《各各他e5目屎--苦難得安慰》

| | | 轉寄

o-ló耶和華

「o-ló」是現代建立人際關係最有力ê方式,因為人tī心靈ê深處lóng欠缺自我肯定,需要藉別人ê o-ló來得tio̍h自信、滿足。馬克吐溫bat講,伊會tàng 用一句o-ló ê話,活三工。卡羅素講伊會tsiâⁿ做一個歌唱家,是因為細漢老母不時teh o-ló。詩篇147:1「Lín tio̍h o-ló耶和華;因為唱歌o-ló咱ê上帝,是真好真妙;O-ló是合宜。」親像上帝也欠缺o-ló,來證明伊有氣力ê存在。詩篇22:3「你是用以色列ê o-ló做座位ê。」Tī o-ló中,上帝有威嚴ê存在,降臨tī咱ê中間,愈有o-ló ê所在,伊愈愛去,kap in愈親密。一個親密ê關係,tio̍h不斷用o-ló來肯定、強化、hō͘相建立造就。o-ló會增加彼此ê歸屬感,彼此ê吸引力。Tī雅歌書中咱會當讀tio̍h真『肉麻』ê o-ló,但也表明in ê關係真密切。這是現代東方ê尪某所欠缺--ê。Kan-taⁿ o-ló tī心內,你ê牽手,你所疼ê人感受bē tio̍h,會減少互相吸引、欣慕ê力量。

為什麼咱tio̍h o-ló耶和華?是m̄是因為伊是有氣力ê神明,咱tio̍h kā巴結呢?若無kā o-ló,驚伊會生氣,降災禍hō͘咱?這種「驚惶」ê心理,是原始宗教抑台灣民間崇拜ê心理,但也存在tī今á日教會敬拜ê中間。有時o-ló也出tī想beh得tio̍h好處ê心理,親像teh對待頂司、頭家、顧客。但這lóng m̄是正確ê o-ló態度。詩篇一四七1講,o-ló ê原因kap原動力,是因為伊是善、是美。伊ê善表明tī「醫好傷心ê人,包紮in ê傷痕;伊為受屈ê伸冤,賜食物hō͘饑餓--ê,伊釋放受關監ê,伊開睛瞑人ê目睭,伊扶起受壓制ê人,伊扶持寡婦孤兒,伊hō͘歹人ê道路彎曲。」所以o-ló是出tī受tháu放ê人ê嘴kap心。親像tī浴室受tháu放就自然想beh唱歌一樣,tī一四七7講:「Lín tio̍h用感謝向耶和華唱歌。」O-ló是出tī內心ê感謝kap釋放。Tī早期教會唱「彌賽亞」ê時,一定是將收ê門票kap會後ê義賣做救濟散赤ê路用,án-ni才達到o-ló ê實質,若無,就失去唱「哈利路亞」ê意義。Kan-taⁿ中產階級ê人因為家己ê享受kap好勢teh o-ló上帝,這是對上帝ê譏刺,會hō͘上帝見笑。這是對上帝ê巴結、應酬,講好聽話,唱好聽ê歌,bē當稱做是o-ló。Kāng款,今á日ê教會若kan-taⁿ因為家己ê拜堂suí、冷氣強、講壇讚、詩班齊、經費飽來teh o-ló上帝,這是對上帝ê譏刺,會hō͘上帝見笑。愈表明上帝是一位無公義、無疼ê神明,無值得o-ló。但這suah是今á日教會普遍ê現象,悲哀看做是正常。教會若因為增長suah無kap散赤、弱勢ê人khiā tàu陣,這種ê o-ló是對上帝ê巴結,m̄是「出tī受tháu放ê人」ê感謝。Bē當稱做是「o-ló」。這種o-ló ê話m̄是合宜--ê。Tú-tú親像兩個穿suí-suí ê人the 互相『恭維』in ê『善心』,suah忽略邊á一位穿破破iau餓ê兄弟。

O-ló上帝也是出tī「suí」ê讚嘆!詩班唱了真「suí」會hō͘人產生敬畏ê心;講壇讚,會hō͘人有向善ê心;拜堂suí會hō͘人愛來朝見上帝。但tsiah--ê,若無帶出去tī所khiā起ê群體中間,就是表明咱ê上帝是m̄敢見人ê上帝,kan-taⁿ bih tī聖殿吹冷氣,坐tī高高ê寶座,等候享受人稱讚ê「老爺」,也是無值得o-ló ê神明。無真kap無善ê suí,是虛假、暫時、片面ê。大地teh o-ló上帝,是因為大地、五穀、走獸、花草、蟲thuā lóng感受tio̍h上帝ê善,所發出suí、感謝ê聲,這就是o-ló。人若自私,kan-taⁿ beh滿足家己ê慾望、享受來破壞生態,an-ni咱為tio̍h家己ê享受teh o-ló上帝,大地suah teh pha-hng、啼哭、受破壞、壓迫、毀滅,án-ni咱ê o-ló是譏刺,hō͘上帝見笑koh生氣。咱ê o-ló若是建立tī別人ê受苦,大地ê受苦,這個o-ló是片面、虛假、暫時--ê。所以tī罪中ê o-ló是欺騙上帝,褻瀆上帝,惹上帝生氣。真正ê o-ló是會引起「共鳴」ê,hō͘人思念上帝ê「好」「善」,作伙來感謝,發出o-ló。Án-ni ê o-ló才是真--ê、久長--ê、全面--ê。大地,眾人ah!咱tio̍h o-ló耶和華!