風koh kah-ná hōo強烈ê風吹tio̍h,快速飛向樹林內入去。有時tsūn tsit隻黃鷹受beh落西山ê日頭照tio̍h，展開金色ê翅飛過天空。空氣不時lóng乾khok-khok，tī街路起ing-ia ê季節風，tī野外也輕鬆吹過野草kap灌木。熱天常常beh有雷公雨ê款式，碧藍ê天空無tiunn-tî to̍h出現滿天一大堆雄大ê積亂雲(譯註：十種雲形之一)，tsit時ê日落天色hōo欣賞ê人kah-ná心內染tio̍h紅，koh-khah suí。

Peh起tsit-ê土崙á ê沿路，清明節ê時tsūn,會tú-tio̍h帶香、銀紙、祭物來掃墓或是拾(khioh)骨ê人，mā tiānn-tiānn聽tio̍h父母過往ê少女或死翁ê寡婦哀哭ê聲。

有一工，清文夫婦kap一個掃墓了bueh tńg去ê老tsa-bóo人相閃身，hit時來到距離約五十(公尺，清文kah-ná想tio̍h啥物tāi-tsì,對安子講：「小等leh!」就趕緊se̍h翻頭去jiok hit-ê tsa-bóo人。

「果然認m̄-tio̍h人。」清文隨時翻頭tńg來，感覺小khuá pháinn勢講：
「想講一定是母親，結果m̄是，實在有夠像(sîng)lah。」
「Ai-ah, án-ne真無tshái。」
安子ua̍t頭來看漸漸消失tī林投樹林中ê老人ê背影，心內感覺tio̍h清文發現m̄是親生母親ê懷念滋味kap in翁知影hit-ê人m̄是親生母親ê遺憾。清文面露苦笑，但mā-m̄是hiah-ni̍h灰心喪志。但是，tsit-m想m̄-tio̍h雄雄狂狂jiok去，可見伊ê生母ê形影顯然iáu未消失。
「你對母親ê tāi-tsì iáu無bē記得neh?」
「實在是bē記得ê款，suah去認 m̄-tio̍h人。」
「無lah, m̄是面形ê記憶問題....」
「是無bē記得，面形iáu小khuá會記得，m̄-koh細漢時ê記憶khah無hiah穩當，而且kan-ta見面一二pái nā-tiānn。但是，因為是父親出手，應該m̄是眾人所講ê hiah-ni̍h無好ê tsa-bóo人。」

清文無驚，以前連tuì in bóo都隱瞞來講，tsit-má hiah-ni̍h坦白án-ne講，小khuá不可思議。這kah-ná是看bē起tsit-má無正義ê老母，或是隱瞞家己ê見笑事(tāi)，顛倒應該講是出tī無虛偽ê懷念所自然講出來ê話。Tuì伊ê目色ē-tàng看出來，m̄-nā是tsit件tāi-tsì nā-tiānn，最近清文對安子無拘束ê坦白表示態度，安子感覺真歡喜。

「Tuì瑞文聽tio̍h你ê運命了後，我對母親ê tāi-tsì常常掛tī心肝頭，真可憐neh,tsit-má m̄知bueh án怎tsiah好？kám講無論án怎tshuē lóng無法度見面？」

「可能是án-ne?聽講hit當時tńg去tuà-tī嘉義附近田庄ê外家厝，但以後去toh位lóng m̄知消息。Tāi-tsì也已經過了二十guā年，mā有可能往生ah。橫直tsit-má koh再見面，mā無什麼路用ê款。」

「Bē án-ne lah, 若是神賜大恩，一定會引tshuā來會合。我mā感覺你真可憐，我一直認為你是受慣養乘大漢ê tsa-poo-gín-á,但是你有想bē到ê苦楚neh。」

「Mā無講有啥物苦楚lah, tuì家己ê出世來講，應該是siunn過受恩賜。若是hit當時母kiánn lóng hōo人趕出，咱兩人to̍h無法度有tsit-má ê結果，現此時可能tī toh位lâ-sâm ê田庄，做一個下賤ê苦工或農夫。Tuì tsit點來講，我一直非常感謝老父阿山。」

