《《陳夫人》日譯台e5台灣小說 第二部》

| | | 轉寄

《陳夫人》第二部 親子 第十五章

工廠是起tī市郊。

四角形ê工廠建築物油漆雞卵色,tùi遠遠看起來kah-ná一塊雞卵糕khǹg tī四kho͘ 圍ê綠地kah晴空中間。Mò͘-tah(譯註:外來語ê モ—タ—/motor/馬達)準時起動,bel-toh(譯註:外來語ê ベルト/belt/運送帶)開始se̍h, bo-i-lah(譯註:外來語ê ボイラ—/boiler/熱水爐)teh tshèng水氣,煙筒teh出煙,tsit時ê陳清文,心內ê喜樂大旗teh飄揚。伊tī日本ê大學畢業,tshōa安子tńg來家己ê故鄉,隨時換穿官服去官廳上班。Tùi hit-ê年輕光輝時代以來,從來m̄-bat有過ê新鮮感動。伊做中學教師到taⁿ有十年以上,hit-ê古老ê氣息無致使伊ê心胸荒廢,taⁿ koh khah hō͘ 伊感覺tio̍h tsit點。He是培養宗教精神ê特殊學校,雖然kah普通ê教育工作無仝,ē-sái講伊tī hia停止成長suah固定落來,伊ê思想無法度koh再充實是免不了ê tāi-tsì。總講一句,伊ê自我表現m̄是kan-taⁿ用嘴講講leh to̍h滿足,伊是想beh有所作為hit種人。

經過三年,伊ê事業終於正式上(tsiūⁿ)軌道。Tī這tsìn前,陳清公司ê原料是對外採購(káng),m̄-koh從今以後,tùi家己農場生產ê鳳梨,由家己工廠ê機械來製造罐頭。Án-ne, 生產ê體制已經齊(tsiâu)備,m̄-koh, 清文想beh做ê, mā是無做bē-sái得ê, 是今後ê tāi-tsì。伊創設鳳梨罐頭公司m̄是想beh thàn大錢,若是tsit種ê利益企圖心,只不過是出tī富有ē-tàng轉變khah好ê慾望。

清文對tī農場kah工廠,主要lóng是圖謀提高勞動者ê生活kah精神。下面是hit當時台南ê農業工人每日工資:男性 60錢(sián),女性25錢。

台北ê工資是這ê兩倍,因為hit時台南ê工資是全台灣siōng低。雖然有種種ê理由,總講一句,因為hit當時ê南部社會pháiⁿ毛病真tsē, 無teh進步。總是,工資tio̍h gōa tsē tsiah tú好是一個難題,像(tshiūⁿ)講一個經濟機構beh hō͘ 工人非常富有,卻無一定是siōng好ê想法,因為in iáu未達到善用其富ê境界。所以,清文ê準則是:M̄-nā tio̍h hō͘ in tī豐富ê狀態,mā tio̍h顧慮in ē-tàng充分維持生活,而且有tshun淡薄,m̄-koh, bē-sái hō͘ hiah-ê tshun錢致使in陷入物資主義。

伊tī工廠kah農場投入金錢來做設備上ê新構想。工人ê健康比啥物都khah重要,所以,清文為in設備「休閒」場所kah醫務室,尤其是農場ê庄腳所在衛生無好,清子kah阿明tī hia染tio̍h a-me-bah赤痢。當地ê居民tiāⁿ-tiāⁿ tio̍h ma-lá-lí-á, mā有腸á熱。所以,陳清公司ê農場時常請附近ê村醫林文貴來,為工人做健康診斷,hō͘ in食khi-nih-neh(華語ê奎寧),kā in做腸á熱kah其它ê預防注射,治療砂眼。

