《各各他e5目屎--苦難得安慰》

| | | 轉寄

耶穌所看tio̍h--ê

Tī 1996年11月5日,美國華盛頓州ê州長選舉,華裔ê駱家輝phah敗共和黨保守派64歲ê克蕾斯維,成作美國本土ê第一位亞裔州長。駱氏ê競選訴求是重視教育、關心環保、贊成墮胎。克氏ê主張是遵照「上帝ê計劃」來處理州務,縮小政府對百姓ê干涉。伊極力反對墮胎,甚至反對利用電視廣告政見。伊提倡簡單、清氣ê選舉,kan-taⁿ靠基督教聯盟ê義工分發競選傳單。結果是駱家輝得tio̍h壓倒性ê勝利,因為伊所籌備ê競選經費是對方ê兩倍,充分利用電視ê廣告。這是理想kap現實ê抗爭,結果現實khah贏理想。

Tī 1997年年初,嘉義竹崎鄉香山寺ê出家人kap當地村民相爭寺產,因為村民反對tsiah-ê出家人所傳ê佛教教義過頭理想,kap in ê生活所祈求ê脫節。譬如四月初四,出家人利用起建新殿ê機會,邀請省佛教會理事長法智法師前來主持「息災安靈護農法」,替台灣hiah-ê患口蹄疫病死kap受撲殺ê豬á超渡。這是in尊重性命ê表現。但kāng一個時陣,當地5村13庄ê村民suah tī in所佔領ê香山寺舊殿,舉辦「食豬肉救台灣」ê活動,請村民免費食豬腳麵線,也請布袋戲團來公演。因為這回口蹄疫ê流行,hō͘台灣ê豬農、出口商、加工廠損失上百億,也有上百萬ê豬á受撲殺棄sak á-sī燒去。庄民所看重--ê,是現實生活ê需要,法師所看重ê是豬á ê性命。

Tī格拉森,耶穌看見一個tuà tī墳墓ê人tshuah斷鐵鍊,摃碎腳鐐,用石頭傷家己,因為伊hō͘邪神附身。耶穌:「邪神ah!tio̍h tuì hit-ê人出去!」In應講:「差阮入hiah-ê豬,hō͘阮thang入去。」邪神就出去,來入tī hiah-ê豬,hit陣豬走落山坪,tsông落海,約略兩千隻豬,tī海--nih激死。顧豬ê人kā鄉社ê人講,in驚惶,就要求耶穌離開in ê庄社。耶穌看重一個人心靈受tháu放,khah貴重兩千隻豬ê價值。(馬可福音五章1-8節)

Tī耶穌受難ê前五工,他來到伯大尼。馬利亞提一斤極貴氣真芳ê哪達香油,抹tī耶穌ê腳,koh用家己ê頭毛tshit伊ê腳。加略人猶大講:「啥事m̄將這個膏油賣銀á三百來hō͘ sòng-hiong人ah!」耶穌講:「Lín啥事刁難這個婦仁人ah!出在伊。因為伊倒這個油tī我身軀,是備辦我埋葬來行--ê。因為常常有sòng-hiong人kap lín tī--teh,但是我,無常常kap lín tī--teh。」(約翰福音十二章1-8節,馬太福音廿六章6-14節)。耶穌所看tio̍h ê,是馬利亞對伊ê「疼」,猶大kap門徒所看tio̍h ê,是m̄甘「hiah-ê錢」。

有人kā耶穌講:「先生ah!請你教我ê兄弟kap我分祖業。」但是耶穌kā伊講:「你這個人ah!是誰設立我做 lín ê審判官,á是做分家業ê mah?」就對眾人講:「Tio̍h謹慎約束家己,lóng無貪心,因為人ê活命m̄是tī伊所積聚ê豐盛。」耶穌所看重ê是「兄弟ê親情」,hit-ê人所看重ê是「產業ê豐盛」。

耶穌所看ê重點常常kap當時ê群眾,á是律法師ê觀點無kāng款。伊看tio̍h手枯乾ê人心內ê艱苦,律法師看見安息日ê律例(路加福音五章6-11節);伊看tio̍h婦人人反悔ê心,法利賽人看tio̍h ê,是一個犯罪ê婦人人(路加福音七章36-50節);耶穌看tio̍h撒該渴慕救恩ê心,眾人看tio̍h一個抽hiòng ê貪心(路加福音十九章1-10節);耶穌看tio̍h上帝榮耀ê計劃,門徒看tio̍h白白送死ê驚惶(約翰福音十一章7-16節)。Hiah-ê受差beh去掠伊ê人倒轉來向祭司報告,講:「從來無人講話親像伊án-ni!」(約翰福音七章46節)。群眾也稀奇伊ê教示,因為伊教示人,親像有權能--ê,無親像in ê經學士(馬太福音七章28-29節)。Tī山頂寶訓,伊講,「Lín bat聽見有tuì古早人講...總是我kā lín講」(馬太福音五章21、27、33、38、43節)。伊所看tio̍h ê,是人所無phah算(五章17節)。

Tī民主制度ê社會,民意成做一切價值判斷ê標準。致到做一個領導者tio̍h常常體察民意,講in意愛ê,做in意愛ê,親像彼拉多,明明知影耶穌無罪(約翰福音十八章38節、十九章4、6節),但為tio̍h民意,tio̍h判伊釘十字架(十九章13節)。彼得受掠到祭司頭ê面前,伊辯解講,「順趁上帝khah過頭tī順趁人,是合宜。」(使徒行傳五章29節)公會ê人聽了真受氣,beh害死in。只有迦瑪列講,「taⁿ我kā lín講,莫得tshap tsiah-ê人,放kù-tsai in!因為這個計謀,這個所做,若出tī人,的確敗壞;若出tī上帝,lín就未敗壞in,koh驚了lín也是kap上帝交戰。」(使徒行傳五章38-39節)。這是智慧ê領導者所看tio̍h ê,會當矯正民意ê偏差。

Tī台灣ê教會,古早ê時,有濟濟引導民意ê影響力,親像重視教育、女權、簡樸生活ê模範,人權ê關心。Tsiah-ê lóng常常tī講壇teh強調,教會tī社會是非常ê少數,卻是創造性、挑戰性ê少數。Tī近代,除了「台灣主權ê強調」有先知性ê影響以外,教會也是隨民意、隨流行teh行。教會喪失淨化社會心靈ê功能。koh近來注重「教會增長」ê潮流,常常用人數、獻金來計算教勢。濟濟教會為tio̍h「教勢ê好看」,m̄敢堅持真理、指責罪惡、施行憐憫;卻是用濟濟ê廣告來標榜家己信仰ê純正kap靈性。致到教會m̄敢看耶穌所看,講耶穌所講,做耶穌所做。Kan-taⁿ掛名「屬靈」,家己掠做「為主熱心」,想beh「搶救百萬靈魂」,卻是人看tio̍h ê,「in想beh資源總la̍k」。教會m̄ kan-taⁿ喪失創造性少數ê角色,也喪失了保羅所講--ê,「清氣良心ê服事」(提摩太後書一章3節)。

保羅:「Lín出力交戰,kap前所看見我ê,現今所聽見我ê,tio̍h kāng款。所以, . . .... . Lín tio̍h有基督ê心做心。」(腓立比一章30節、二章5節)