「話雖然是án-ne講，你若bē記得你看bē起抹大拉ê馬利亞(譯註：福音書ê人物)ê tāi-tsì,he可能m̄是利己主義。」

「M̄是看bē起lah, 但設使講現實ê親生母親是下賤ê,hit-ê血tī我ê血中淨化，變成靈魂中偉大ê母性。所以，寧可mài見面khah好。」

Tsit種運命ê人常有一句話án-ne講─m̄認輸看破，kám-m̄是？或是伊ê心本來to̍h看bē起koh恨母親，驚去見面，或者無關心？。不管是toh一種情形，tsit-má tuì認錯人ê事來看，安子並無ǹg望聽伊坦白講：「無論如何想bueh見面to̍h是lah。」雖然是án-ne講，對記憶無清楚ê母親hiah-ni̍h真實teh愛慕，安子m̄是ǹg望清文有浪漫主義ê感傷，想tio̍h三年做官生活hōo拑住世俗、乖癖、受氣、懊惱ê靈魂，ài伊ē-tàng洗清hiah-ê lâ-sâm,回復單純ê精神。

「咱án-ne ê祈禱，kám無sîng Millet(譯註：法國畫家)所畫『晚鐘』內面ê夫婦？咱雖然m̄是農夫，mā會體會農夫ê心，無體會mā bē-suah得lah。」

Peh上土崙á，安子ê面hōo曰落ê天色染kah變玫瑰色，小khuá默禱了後án-ne講。清文小khuá微笑，恬恬無應話。安子感覺無掛慮ta̍k項事，thang講伊是恬靜溫和ê翁婿。「掖種ê女人á是切割石頭ê人，Millet tsit-ê畫家tī平凡ê生活中，確認真實ê suí kap價值，其中mā有耶穌ê精神。你認為án-ne ê想是弱者ê哲學，m̄-koh人類ê本質是軟弱ê,所以人類ê堅強有一定ê限度。你是一個真好ê腳數(siàu)，精神mā真旺盛，當然mā有野心。你想bueh做官，你講這是大失敗，總是失敗m̄是hit件tāi-tsì,我想是你本身ê問題。加強提高家己ê事要求社會是無tshái工lah。Ná親像玉螺ê殼是借來ê,容意剝離、毀壞，內面是hiah-ni̍h-á軟弱。你雖然ē-tàng做官，若記tiâu耶穌所講ê,想bueh做頭ê tio̍h做人ê路尾....我想你m̄免艱苦kah hiah悽慘落魄。無lah, 你iáu是辭掉khah好，我實際mā 無真ài你做威嚴ê官吏。」

安子第一pái án-ne對in翁講kah hiah坦白，而且無客氣用說教ê口氣kā in翁khau洗。兩人融入tsit-ê土崙á ê美麗大自然，浸tī心胸開闊ê敬虔氣氛中，清文kah-ná尾hōo人踏 teh咬人bē-tio̍h ê獅á真溫和，實在是不可思議。Kah-ná悔恨家己ê過去，ànn耳孔聽in bóo句句lóng有道理koh充滿真情ê話，後來ná親像恬恬á開門ê款開嘴講。

「確實....我確實真驕傲自大，lóng無顧慮家己ê腳下，kan-ta想bueh peh梯上天，因此失敗kah sia̍k落來，佳哉iáu未peh到siunn-kuân ê所在，結果無受大ê傷害。我雖然m̄是戇kah lóng無注意tio̍h你tú-tsiah所講hiah-ê tāi-tsì,只是無法度克制流tī我身軀中ê血，我繼承支那南部人ê血，個性好強，有物慾ê野心。若是tī別ê環境中─譬喻講我若生做支那人─個性會koh-khah激烈，mā有可能變成權謀弄術ê人。」

