《陳雷文選》

| | | 轉寄

1.

惱(ló͘)惱死m̄是伊本來ê名,m̄-kú按呢叫久了順嘴,suah變作親像是伊ê正名,比賽ê時mā是這款叫法,無人koh再叫伊正式ê英語名Dorothy。

照旺a ê意思,凡是有開(khai)大錢外國買來ê血統,攏有號這款名。本地ê土種,比賽優勝,贏過 大錢ê,才罕罕有號這lō名。一方面事實是這款名咱有khah pháiⁿ叫,若叫了無liàn轉,意思去hō͘走tsua̍h去,好ê變pháiⁿ ê,ah tō真食力。特別是in比鳥ê人,號名是真kāu khiàn-sńg ê代誌,隨人有隨人ê規矩kap頭路,bē使tshìn-tshái得。照旺a ê意思,比鳥會贏bē贏,有時tō是看這個名字。

另外一方面,當然血統mā真要緊,總是旺a伊本人對咱本地ê土種khah無信心,所以ta̍k年攏有按外國買鳥轉來。特別是舊年,有拜託人去Holan,去tshuē Holan ê粉鳥專家,掠一隻鳥公,一隻鳥母轉來,二百萬現金phóng hō͘人,koh kā人姑成說(sueh)多謝。聽講是歐洲ê新種,飛緊koh gâu認路,放khah hn̄g mā飛會轉來,bē pháng去,有hit個價值。

號英文名攏是叫伊ê大漢後生號,伊ê大漢後生讀五專,tī學校內tsīng第一年家己tō有號一個英語名,叫做Tony,伊ê好朋友叫伊 “「吐奶(ni)」”。所以講起來,雖然是五專ê學校,英文程度猶是bē bái lah。

旺a kā Tony講:「這隻好鳥咱beh做種鳥生kiáⁿ用。」鳥á sit thí開,摸鳥á kha-tshng hō͘伊看。Tony看he鳥目睭紅紅,嘴kóng尖尖,面á古意古意,kā伊號一個宗教性ê好名,叫做罵你a。旺a問伊:「罵你a是啥物意思?」Tony講tō是in西方世界天主教聖母ê名Maria。旺a聽了真正真歡喜,想講:「我這個後生確是英語有一步七a。鳥母號聖母罵你a,意思真合,一定會生真tsē好kiáⁿ。」結局“惱惱死”kap“拍鑼”tō是罵你a kap in翁來台灣ê新生代,仝一siū二粒卵pū出來ê阿姊小弟。所以in這個家族,m̄-nā是優秀ê新種,而且宗教氣氛真重,有聖母Maria kap聖徒Paulo ê名,本來“惱惱死”mā是beh號聖徒ê名,可惜tī聖經十二個聖徒內面,Tony tshuē無一個查某名。

所以總講起來,這回比鳥旺a有相當ê信心,作一下出手拚三隻,“拍鑼”kap“惱惱死”伊無煩惱,“達摩”伊心khah膽(tám)膽,tse也是莫怪,因為背景完全無仝。雖然“達摩” ê父母bat比賽優勝,m̄-kú幾代以來攏是咱本地ê純土hong-á,無啥物會tàng kā人展風神ê出頭,所以無號英語名。M̄-kú這隻鳥,薰吹a見若phōng tī手裡,嘴tō念:「這隻會贏。」你m̄通看薰吹a才二十出頭,人猴猴,若tshit-thô gín-á,若是咱本地ê土hong-á,伊看了上準,所以旺a是掠伊作粉鳥軍師teh款待。講是按呢講,tī旺a心肝內,猶是khah無英文鳥hit款ê信心。

2

旺a ê朋友劉先生有tshuā一個少年某,以前是舞女出身,本名叫做阿笑,藝名叫做麗娜,有開一間麗娜珠寶行,不止有趁錢。伊kap旺a仝款愛pua̍h鳥,m̄-kú愛pua̍h m̄愛飼,家己厝裡無飼鳥,攏是tuè旺a插會á 。可惜伊珠寶專門,鳥á無內行,定定贏鳥tuè無著,輸鳥tuè著著,in某麗娜kā伊講:「無效lah,鳥á bat你,你m̄ bat鳥á 。」總是咱會phua̍h-kiáu ê人,攏有一個癖,lú輸lú愛ī所以會使講,劉先生比鳥是看運氣,m̄是靠實力,這點kap旺a小寡無仝。

