《生活e5台語,台語e5生活》

| | | 轉寄

願為義光人──黃昭堂懺悔錄(二)

盧千惠女士是一位公認ê虔誠教徒。其翁婿許世楷則平凡,台灣來ê牧師訪日lóng會kap in夫婦連絡。黃彰輝牧師是一位長者、英國紳士,通常阮lóng到大田區糀谷,吳枝鐘醫師之病院兼自宅歡喜開講。阮不拘禮數,tī笑談ê中間,吳醫師kap許世楷主導,將黃牧師納入為台獨聯盟盟員。後來黃牧師接納我ê懇求,tī非常困難ê狀態下,tshuē出一本被國民黨外來政權沒收ê「紅冊皮」白話字聖經(現在排在台灣大學圖書館4樓黃昭堂文庫裡面)hō͘我。高俊明牧師真早期就有長者之風,因美麗島事件受難koh-khah受人敬重。我深覺長老教會對台灣ê愛,連he平常lóng無所聞ê女性教會職員林文珍、施瑞雲女士mā自願救人而受難,hō͘我倍增對女性kap教會ê敬重,in本來並m̄是政治運動者。鄭兒玉牧師對我來講是一位「恐怖份子」,對台獨聯盟ê做法,tú-tio̍h有過錯伊lóng會譴責。伊得tio̍h ê信息,未必正確。我會kā伊說明,但bē kā反駁。鄭牧師熱情奔騰,謁見伊,每pái lóng會得tio̍h鼓勵之故lah。伊詩意一到,the̍h起筆來,就寫詩hō͘我看。伊以Verdi ê曲調符詞ê「流浪海外ê台灣人」,伊教我唱,唱,唱到「想tio̍h美麗ê故鄉,目屎就流」,伊滿面目屎。Siōng熱心教導我,ài我受洗ê mā是鄭牧師,伊ê口頭禪:「把黃有仁phah入地獄siu°可惜,beh送入天國則無夠資格,結果吊tī半空中。你必須趕緊受洗!」黃有仁者,黃昭堂lah。我卻非常躊躇,將來回到故鄉必須膜拜祖先靈位kap廟寺ê王爺,一旦變成基督徒必然kap親戚發生磨擦,siu°過算bē-hô。人生如浮萍,我本人罪惡siuⁿ-tsē,做錯不勝枚舉,尤其hō͘慈母孤獨終生,此罪oh得抹消,bē-tàng siàu想天國。現在ē-tàng有tang時á享受教會平安ê氣氛,並ē-tàng kap國內外台灣人接觸,目的就已達到,何必到天國?這就是留日時期赴教會ê心境。

1992年冬,第一pái回到久別34年ê台灣。Beh去教會當然是「祖孫虐殺ê聖地」義光教會。雖然次數無tsē,總算是上教堂。昭和大學tio̍h到1998年tsiah ē-tàng退休,1995年在台灣就任台獨聯盟主席,台日間ê空中飛人程度忽然增加。

我kap蓮治,差不多二禮拜一飛,有時每週一飛。有一位牧師kā我講:「Mài認為隨時lóng ē-sái受洗,有時會來不及受洗」。我平常有一種認識,tú-tio̍h空難,m̄免如一般ê老病人tī病床呻吟伊死,是一種比較khah少痛苦ê死法,所以我無juā煩惱空難。雖然確實來不及受洗,但,既然無siàu想天國,he koh有啥物關係neh? 天母李勝雄長老ê厝隔壁就是伊丈人ê厝,我kap蓮治長期免費佔領之,koh常kap李長老家族、親戚共處、聚餐。看tio̍h李家閤家篤信基督教,恩愛喜樂,是一個模範家庭。教義難解ê時,李勝雄長老是一位親切ê老師,我受伊影響非常深。我tshun落來ê問題就是我本人人格ê陶冶,iáu 未到做一個夠資格ê基督徒。這變成我受洗á無siōng重要ê關鍵,我總bē-tàng受洗後tī人格上hō͘人指指點點。有一位牧師講道ê時講:「做一位基督徒tio̍h-ài做到全身發出香味ê人。」我小khuá有同感而決心自勉,並求主引tshuā。深知我種種缺點ê李勝雄卻講:「因為有罪tsiah需要赥免,koh-khah需要就近主。」(待續) (摘自義光教會設教25週年紀念特刊)