「M̄-koh你tsit-má kám m̄是日本人ah,比普通ê日本人有koh-khah kuân ê教養kap真深ê學問，是一個堂堂ê日本人。」「是ah, 我感覺戴tio̍h日本人ê名是光榮ê tāi-tsì,m̄-bat後悔過，若無thài有法度kap你作伙，tsit-má tī-tsia mā iáu ē-tàng作伙。我所講ê血m̄是指民族上ê偏見hit種感情上ê tāi-tsì,請你mài誤解。He kan-ta是個性ê問題，所以tī辦公室致使hōo人boi-khot(boycott杯葛)，我無想講是hōo人歧視，mā buē án-ne想。我想tio̍h是家己錯誤ê態度，bē-sái埋怨tit。....Ueh, 安子，當初你來到陳家，tī陳家ê風俗改良kap提升生活水準ê作法，保守思想ê你kap進步思想ê我，意見上有差別。而且無管你tī邊á不安kah流tshìn汗，我照我家己ê意思去做。厝裡ê人目頭結結對我起反感做對，我卻傲氣十足phah胸坎á對你講：『若採用溫柔、phôo-thánn ê方法，對方反tńg會展威起來。威嚴ê高姿態....』我對家族高壓ê權勢主義，tsit-má想起來，已經降臨tī我ê身上。這是神對我ê警戒教示，我lóng無責備埋怨啥人。....但是，我最近漸漸心平氣和起來，尤其是kap你作伙來tsia散步，心情有不可思議ê平和氣氛。」

清文khiā起來，伸腰hah-hi一聲，深深kā黃昏ê大氣吸入去。伊忽然想起前幾工tī學校教學生ê Williams Wordsworth(譯註：英國詩人, 1770-1850)作ê《美麗ê黃昏》詩，細聲唸出第一tsuā kap最後一tsuā:

It is a beauteoos evening, calm and free,....
美麗ê黃昏，心靜自由自在
God being with thee when we know it not .
咱m̄知ê中間，神常

安子聽了in翁坦白ê懺悔kap靜靜自我反省ê話真受感動，khiā起來uá靠tī in翁ê身上，請伊koh kā hit首詩唱一遍。伊kā清文ûn-ûn-á發音ê詩句當做音樂來聽，忽然感覺想bueh kā伊lám-ân-ân ê愛心，充滿伊ê胸坎，目屎teh bueh 流落來。清文真艱苦心。Tsit tsūn心內iáu bē-tàng穩定，bē-tàng自由，無想講當真ê告白中mā隱藏虛假。

伊tshuē求心靈ê安歇是事實，但是伊無真正得tio̍h in bóo所想ê安歇。Tī hit-ê「各各他之丘」光輝ê黃昏，靈魂鎮靜落來，變成謙虛敬虔ê人，ē-tàng kap古早人仝款相信創世記kap基督ê記戴。但是，koh再落去世俗ê街路，hōo家族制度ê牆包圍起來，一踏入書房，hit-ê信仰就koh崩盤去。閱讀《向權力ê意志》等ê冊，hōo「Tio̍h強起來！tio̍h強起來！」ê huah聲驚kah起煩惱。─我tio̍h kā力量kap才能用tī啥物所在tsiah好neh?一生做一個神學校ê教師，我kám會滿足？是m̄是應該滿足 ? 若是持看破ê態度，可能無久就陷落隋性，真容易就ē-tàng過安隱ê生活。Án-ne講起來，我kám hiah簡單屈服tī容？無ài平和、安靜koh穩定，顛倒對人生有激烈奮鬥ê性格，kā伊硬at彎曲來減弱伊ê力量，án-ne kám tsiah是真正美好生活方式？「弱肉強食，適者生存」科學講法ê戰爭kap革命─tsit-ê科學ê神話帶hōo人類殘酷ê殺人。但是，耶穌ê神話kiám無仝款殺害人類？為了想bueh淨化靈魂suah kā靈魂變弱，無kā理想hōo人類suah hōo人類幻覺。

總講一句，清文並無in bóo所想hiah-ni̍h心情定落來，夢真簡單破碎loh, 家己發展被阻止ê憤怒kap失意，kah-ná用嗎啡止胃痛仝款，kan-ta用宗教ê熱情來掩khàm。

而且tī tsit-ê時tsūn,厝內發生真費氣ê問題。財產繼承ê tāi-tsì重新koh再giâ起，漸漸具體化起來。清文退出官界ê現此時，無必要硬進行ê tāi-tsì,事實上已經bē記得了了ah, 因為當時家己講起ê,tsit-má suah buē救tit。