可能tō是這個關係,才會去看hit尾魚。聽講hit尾魚本來是真品古董行頭家飼ê,劉先生kap伊有熟sāi,是按呢牽過來ê。劉先生kā旺a講:「咱來去看魚。」旺a講:「食魚我bóng來去,看魚我無趣味。」劉先生講:「這尾魚無簡單。」旺a人鐵齒,講:「按怎無簡單?是會講話hioh?」劉先生tshuā旺a去古董店,拜託頭家hō͘ in參觀一下。頭家tshuā in去辦公室看魚,水箱內面飼一尾大尾金lē魚一尺外長,全身白底lām紅花kap烏花。He魚tī水裡,嘴á 開leh合leh,尾á ia̍t leh ia̍t leh,看一晡,無啥出頭, 旺a頭ua̍t leh tō beh行,劉先生kā伊giú leh講:「你看hō͘真,這尾魚有你ê名!」

旺a koh kā看,ai-ioh,成實koh有影lah!He魚kha-tshiah hia一tah烏烏,tú-tú三橫一直,對對排作一字’王’字,伊目睭nih一下,心肝跳二下,驚一tiô講:「明明是一字王字!」劉先生tàm頭講:「我kā你講,tse魚無簡單。神明khah-mi-sa-mah指你ê名,報你好空ê。你kā伊買轉來厝裡飼,好好款待,招財進寶,比鳥包贏ê。」

旺a聽了有理,問古董店ê頭家:「Beh賣外tsē?」He少年頭家講:「Tse魚阮pâ ê。咱台灣姓王ê魚kan-na這一尾,無親無tsiâⁿ。」無beh賣。旺a kā伊拜託:「是按呢lah,少年ê,小弟姓王,tse魚有小弟ê名。少年頭家tu一枝薰來請伊,講:「王先生,是按呢lah,小弟mā是姓王,tse魚kap咱攏是親堂。」親堂bóng親堂,魚á mā是m̄賣。旺a七姑成八姑成,劉先生出一枝好嘴鬥講,尾a出現金三十萬,ah才賣。所以講,這尾魚實在是半撈(lo)半搶,好運ngē買來ê lah。

一尾魚三十萬phóng轉來厝報某看,in某四鶴a人細漢,真khiàng腳,kan-na普通時gâu kā伊tsauh唸。這回看khah嘴á合合,suah bē曉講話,歡喜khah bē食飯,去pua̍h杯拜神明,求神明賜一個名,叫做“金kiáⁿ”。這個“金kiáⁿ ”飼tī客廳,水箱內面水溫控制,水流調節攏是自動ê人客若來,tō展寶hō͘人看。koh驚人’王’字看bē清楚,hip一張相片,放大tah tī邊a,點一pha電火,照hō͘光光。in某hit頭ê親成,hia ê阿姊,姊夫,第一個到第三個攏聽著這項消息,專工按台北駛車tsông來看。

