《生活e5台語,台語e5生活》

| | | 轉寄

在地經濟m̄是政治口號

數千年矣,人類搣搣掙掙,追求健康,但偌濟人,真正想過健康ê真義?

舊年開始,政府大力推捒石化廠時,提出種種理論,咱小寡整理後,發現三項要點,第一,設工場,會提昇經濟,照開發商ê說明,其中,一部分是因為破病人增加,生理變好;第二,過去資料顯示,經濟愈好,民眾會愈健康,愈長歲壽;綜合這兩點,原來,人愈時常破病,也可能愈健康,愈長歲壽啦!

這个烏暗眩ê論述(Sut),花罔花,其實也反應出人類ê困境,經濟活動佮個人身體,若撨袂好勢,欲得著真正健康,是足困難。

有一陣族群,這款困境上明顯,In暝日勞苦加班,致使無閒無心情運動;為貪工作方便,三頓趕緊,攏是排骨便當,米奶卵餅,致使規腹油肭肭。 速食店有新產品來矣,芳絳絳真好食款,遮ê人,時常攏擋袂牢,試一个滋味。景氣好,街路車濟坱蓬蓬,上班時欶烏煙,仝一陣人也一定Suh有份。遮ê人支持咱經濟真大,受經濟活動傷害也上深,容易得著高血壓,高血油,高血糖ê 三高症,連帶也容易併發腦中風,心臟病,腰子病,In是中學歷,中收入,中階級 ê三中族。

心臟科醫生講,欲顧心臟,應該一日喀8至10分蔬果,大約等於四碗蔬菜,外加一粒林菝,而且,國民健康局建議,在地,著時ê蔬果為主,以避免添加物,防腐劑,囥久生菌ê傷害。

好—啦,咱三中階級,向健康飲食ê目標,敢有啥路好行?如果,回歸自然,三頓在地蔬菜蕃薯簽,可能bē bái, 但現在農民受財團政府剝削,生活鬱卒,當然無法度算健康。抑無,認真拍拚,作董个,做大好額人,每日有機食品,吹冷氣做健康操,定期體檢,但是,機會渺茫之外,壓迫薪勞,趁大錢顧身體,敢是真正健康?

所以,國民健康局ê建議,罔講而已。有第三條路無?可能有哦!2010年,美國各醫學會,包括ADA,APA,APHA,AA共同發表聲明,健康ê食物,著維持農民,運銷工人,消費者身軀以及心靈ê健康,而且應該永續經營,尊重在地文化,族群。 簡單講,改變咱經濟環境,健康較有機會。在地經濟,是一个好ê選擇,有好ê在地經濟,就有在地文化,在地人ê健康。濟濟社區,已經開始拒絕外來食品,發展在地市場,包括溪州鄉,美濃鎮學校,開始使用在地農產,作營養午餐,也包括各社區市集,雖然過程艱難,但是,已經替眾人殺出一條血路。我想,在地經濟m̄是政治口號,卻是必需 ê路,向望大家做伙來行。