全部眷屬tiānn-tiānn聚集tī大廳一再協議，習慣上是所有ê繼承人平均分配財產。但是，雖然有平等分配ê原則，實際問題是無可能正確公平分配，所以各自意見無仝或糾紛會發生。事實是小弟景文所分配ná像比阿兄超過無應該ê tsē。清文無歡喜。He m̄是份額tsē少ê問題，是因為大家對小弟偏袒ê態度siunn過明顯。話雖然是án-ne講，因為he對清文來講mā m̄是金額大kah無重視bē-sái得，目tsiu kheh-kheh khah大方leh就無tāi-tsì。但是伊忍耐無夠提出異議，suah無意中tio̍h固執主張。Tāi-tsì從án-ne由金錢變成感情問題。起初大家iáu對伊ê異議輕輕來接受，或是siōng-tsē kā伊諷刺ê程度。但是清文頭尾無bueh讓步，suah尾大家團結，ǹg伊表示露骨ê挑戰態度。

「各位，我再三提起，我反對大家`的ê意見，決斷m̄是出tī貪婪心，請大家了解。無m̄-tio̍h,小弟景文確實勤勉工作，hōo陳家繁榮，增加家產，我mā十分承認伊有功勞tī-teh,咱全家tio̍h kā伊感謝。但是，tuì另外一方面來講，這若是無陳家ê背景kap資產，mā是無法度有tsit-máê家產。本來咱習慣『九世同堂』ê方式，無論經過幾代lóng無bueh分厝，誇耀大家族主義，總講一句，家產m̄是特定某一人ê專有，我想應該是附屬tī tsit-ê家族ê物件....」清文無用khah 好嘹解ê講法，用硬bueh說服小khuá有恐嚇ê演說語氣。早前若用tsit種ê手段，可能有相當威壓效果。但是，tsit-má jú án-ne做，大家jú無bueh關心，jú增加輕蔑kap反彈而已。大家並無乖乖忍受，顛倒私下tshi-tshi-tshu̍h-tshu̍h無teh聽伊講話，有人嘴舌tak-tak叫，也有人講明挑戰。清文四界看看無一個贊同伊ê講法，ē-sái講是「四面楚歌」ê狀態。伊tsit-má tsiah知影大家對伊相當尊敬ê想法是大錯誤，he是kan-ta對伊ê官服ê敬畏kap驚惶niā-niā,伊tsit時慘痛覺醒。伊想bueh求同意kap支援ê老父阿山，mā是表情無好，用責備ê口氣講。

「Ueh, 清文，你小khuá khah撙節(tsún-tsat)leh,講kah一大堆道理來反對。但是這經過眾親族ê充分協議，mā是眾人目tsiu金金teh看所決議ê,絕對bē有無公平ê tāi-tsì,kám-m̄是？」

老父阿山對tsit-iki5ánn hiah-ni̍h認真反對真bē-tàng了解，感覺非常苦惱。準講對 in kiann2e5心理 ē-tàng了解，伊ê人mā bē硬bueh khiā出來為伊辯護。Tsit項 tāi-tsìê決定並m̄是多數決，是照慣例尊重長輩ê意見，所以若阿山有一點 á熱心，發言表示權威，清文ê主張mā-m̄是講bē通過。M̄-koh阿山ê個性是一個無 ài爭執koh嫌麻煩ê人，一屑 á都無bueh發威令。

清文ê目tsiu向邊 âe景文 lió一下，伊是當面ê對敵，卻無因為多數贊同伊ê意見表示得意，mā 無露出一屑 á興奮ê款式，真是不可思議。Hit種一屑á在意都無ê款式，清文想bueh kap伊講話都感覺真倦(siān)，伊從 án-ne uat過去看三男瑞文，但mā無得tio̍h uá靠。雖然kuí-nā-páiê協議，瑞文lóng有參加，但tsit-má卻kah-ná啞口bē講話。伊感覺無論家己án怎主張、要求，大局lóng bē有改變，該得ê當然lóng得會tio̍h,所以看起來真冷靜ê款式；mā有可能想講無小心加講話，家己應得ê份額會hōo人減少去，所以卑鄙(phí)張持(tiunn-tî)無發言。

清文koh再對大家發言，但是聲勢kap面色lóng顯出khah輸面ê弱勢。

「顯然大家對我有誤解tī-teh,我絕對m̄是自私自利teh講話，只是想講我是長男ê關係，為tio̍h家族ê興起，tio̍h照顧 tsit-ê大家族。景文家己積聚ê財產當然tio̍h歸伊所得，但是為 tio̍h tsit-ê家庭工作，來hoo伊二十甲ê不動產，我認為有khah過份淡薄....」