總是,無知ê農民kah工人無對清文感謝,大概感覺hō͘ 人péng一下目tsiu皮á是tuh一針,不如加領一個十錢(sián)ê銅錢á khah實在。對tsiah-ê m̄-bat世事ê人,清文真傷腦筋,tiāⁿ-tiāⁿ真失望、受氣。總是,伊無放棄ǹg望,ǹg望in有一工會了解;準講in若是bē了解,in ê kiáⁿ孫mā會來了解。

安子起初無真tsia̍p去農場,別莊完成了後to̍h tsia̍p-tsia̍p去。她tī hia做菜園,種各種蔬菜。她接受農場監督游德仁ê指導,伊半khau洗講:若栽種不良會變成koân價ê蔬菜。安子認為成本koân mā無所謂,家己栽種家己收割,其中ē-tàng得tio̍h種種ê教示。生產ê辛苦kah喜樂,ē-tàng食tio̍h比市場買來ê khah新鮮ê蔬菜,準講金銀mā會生sian,要緊ê是物件tio̍h tiāⁿ-tiāⁿ保持新鮮。Tsit種教示道理,是tùi家己親身ê體驗,tsiah有法度得tio̍h。

她穿工作褲,手gia̍h鋤頭,手掌起泡(phā),面曝kah紅kì-kì,倦tauh-tauh tńg來到厝。

有一工,安子洗身軀了後,kā in ta-ke報告農場ê情形kah她種菜ê tāi-tsì。
「Ai-ah, 你....你做khang-khoè, kah-ná作穡人。」

對阿嬌來講,這是意外ê tāi-tsì。安子無想beh hō͘ 人褒獎,想bē到會hō͘ ta-ke hiah-ni̍h tio̍h驚。大家(tōa-ke)sim-pū落田種作,安子ê頭腦有問題,老大人ê面色顯然露出pháiⁿ面tshiuⁿ。安子用無真liú掠 ê台語向ta-ke說明,m̄-koh, 阿嬌bē了解,準講開明ê ta-kuaⁿ阿山在世,大概伊mā bē了解。阿嬌tsit階層ê老大人認為做khang-khoè是卑微下賤,tsa-bó͘人恬恬á快樂過日子to̍h好。所以, 她家己kā指甲留長一兩寸,來表示家己免動手to̍h有thang食。早前有時mā看會看tio̍h tsit種老大人。

Tsit-má ê時代無koh有tsit種人,m̄-koh, tsit種思想kah傳統iáu有少數存在。像瑞文tsit類,kan-taⁿ一支嘴hô͘-lùi-lùi, 一日到暗食飽閒閒,感覺真滿足,tiāⁿ-tiāⁿ受tio̍h清文ê警戒。Tsit pái不管伊願意á是m̄願意,清文安排伊來負責農場方面ê事務。M̄-koh, 阿嬌表示不滿,m̄免hiah辛苦mā ē-tàng生活,ná-tio̍h走去hiah遠ê庄腳做khang-khoè?總是,瑞文來農場工作了後,自出世to̍h衰弱tiāⁿ-tiāⁿ破病ê身體,看起來to̍h有khah結實。因此,伊為tio̍h健康比為tio̍h工作khah熱心來庄腳。

有一工,安子來農場,瑞文mā來,伊beh去看早前施工tsit-má完成ê河川堤防。

寒天ta-ta無水ê河川,到熱天雨水期to̍h變成濁水teh流,有時氾濫致使鳳梨園kah安子ê菜園淹水。所以tio̍h做堤防,這需要一筆費用,創設公司ê時無編tsit-ê預算,m̄-koh, 無做koh bē-sái得。陳清公司一直teh虧損,安子私下有teh煩惱。鳳梨tùi栽種到收割需要一年半ê時間,起初原料是對外採購,m̄-koh, 原料採購無夠需要量。鳳梨罐頭已經成做民眾ài食ê物件,罐頭公司kan-taⁿ ē-tàng買tio̍h需要量10%(pha-sian)ê鳳梨。而且製造工廠已經早一步完成,生產作業變成跛腳teh進行。一工ē-tàng生產60噸ê機械放teh空轉。

