《生活e5台語,台語e5生活》

| | | 轉寄

台語文運動iáu是新聞!?

今á日透早至好朋友楊錦鍾(盲人)khà電話來,歡喜kah講昨暗七點ê東森新聞報導阮tī雙連教會舉辦ê「台語羅馬字電腦軟體」說明會;我真興奮請伊kā聽tio̍h ê講hō͘我聽,伊講報導kah真清楚,羅馬字ê歷史、電腦輸入法、羅馬字ê發音法、羅馬字ê特色kap拯救等等台語文運動ê意義,lóng透過採訪現場ê人表達出來。伊是我推動視障關懷事工ê勇將,現此時擔任雙連教會執事,伊所做ê事工lóng受眾人ê肯定;伊koh建議我開記者會來推動台語文運動,將發展台語羅馬字電腦明盲互動khǹg入去,一定會喚起社會ê關心,成做大新聞。Án-ne講起來,伊mā是tuì台語文運動真熱心,伊ê公關koh是一流ê,到時一定請伊出來做委員。

電話講三十幾分猶bē suah,手機á電話koh入來;mā是至好朋友黃國紋來通知我講,伊看tio̍h我kap鄞貞智tī電視頂介紹台語文,歡喜kah beh請阮食中晝。鄞貞智最近tī雙連教會受洗禮,伊已經決定beh加入台語文運動ê工作,前幾工我tshuā伊去過大力推動台語文運動ê李江卻基金會,伊tī羅馬字說明會中做真好ê示範。因為楊錦鍾看無銀幕,阮請黃國紋報阮知電視頂面ê情形,伊講我用電腦單槍投影示範Hotsys-Haksys kap TP(Taiwanese Package) 真清楚。我ài感謝彭淑青幫我借電腦單槍投影,因為教會ê單槍tī第二場青年華語禮拜中teh用;這是我第一pái使用單槍,實在真好用,效果koh好。

台語羅馬字ê軟體使用iáu koh是新聞,mā無啥物thang好大驚小怪;我teh kap雙連教會ê任何人講起Hotsys-Haksys kap TP (Taiwanese Package),lóng無人知。尤其是Haksys ê輸入法,台北市問無人會曉,問到桃園縣觀音教會ê何必安牧師,伊只有會曉用tī Windows95 ê Haksys,我tī Me-2000 tú tio̍h ê問題:phah任何字入去lóng īt字ê頭前自動出現q,伊mā bē曉;伊koh講台北市無人會曉Haksys輸入法。我可能是台北市第一個半桶水會曉Haksys輸入法ê人,實在是真不可思議ê tāi-tsì。

阮tī 上午9:00--10:00 ê說明會約有50人參加,大家熱烈討論,時間無夠,決定下晡1:30繼續;但禮拜日大家tāi-tsì真無閒,tshun 10幾人,我放「有耳無嘴」台灣戲劇ê錄影帶hō͘大家看,beh suah ê時人數無啥增加,當感覺鬱卒ê時,教會幹事ia̍t手叫我出去,原來sī東森TV記者講beh來採訪說明會,我講早khí已經說明了à,下晡是研討會。記者真失望講是beh來採訪說明會ê,我感覺這是求之不得ê好機會;我kā in講我ē-sái koh說明一遍hō͘ in錄影採訪。記者蔡婷玉真用心採訪製作新聞報導,東森TV ê採訪報導hō͘我真大ê鼓勵。

開發Hotsys-Haksys kap TP(Taiwanese Package)ê人hiah-nih-á辛苦,到taⁿ iáu無普遍tī社會中使用,實在真可惜!台語文運動需要koh khah tsē人來參與,tsit-pái全國性ê東森新聞報導,ǹg望會喚起社會大眾來關心台語文運動。

順續講一ê,到taⁿ我上頭疼ê是聲調標bē準,tsit-pái ê示範hō͘我發見ē-tàng uí Hotsys-Haksys來試出正確ê調,ē-sái講是一大收成。(3/11/2002)