講到tsia,厝內ê一位阿叔khiā起來，身軀 ànn過桌 á,揮手劇烈反駁清文講：

「Ueh, 清文，tsit-má mài-koh講 hiah-ê哭 iâue tāi-tsì,你講景文ê功勞額過份？你kám有啥物義理thang講？Kap伊比起來你到底為家庭盡過啥物氣力？你去日本留學，中學到大學十年中間開掉 guā-tsē錢？而且娶一個日本bóo tńg來，起新厝、食美食、穿好衫，奢華浪費，你kám無想tio̍h tsiah-ê tāi-tsì?」
「阿叔ê話有khah超過，我並無感覺有hiah-ni̍h奢華。」
清文án-ne應話講，四界就發出「mài講白賊」、「mài烏白講」等ê反駁kap罵聲，清文對tsiah-ê話辯解，大家koh-khah喧嚷起來，照án-ne落去會變成bē-tàng收suah。
「大家靜落來！大家靜落來！」
坐tī主席位名叫林明哲ê老人用sau聲來壓制大家，帶龜殼框ê老花目鏡，留白山羊á 鬚，kah-ná鶴瘦抽ê身材，財大koh學識教養kuân ê氣質。Tī分財產等ê場合，lóng會uì家族親戚外面請一位tsit款德高望眾ê人，拜託伊來判斷tāi-tsìê是非曲直tsiah做決議，總講一句 to̍h是扮演kah-ná議長ê角色。

等候大家安靜落來，林先生就寬寬 á 開嘴講話。聲帶kah-ná生苔，用低低koh粗粗esau5聲，齒縫(phāng)真tsē,發音mā無真清楚，顛倒 hōo人感覺kah-ná生sian hiah-ni̍h沉重。

「清文大哥，你所講êmā有一kuá道理 tī-teh,我 mā bē-tàng無kā你承認，但是繼承者m̄是kan-ta你kap景文nā-tiānn，有十一房hiah-ni̍h tsē。若接納你ê要求，其他ê人mā是會講話，mā bē-sái無聽 inê話。Án-ne tāi-tsì m̄知 tio̍h到 tang時tsiah會有結論。當然koh無juā久，你就 ē-tàng成做家長，原來ê陳家tuì tsit-má開始就變小，tsit項事mā m̄是值得慶賀îkám是？我有了解你ê感受，但是 án-nêe家庭分裂，本厝就會縮小是當然ê tāi-tsì,mā是真不得已，有聽講這是lín兄弟所希望來決定ê。第一來講，阿山老先生 iáu真勇健，何必tio̍h hiah-ni̍h麻煩neh,這實在是....」林先生話講到tsia suah起含糊。實際上，老父在世ê時 to̍h bueh分財產，除非是老父已經衰老或破病來失去執行家政ê能力，若無因為兄弟之爭成做一家 bē和ê原因，絕對m̄是名譽ê tāi-tsì。林先生無意中胡裡胡塗表明 tsit點遺憾ê意思，但事到如今講啥lóng無路用 loh。

「若án-ne....照阿兄所講ê,景文先生ê功勞額有khah超過一kuá,其實我 mā有想過....是tsē少加減ah。」林先生賢明附加但書，用是m̄是 ē-tàng讓一步ê口氣，kā視線移向景文ê面。林先生是一個富翁koh德高望眾，tsit件事bē-sái kap伊暗中勾結tit,hōo伊án-ne講景文suah心內tshiak一下。但是，先生ê話無特別硬ài伊讓步ê意思。
「你看án怎？景文君，二十甲中間讓五甲左右 ē-sái得bē?」
「先生，講 kah ná sing-lí買賣leh,án-ne m̄好 lah,這是神聖ê財產繼承。但是，我無家己提出啥物要求，完全委託在座各位尊長ê安排。若講kan-ta分一隻豬 á-kiánn hōo我，mā是無可奈何ê tāi-tsì。我bē去吊tāu自殺lah,請免煩惱。」