所以,自營農場ê完成是siōng急ê tāi-tsì, m̄-koh, tùi農場得tio̍h收割,經營上無真樂觀。因為實際上,免有自營農場,直接向農民購買原料khah會hô,一般ê罐頭業者lóng採取tsit種方法。農民施肥,引水灌溉,關懷作物,tùi日出到日落lóng teh工作。Hiah tsē時間kah勞動量,簡單付款就ē-sái, 準講成本小khóa khah koân, 結果iáu是tsit-ê方法khah會hô。自營農場to̍h無法度án-ne, tio̍h考慮各種設備、肥料、勞動時間ê限制kah待遇等等ê問題,結果原料價數(siàu)提高。

M̄-nā án-ne, koh因為清文ê根本精神無以營利為目的,經營ná會bē有困難?所以,一直虧損mā無辦法。安子想:若無法度經營來中途放棄,án-ne, in ê工作意義kám m̄是完全失去?清文對將來抱tio̍h ǹg望,m̄-koh, tsit-má siōng要緊ê, tio̍h每個作為抱tio̍h快樂kah ǹg望ê心情,寄託美好ê將來。若無法度達成hit-ê願望,過去ê日子只有流落來悲哀ê灰色後悔。

河邊沿岸已經起好十尺koân ê土堤。安子tú-tsiah對瑞文講hiah-ê事業感覺不安ê話,tsit時瑞文kā她安慰講:「無問題,免煩惱」,簡單to̍h結束話題。伊想beh去看堤防是藉口,kah-ná有甚麼話beh對安子講。

不而過,瑞文tī土堤坐落來teh pok薰,無要無緊ê態度,安子感覺kiōng-beh bē喘氣。目tsiu前ê河床真闊,大部分成做乾地,kan-taⁿ中央有濁水teh流。河ê hit pêng有田園,tsiah tú過六月一時á, 稻á已經結實變黃色,teh beh ē-tàng收割à。白鴒鷥雙腳整齊伸tùi後壁,ná棉花輕輕á飛起來,降落tī田園khiā teh,tsit幕kah-ná teh看快速ê影片。全身烏烏烏ê烏鶖用真猛ê氣勢飛起來,飛過田園對面ê山坪(phiâⁿ)中kúi-nā個山谷,一直飛到山腳。其中四界有小部落藏tī山谷下底,看bē-tio̍h, 只有阿里山山脈ê尾溜連接天空ê hit pêng。
「你teh看tó位?」

安子問瑞文,伊iⁿ-iⁿ-n̄g-n̄g無應答。安子想講伊大概是teh回憶陳陣ê tāi-tsì;伊期待安子會問起ê款式,m̄-koh, 安子thiau故意kik m̄知伊ê心思。伊就忍bē-tiâu, 深深感慨講:
「阿陣,她tsit-má m̄知情形án怎?」
「庄頭就tī對面,你去看māi, án怎....」

安子隨便kí一個方向,笑笑á講。瑞文心靈ê創傷顯然iáu有一點á痛,安子想beh摸伊ê傷口。
「奇怪ê tsa-bó͘ gín-á, ná會恬恬á離開家庭?」

安子知影事情ê真相án-ne講,瑞文氣憤nih目tsiu講:
「用空氣槍射gín-á, koh是家己ê tsa-bó͘-kiáⁿ。M̄-koh, 阿陣是一個非常卑怯(khiap)ê人,無通知半項就m̄知去向,想講án-ne阮會án怎。」
「真正是大tāi-tsì, hit時我tú好tńg去日本,m̄-koh....」
「我去hō͘ 景文kah玉簾責備kah有夠thiám, 尤其是玉簾hit款tsa-bó͘人, 每工來要求看beh án怎tsiah好,還我liâm-piⁿ to̍h beh出嫁ê tsa-bó͘-kiáⁿ ê目tsiu等等,teh要求, teh哭, teh罵....。Hiah-ni̍h艱苦心,我tio̍h去tshōe hit-ê tsa-bó͘人!我受tio̍h to̍h想beh kā她paⁿ落去,kā她刣死。」
「M̄-koh, mā m̄是你講ê hiah-ni̍h卑怯。你hō͘ 蛇咬tio̍hê時,她mā是盡力kā你救。想tio̍h這,你kám無想beh去見她?」
「Tsit-má去見她mā無tshái工,我無想beh見她....」
「你是薄情郎,瑞文,你kám是因為好強tsiah án-ne講。」

