《生活e5台語,台語e5生活》

| | | 轉寄

日夜顛倒kám-ē世界末日?!

入冬以來今仔日天氣上好,已經個外月無拍golf;前禮拜球友五六個相招聚餐ê時,大家講氣象報告今仔日好天ē-tàng拍球,實在hō͘我真興奮,我時時to期待這時刻緊到。

禮拜主日崇拜suah,我kap式宜兄照昨暗約束去Home Depot看搭布袋戲戲台ê角鋼材料;昨暗討論這pái 1/25/2003同鄉會ê年會阮「台語進步社」beh演ê「蛇郎君」布袋戲,只剩一個月ê時間,阮koh lóng無經驗;但李勤岸教授收tio̍h戲劇專家陳清風教授uì Tsicago寄來ê布袋戲尪仔,tú好式宜、美芬夫婦邀請阮去in兜potluck,阮就趕緊討論並分配工作來進行。

看完角鋼材料,我順suah買一個shower頭;搬入來這間七十年歷史ê厝已經十年ah,最近tsia pháiⁿ hia壞,shower頭出水無力洗身軀bē爽快,太太兩三工前beh轉去台灣ê時交代我to去買新ê shower頭來換。Tī美國家內tap-tap-tih-tih ta̍k項tio̍h家己來,每pái完成一項lóng有講bē出歡喜ê成就感。到厝第一項代誌當然是安裝shower頭,安裝好勢了後koh-khah當然是試用看māi,果然koh恢復以前ê爽快。

身軀洗好是下晡三點,精神好kah緊開電腦來繼續努力《台日大辭典》 ê台譯工作,擋無一點鐘目睭to習慣性澀--起-來,只好kā電腦蓋(kuà)蓋(khàm)--起-來, 照慣例去眠床theⁿ--一-下。一般lóng是暗時九點洗身軀,taⁿ下晡四點,洗好身軀koh換睏衫,睏一眠足大眠醒--起-來,有聲鬧鐘一jih,朦朦聽tio̍h「現在時刻X午五點khòng七分」,外面天昲光ê款式,這陣mā是我平常起床ê時間,想tio̍h beh去kap球友拍球,趕緊liòng--起-來,照例做三十分ê(fa64)(khiú)筋運動,這是四冬前坐骨神經tio̍h傷醫生指示ê每工運動。

照習慣開電腦來tseck e-mail,開關一jih等真久無反應,jih第二下才開機好勢;以前每早起lóng有十封以上ê phue,銀幕上顯示講無未看信件。Tú teh感覺奇怪ê時,電話聲響起,想講七點十五分應該天光ah,無開電火去giâ電話,suah去lòng-tio̍h門柱。布袋戲ê師傅頭三郎兄khà電話來講伊beh khà電話招榮聰兄、欽一兄、守義兄tī禮拜三去in兜分配布袋戲尪仔,我心內想我平常早起五點起床ê人tsit-má來電無要緊,其他ê人是m̄是猶未起床,koh想今仔日禮拜一若siuⁿ uàⁿ khà可能會出去上班,所以我無kā三郎兄提醒講m̄好透早khà電話吵--人。

約拍球是早起九點,我八點beh落去樓腳食早頓,心內奇怪外面猶真暗,to-ài開電火才bē像tú-tsiah lòng-tio̍h門柱。到廚房ê時電話koh響,是台南師範學院ê特殊教育系教授林慶仁博士uì Texas khà來,想講橫直外面猶暗bin-bong球mā bē拍得,kap伊uì台灣視障教育講到伊tī公論報看tio̍h我ê台語文章,講到伊投稿這期ê公論報hit篇「棒球台灣與籃球中國──一邊玩一種球 」ê結尾漏去。 講去半點鐘外面猶koh是真暗,心想kám會日全蝕,但一般若有日全蝕媒體一定會報導,緊食早頓好來去拍球。食飽了天色lóng無天光ê款式,心內lú giâu疑kám會是世界末日? 禁bē-tiâu khà電話hō͘三郎兄,問伊tsit-má早起時beh九點ah外面猶hiah暗,伊講tsit-má暗時九點天暗無m̄-tio̍h ah,伊koh講我太太無tī-teh就日夜分bē清楚。

有影,tú-tsiah刮嘴鬚ê時mā感覺奇怪ká-ná嘴鬚thài會hiah短,原來是時間停止12點鐘,太太無tī身邊suah日夜分未清,mā可能是年歲khah濟ê關係,昨暗美芬姊叫阮食冬節圓,我koh加一歲loh。

M̄是世界末日,是我年老kah日夜分bē清楚,tio̍h覺醒!!!