林老先生因為一直bū-sà-sà bē收suahe5問題當teh厭氣，終其尾用講sńg笑ê口氣來問景文ê意見，á景文用koh-khah gia̍t-khiate5話kā伊回答，結局大家緊張ê氣氛忽然化解suah大聲笑起來。Inê笑聲ná親像波浪向清文湧過來，伊感覺無啥物好笑，是伊hōo 人做笑柄而已。林老先生etsit5句「讓步」，本底想bueh向沉重ê場面投入一服清涼劑，無想講藥效siunn過強suah全場大聲笑起來。林老先生從án-ne改用正經ê口氣，對身為家長ê阿山小khuá有批評ê語氣講。

「阿山先生，你一向對tāi-tsì lóng無要無緊，但是tsit項tāi-tsì是你一生kan-ta一páiê重大問題，請你tio̍h慎重考慮，tú-tsiah講ê二十甲土地，希望你kā心內話講出來。」

「無lah,我pháinn講出來lah。若接納長男ê意見會án怎？次男一定bē服，講kah tio̍h-bueh吊tāu自殺。這一定tio̍h請你定奪tsiah會解決。M̄-koh我mā認為二十甲有khah無合理，若一半比較khah適當lah。」

阿山 án-ne一講，大家隨停止笑，又koh開始雜嘴反對，林老先生目頭結結。無論阿山是 juā-ni̍h-á好好先生，對siōng尊重ê人mā bē-sái態度hiah-ni̍h無大無細，伊感慨世風淺薄，bueh án怎來處理tú-tsiahe5場面，伊sa無寮á門。Tsit時，清文突然自暴自棄叫講。
「Mài koh講ah lah,林先生，請照起初ê協定去做。」
「Ai-ah, án-ne問題就完滿解決loh, 最後就是抽籤ê手續。」林老先生擔頭輕鬆落來，催辦事ê人緊進行。
親tsiânn中間負責辦事ê人，開始翻閱財產目錄kap相關ê文件。
祭祀公業(祭祀祖先、kiánn孫ê教育、慈善事業費)、養贍(父母ê養老kap葬式費)、嫁妝（女子ê出嫁費用），tsit三種金額扣除了後分配hōo眾繼承人。Tsit-ê財產包含現金、不動產、日用家具等，分做平大份了後照抽籤來分配。

「Án-ne最後ê決定：XX郡XX庄ê水田六甲做第一號─天，第二號─地，第三號是安平街ê鹽田─人....」

照án-ne kā每一份財產用天地人、春夏秋冬、仁義禮信等做符號，koh kā每一個符號寫tiàm紙裡捲起來做簽條。然後選一個黃道吉日，koh再tī親族ê嚴格環視之下，進行抽籤分配。

一直爭執落來ê財產分配問題從án-ne解決好勢，清文感覺家己真戇，為什麼tio̍h hiah-ni̍h認真去爭取neh?伊所要求em̄5是金錢，mā-m̄是土地，只不過是希望hōo大家承認伊做一個長男ê權利，保tiâu伊ê體面nā-tiānn。伊án-ne用心去爭取，結果koh-khah慘，顛倒面子無了了，變kah真無光彩。

清文忽然感覺世間真無聊，就是tú-tio̍h強風大湧，mā-tio̍h ài有戰鬥ê對象，tsit-má kan-ta面對家己，心內充滿各種ê思想，但是m̄知bueh án怎去克服處理。心理有病ah, kui身軀 lóng無氣力，伊tsiah三十一歲nā-tiānn，就面對現實中不可思議ê厭倦階段。Án-ne落去bē-sái得，kan-ta uá靠信仰─而且he是參雜理智ê自己信仰，kah-ná親像 lim嗎啡hōo家己睏落去，án-ne是bē-sái得。

Tī tsit款ê情形下，清文kap ta̍k人仝款，忽然想bueh去旅行。伊bat想過tio̍h出國旅行一tsuā,促成tsit-ê計畫馬上實行ê動機是伊tú-tio̍h一件tāi-tsì。

是聖誕節hit暗ê tāi-tsì,清文想bueh去安子ê教會看看leh。
「今暗我想bueh穿台灣服去，你感覺怎樣？」
清文出門tsìn前真罕得 án-ne問，平常出外lóng是穿西裝或日本和服。