瑞文感覺安子teh kā伊khau洗,雖然露出bē爽快ê面色,m̄-koh, m̄是她講ê án-ne, 伊是考慮tio̍h koh khah嚴肅ê現實問題,伊用正經ê口氣講:「我已經m̄是以前ê我,kám m̄是?長男已經十九歲。我二十歲to̍h娶bó͘ 。」

瑞文teh苦笑,伊想tio̍h in kiáⁿ to̍h埋怨。長男tsit-má是高等學校一年生,tī台北teh讀冊。伊本人起初希望讀文科,瑞文為tio̍h伊ê將來設想,苦勸伊去讀理科。阿明聽伊ê話,瑞文放心吐一口氣。想bē到阿明iáu是認為家己無適合讀理科,讀一年理科了後,又koh重新tùi一年級文科讀起。伊講若無伊beh休學。
「真正hō͘ 人傷腦筋ê gín-á,究竟án怎tsiah好,我一屑á辦法都無....聽講伊mā有寫phue hō͘ 清子,kám有寫啥物pháiⁿ tāi-tsì?」
「無lah, 無啥物....。只是清子mā bē了解,kah-ná有啥物艱難ê思想上ê問題,á是啥物....」
「真狡怪ê gín-á!」
「其實阿明真認真讀冊。」
「Kám講反抗有好ê kah pháiⁿ ê雙面意義?尤其是伊tsit-má是反抗老父ê年齡。阮tau ê清文mā是án-ne, 對她講啥物她lóng m̄聽;我講án-ne. 她偏偏beh顛倒péng。」

安子kan-taⁿ tī瑞文面前輕描淡寫,其實安子ê心情比一般親子ê問題koh khah複雜微妙。M̄知什麼原因清子會kah清文疏遠,近來連清文都有感覺tsit點。老父為她買好冊,她並無顯露歡喜ê表情,食飯ê時mā無親近講話。她是唯一ê獨生女,hē入去老父ê目tsiu mā bē感覺痛,tsa-bó͘-kiáⁿ對tsit款ê疼,對老父應該koh khah親密tsiah tio̍h。M̄-koh, 清子卻m̄是án-ne。這是為甚麼緣故?是tsit種甚麼感情?安子kah-ná了解koh kah-ná無了解。照她tú-tsiah所講ê,若是gín-á ài反抗ê一時現象to̍h無要緊,免煩惱,度過tsit-ê時期to̍h好。若無,問題to̍h嚴重,安子tiāⁿ-tiāⁿ想tio̍h tsit-ê問題,心內不安。

安子無顯露她ê不安,假做無tāi-tsì講:
「總是,瑞文,咱互相年歲大ā, 操心gín-á ê tāi-tsì, 為gín-á來煩惱。」
「實在真寂寞!人若老,對啥物lóng感覺無意思。真討厭,阿嫂kám有tsit種心tsiâⁿ?」
「Mā無一定,五十歲有五十歲ê趣味,到六十歲有六十歲ê快樂kah幸福,kah年輕時代無仝—。」

安子án-ne teh講,忽然感覺kah-ná踏tio̍h秋天ê落葉,心情寂寞。她mā已經體驗tio̍h進入冬天枯木前兆ê年齡。目tsiu角有魚尾紋,面皮鬆lēng,而且,年輕時苗條ê身材mā變大kho͘ 起來。若m̄是骨骼細支,看起來會有肥tsut-tsut ê感覺,ē-sái講kah-ná kā以前ê瘦抽面影抹殺掉,加上她去田園做工,hō͘日頭曝kah烏mà-mà。....Tsit-má忽然感覺tī瑞文ê鏡面前顯出變bái ê姿態,她感覺見笑koh寂寞。

