《各各他e5目屎--苦難得安慰》

| | | 轉寄

憐憫khah贏祭祀

1995年熱天,台北故宮博物院用一億五千萬ê價錢,買一仙kuân 40公分ê「大和佛像」(A.D.77-498)。另外koh預算四億,beh買其他ê佛像。會當看出台灣真正是「錢淹腳目」,外匯存底超過千億美金。奇怪ê現象,就是任何社會福利ê提案,政府各單位lóng會「喝sàn」,甚至,連離島澎湖也因為缺乏基本建設經費,tio̍h考慮廢縣á是規劃做賭城。

1993年加州柏克萊大學ê人口調查研究報告,指出加州有500萬人經常tī散赤iau餓ê狀況,其中兒童佔200萬。因為散赤,tsē-tsē gín-á自細漢就靠偷提過日子。所以,加州ê犯罪率增高,監獄也愈來愈tsē,真tsē稅收投資tī獄政,也真tsē政客利用這做廣告,捏造家己成做打擊罪犯ê英雄,kan-taⁿ注神tī美國總統ê寶座,全然無顧人ê iau餓kap社會ê破病。

耶穌tī傳道ê時,真看重人肉身實際ê需要,看「人」比祭祀khah要緊。伊tī安息日醫病,tī安息日飢餓ê時,門徒捏麥穗來食,伊ê觀點是「總是lín若知,我ài憐憫,無ài祭祀,.... . 受傷ê蘆竹,伊無beh at折,beh hua ê火星,伊無phah熄。」(太12:7,20)。耶穌看人ê受苦比「經濟利益」khah要緊,將污鬼對人ê身上趕出進入二千隻豬群中,hō͘ in淹死(可五13)。伊無拒絕有心反悔ê罪人就近伊(路七39),伊討厭假冒偽善ê人(路七44),伊看「憐憫」比tsē-tsē ê「禮儀」khah要緊(路十八10-14;太二十三23)。所以,伊也看重、肯定hiah-ê有「憐憫心」ê人(太二十五24,二十六13),也嚴厲講:「你kiám m̄ tio̍h憐憫你同做奴僕ê,親像我憐憫你?」(太十八33)。雅各書二章13節講:「因為人無憐憫人,當審判也無得tio̍h憐憫;憐憫贏過審判來誇口。」也講:「獨獨眷顧孤兒寡婦tī in ê患難中,koh家己守,無hō͘世俗bak-tio̍h,這tī父上帝ê面前就是做清氣無lâ-sâm ê敬虔。」(-27)。