He魚真巧,電火拍光,伊tō定定無tín動,乖乖tī hia搖尾hō͘人看。Hia ê阿姊,姊夫tsîn一晡,看kah嘴á 開開,無一句話講。成實有影,三橫一直,雖然小寡歪歪,無啥四正,總是清清楚楚,明明是’王’字一字。一鶴問四鶴:「Ah廟裡神明按怎講?」四鶴a笑微微,無應伊。二鶴問:「我聽bat代誌ê人teh講,神明賜這款物,定著有一個另外ê意思。」四鶴mā是笑微微,無應伊。三個阿姊目睭掠tsiah大蕾kā伊tsîn,伊才慢吞吞講:「無啥lah,一尾魚niā-niā。」三鶴m̄放伊suah,問伊:「號啥名?」四鶴講:「神明賜名,號做“金kiáⁿ”。In三個阿姊聽講賜名’金kiáⁿ’,明明是金錢財富這項頭路,心肝頭tō會tshia̍k,心肝尾tō會tshiáng,雄雄去想著旺a比鳥ê代誌,問小妹:「Ah旺a比鳥是tī tâng時?」In tsìn前定定勸小妹,旺a比鳥pua̍h kiáu代,m̄是正經事。所以四鶴pháiⁿ勢,應伊講:「Ai-ioh,mài講khah bē受氣,阮旺a khah勸tō勸bē聽。我不時teh kā講,ài學咱姊夫,作一寡事業,sńg鳥m̄是正經事。」一鶴講:「Ah-ioh,講sńg ê你也teh認真啥?旺a比鳥mā是一個工藝,khah贏恁姊夫,ta̍k日tī外面lim酒走pha-pha,無看人。」三個阿鶴a一句來一句去,姑成三姑成四,拜託小妹kā旺a講,hooīn插一個會á ,「意思意思,心適心適tō好。」結局一個人插五萬,算大嬴,獎金上無tō有百外萬。阿姊kap姊夫笑微微,四鶴a mā笑微微。

3

比賽hit日,uì台東太麻里透早放鳥,一陣成千隻,順太平洋 ê氣流,飛過中央山脈,衝按西海岸來。電話報告,東部天烏陰,山內落大雨,鳥á ak kah tâm lok-lok。四鶴kā旺a講 :「雨tō是水,水tō魚,魚王tī咱tsia,包贏ê!」旺a講:「八(pat)馬!八馬!」in pua̍h kiáu人講八馬,tō是真有自信, 總贏ê意思。一組三隻攏總入,上大嬴,獎金算千萬ê。

三人tī厝頂穩心á 等,一分一秒過,時間beh到ah,猶未看著鳥á影,旺a心內開始著急。目睭niau-niau看he天,東旁一大tè烏雲tuè山內ê風飛過來,suah teh落雨。Hit時天頂尾才看著一點烏烏ê鳥á 影,若鎗子直直衝來。旺a跳起lih椅á頂,pî á一直pi,巾á 一直ia̍t ,he鳥sut一下tsông到厝,mā無se̍h lin-long,pu̍t一下pua̍h落來。旺a tsheⁿ狂無顧看,鳥á sa leh,趕緊拍鳥鐘,掠時間,叫薰吹a tsông去粉鳥會驗身算時間,tú-tú幹in娘差1.5秒!Bē赴入圍,連入等ê資格to無。

He薰吹a鳥á phóng tī手裡,kā伊操幹kiau,「幹恁娘!免假仙,明明會贏ê,hō͘你pìⁿ kah輸去。」He“達摩”hō͘伊罵,身軀phih-phih tsùn,緊張tshuat一pû屎,薰吹a bak kah一雙手,受氣beh koh罵,雄雄看著二枝鳥á腳tōng-tōng hàiⁿ,夭壽tō是已經斷去ah!包是今á日pháiⁿ天視線bái,顧tsông無顧看,去hō͘電線sut斷去。可憐這隻鳥,原來是好鳥,伊自早tō按呢講過,確實無m̄ tio̍h,腳斷去ah mā koh拚命飛轉來到厝,若m̄是按呢,早早tō到ah,無彩現liáu幾luā百萬。

轉來到厝,旺a猶tī厝尾頂等,身軀tâm lok-lok,拍鑼ê kap惱惱死猶未轉來。聽講達摩無入等,差1.5秒,鳥腳去hō͘電火線sut斷去,氣一下,鳥á tsang來gīm tī拳頭母裡,tō kā罵:「幹!無目睭ê hioh?!」一手tō kā kiat入去土腳鳥láng á內面。