有一種ài beh回復年輕ê心tsiâⁿ kah「歲月不饒人」ê感慨,同時溢上安子ê心頭。她kah瑞文做伙落堤防,beh行tńg去農場。
「你是hō͘ 蛇咬tio̍h tó位?」

兩人行過大片ê林投kah龍舌蘭,安子參雜好奇心kah嬉弄ê心情án-ne問。
「Βē記得確實是tó位。總是,hit時若無阿陣做伙tī hia, 我有可能bē活。想起來真不可思議。」
「Án-ne講起來,我hit暝tī反對墓地移轉ê演講會中,去hō͘ 人用刀鑿tio̍h。若m̄是鑿tio̍h腰帶,會鑿koh khah深....」
「總是,人結局會死。」
「一日一日行向死亡。」
「雖然是án-ne, 咱mā tio̍h好好á活落去,kah-ná有teh食不老長壽ê藥á ê面容。」
「你mā有幾pái死裡求生ê經驗。」
「已經無hiah驚死亡ā, 可能是年歲有khah大ê緣故。」

兩人án-ne teh講話,忽然聽tio̍h林投kah龍舌蘭中間傳出sa-sa ê聲。Tú teh講毒蛇kah死亡ê tāi-tsì, 安子驚一tiô, 腳步停落來。瑞文mā是無膽ê人,因為tú teh講已經無hiah驚死亡ā, 雖然kik kah-ná無tāi-tsì teh微微á笑,iáu是掩khàm bē-tiâu, 面色變蒼白。 「Lâ-lí-á(譯註:華語ê穿山甲)!」

並m̄是毒蛇,恐怖感消失,瑞文安心huah出聲。Kan-taⁿ看tio̍h一隻kah-ná烏色小型戰車ê動物teh走。瑞文隨時jiok oá去,走到約90尺khah lap窩ê草地,伊大聲叫安子。

動物鑽入去土洞內底,瑞文知影ē-tàng安全kā牠掠起來。伊做一氣掠tiâu露出洞外ê動物尾溜,出力kah面紅kì-kì,beh kā牠khiú出來,看起來是氣力相當強ê動物,伊khiú bē出來。
「Ah, 活掠lâ-lí-á!阿嫂,你替我掠tiâu牠ê尾溜,我來去農場the̍h工具!」
「無ài lah, 祂會kā我咬,beh án怎?」

Lâ-lí-á是食káu蟻ê動物,bē咬人,安子以前有聽講,m̄-koh, 她驚kah huah講:「祂會kā我咬....」。動物kui身軀連尾溜mā有kah-ná指甲ê鱗,安子無勇氣掠tiâu牠ê尾溜。因此,iáu是瑞文掠tiâu動物ê尾溜,安子走去農場the̍h鐵鍬kah索á來。用鐵鍬挖洞,動物就kiu做圓團,無抵抗。就án-ne簡單活掠lâ-lí-á。

Lâ-lí-á tī hit所在tiāⁿ-tiāⁿ hō͘ 人掠tio̍h。雖然是án-ne, 對in來講這是意外ê收成,因為一隻時價60圓。鱗thang做藥用,真珍貴,肉mā有補藥ê作用,食起來是天下ê珍味。皮thang做手提包,bē輸鱷魚皮。

Lâ-lí-á! Lâ-lí-á!厝內ê人lóng轟動起來。若是人擔來賣to̍h無稀罕,是安子kah瑞文兩人掠tio̍h ê, 所以就稀罕。安子kah瑞文kā牠當做禮物送hō͘ 老母,阿嬌真歡喜,她講有一工她mā beh去鳳梨園看māi。