「我畢業tńg來ê時，老母替我訂做hit套衫，請kā伊hiannh出來，我iáu m̄-bat穿過，一半pái kā伊穿穿 leh mā bē-bái, kám-m̄是？」
清文tsit時無啥物理由，真難得穿台灣服出門......
兩人從 án-ne來到日本基督教會ê門口，hit 時安子 tú-tio̍h一個女信徒，tī陰暗ê前埕 khiā teh講話。清文想講 tsa-bóo人話長，khiā tuà-hia戇戇 á等mā-m̄是辦法，並無想bueh家己一人入去禮拜堂，kan-ta peh起 lih教會教會ê門廊看bāi。入口ê所在有一張細桌 á,有寫「接待」ê字條垂落來。Hōo人感覺是tiānn-tiānn看tio̍h ê普通開會款式，kap tsit時 tú好傳來「平安夜」ê兒童合唱聲ê聖殿無對tâng。

Tuì hit-ê入口tú有五六個男女挨挨陣陣teh入來，接待ê人家己一屑 á都無信徒ê款式，用無情理ê口氣講：「Bē-sái得，bē-tàng隨便入去，lín kám是信徒？」可能有非信徒想bueh入去，歡迎都 bē赴ah,清文想講 thài有tsit款無通情理ê教會，tsit時伊hōo人擠(tsinn)到接待ê所在。接待etsa5-poo人展開雙手擋伊ê路講。

「你，m̄-thang, m̄-thang!」伊用低(kē)路ê台語講，然後嘴裡tsho̍p-tsho̍p念：「實在無伊法，連清國奴 a̍h bueh入來！」

清文起gōng-gia̍h,tsit種驕傲koh無感受性ê態度，kám ē-sái算是基督徒？清文感覺真意外。意外變受氣，清文無意識中用激動ê目神kā伊凝(gîn)。Tsit-ê接待ka短頭毛有小khuá白頭毛，五十左右，目眉kap嘴鬚烏烏，kap白頭毛無啥對tâng,目神銳利，kui個人看起來漢草真好，tuì伊身上所穿ê羅紗ikhi5ā領服裝來看，一看就知是一個官吏中職位siōng低ê人。
清文無想bueh辯解講伊是教會會友陳安子ê翁。
「驚死人！tsit-ê教會飼一隻兇霸霸ê顧門狗？」
清文kan-ta án-ne落(làu)一句就tuì門廊行落去，開門tsông出去，安子馬上jiok過來。
「你，小等leh。因為秋山先生m̄-bat你....」
清文一句話都無回，一直tsông bueh tńg去，到一間台灣厝宅前約一百公尺ê所在tsiah hōo安子jiok-tio̍h。安子掠 tiâu伊ê長衫手 ńg,苦勸講。

「秋山先生講伊真失禮，我若kap你作伙入去，就bē發生tsit款tāi-tsì....請mài受氣，koh來去教會。」
「Kah-ná台灣人無權利入去。」
「Hit-ê人講hit款失禮ê話？」
「放開我ê手 ńg!」
「Hit-ê人hōo教會真頭痛，頭腦小khuá怪怪。」
聽講秋山tsit-ê人是早前滿州ê鱸鰻，行為無好etsa5-poo人。因為伊以前ê恩公是相當地位ê官吏信主，為tio̍h bueh報答伊ê恩情，最近有teh出入教會。伊本來 lóng無信仰，聽牧師ê講道常常 lóng teh tuh龜，但是像講排椅 á lah,算人數 lah,tsiah-ê事務 tikikhang5-khuè,伊 lóng做kah真輕khó。Án-ne算bē-bái,但是伊今暗ê粗魯驕傲態度，教會也感覺來一個怪人，真 oh 得處理。有tsit-ê緣故tī-teh,但tsit-má無時間thang kā in翁解說，準講有說明，mā無法度hōo清文馬上了解來體諒，安子非常為難。

「Hit-ê人kah-ná鱸鰻，mài kap hit種人受氣，難得ê聖誕節，回心轉意，咱 koh tńg來去教會lah。」
「Án-ne講，你無掛意 loh,因為你是偉大ê日本婦人。」
「M̄是án-ne lah, 我會叫伊kā你會失禮。你若án-ne tńg去，我會艱苦心，總講一句，koh來去教會lah。」
「無 ài lah, 放開我ê手ńg!」
清文堅持hàinn開手 ńg,hit-ê勢面力hōo安子phiân去撞tio̍h厝壁，gōng-gia̍hê時，清文已經tī烏暗中消失去。