Tī hia心情真bái,肚內一pak氣,雄雄聽著in某tī樓腳大聲吱,tsông落來看,四鶴a一kho͘人直直khiā tī客廳,一個面青sún sún,「He魚…he魚…」一直叫。旺a看he魚,一尾好好tī水裡,嘴á 開leh合leh,尾á ia̍t leh ia̍t leh,無啥代誌,罵in某:「你是看著鬼hioh?大聲細聲teh huah啥?!」in某比hit尾魚講:「你看!… 你看!」旺a一kā看,ai-ioh-uē,nái變按呢?He魚kha-tsiah一tah烏烏,三橫一直suah減一橫去,夭壽’王’字變作’土’字!到tsia來,才知影he姓王ê魚本底tō是假ê,m̄是姓王,刺字起lih ê,技術無好,水裡浸久了suah退色去!無彩神明賜金kiáⁿ,總報消去。「莫怪ah,雨tō是水,水遇著 土,輸kah土土土!」in某又koh按呢ka伊tsauh唸。

人講pháiⁿ事若來,二,三項相連續,確是有影,tú好tī hia火狂心熱,m̄知beh按怎好,電話giang三聲,旺a kā聽,一個tshit-thô gín-á ê聲:「Uê,頭家hoh?咱tsia埔里草地lah,今á 日hoh,咱山內散步,khioh著二隻粉鳥lah。阮某講,tsiah tsán ê鳥無去,鳥主一定真煩惱,叫我趕緊拍電話hō͘你,…」到tsia來,才知影拍鑼ê kap惱惱死攏著網,tō是按呢才會無轉來,he m̄成gín-á拍電話來teh討錢。四鶴聽一下,又koh kā伊唸:「開二百萬lah,mā是teh著網,講是gâu認路,ah thái飛bē到厝ah?啥物拍鑼ê惱惱死,khah m̄值著咱這lō土種á,上無拍tsih腳骨mā會beh拚命轉來,…」

旺a聽in某唸,平常時攏是唸唸he有ê無ê,無teh聽伊,這回唸了koh有一tsuā大道理,tse鳥若是會著網,khah會飛mā是bē轉來,無khah tsua̍h。實在這回nái hiah-nih衰,連續hō͘人騙三遍,lú想lú受氣,一時烽火to̍h身軀,三步作一步tsông起lih四樓,鳥厝內面,罵你a tú-tú teh孵卵,看人來,無歡喜,kù-kù叫,旺a一手伸去tō kā伊tsang起來,m̄ hō͘伊孵,罵伊:「你免tìng siáu !」二粒卵孵一半,la̍k起來siak hō͘破。又koh鳥厝內面,規排鳥籠á總巡。凡是罵你a ê親成後代,查某kiáⁿ後生,全部總掠,無放伊走一個,攏總lok入去鳥láng á 內面,kap達摩作伙,kuāⁿ去阿佛a hia。

4

Keh轉日,菜市á 內面阿佛a hia賣雞tō mā有賣粉鳥。He鳥成十隻thâi好好排一排,雙腳斬齊齊,頭殼tok掉,ām-kún suê tn̂g-tn̂g ,倒頭栽吊 tī hia。買雞ê查某人問阿佛a:「Tse粉鳥按怎賣?」阿佛a掠二隻粉鳥hō͘查某人看,he鳥á thâi kah清氣清氣,規身軀liàm kah光光無一枝毛,查某人kā鳥á píng過來píng過去看,阿佛a講:「太太,有tshiⁿ lah!你看tse血猶teh tin,tú thâi ê lah!」He查某人用一枝肥肥té té ê指頭á tōng罵你a ê胸坎肉,koh tēⁿ達摩ê kha-tshng,問阿佛a講:「一隻外tsē?」阿佛a指“達摩”kap“罵你a”,講:「Tse土種á一隻百二,he進口ê一隻百五。」查某人看阿佛a講:「Taⁿ你mā mài滾 笑,粉鳥也teh進口?!一斤beh賣外tsē才算會和?」阿佛a起愛笑,kā伊講:「太太,hō͘你講kah tio̍h tio̍h。我tse粉鳥,若是活活秤斤ê,一斤幾luā 萬你to買bē tio̍h loh!」 Tse tō是粉鳥“達摩”盡忠比賽ê記事,kap“罵你a”inhit規家伙tī台灣hō͘人抄家滅族ê經過。