《賴永祥講書》

| | | 轉寄

《教會史話》(2_130)「高長伯」傳探原

高長,通常hō͘人叫做高長伯,是長老教會tī台灣ê第一ê果子,mā是第一位本地出身ê傳道者。真可惜kàu tsit-má ia̍h-buē有詳細ê資料刊..出來。伊在生相關ê消息,一般人知影ē可能lóng uì楊士養牧師寫ē《台灣信仰名人略傳》第一冊(1966年刊),ia̍h是楊士養編寫林信堅修訂《信仰偉人列傳》(1989年刊)。

楊士養牧師所寫信仰ē名人,材料豐富,記ē「不特為死者作紀念碑,更可為後人考資之鏡」(錄自「前言」),kan-tāⁿ差tī伊通常無註明資料ē來源。「高長伯」一文(tī《略傳》第一冊16-19頁),其實是高金聲牧師用白話字寫ē中文翻譯。高金聲牧師寫ē「高長伯」是南部教會歷史部所寫「追念聖徒」ê其中一ê,收tī《南台教會史》(楊士養著)成做附錄。既然是翻譯,guá tio̍h kā兩ê對照,發現tsi̍t-kuah問題。舉例來講:高文原記「高長伯是福建省泉州府(Tsuan-Tsiuhu)晉江縣永寧城的人」,m̄-koh楊文做漳州府,筆誤。高文koh記Li Hui兄受長伯ê誠實感動來入信事,楊文tio̍h寫作李輝兄,m̄-koh查考文前、李文後ê系譜,應是李惠……。

林信堅牧師修訂ê《信仰偉人列傳》(請見第17-23頁),竟然kā楊士養所寫ê「高長伯」,mā就是高金聲所寫「高長伯」ê中文譯,全部thâi掉;用1912年11月出刊《台南教會報》(第332號)無注明作者ê「高先生的小傳」譯文來代替,koh附林信堅寫tī 1985年3月31《台灣教會公報》(第1726期)ê古文新註做附錄。林君並無講清楚拿掉原本作者ê全文。 高侯青蓮長老(1879-1975年),是高再得長老娘,有歲ê時陣leh做編寫in ta-kuaⁿ高長傳教士傳記,運用聽tio̍h、看tio̍h、調查資料kap思考,koh有林宇(長老教女學第一屆校友)ê幫助,用白話字完成。遺族kám有意思beh發行?

有關高長在生資料ê找tshuē,guá感覺黃茂卿長老ê努力真值tit提出來講。伊tī《台灣基督長老教會太平境馬雅各紀念教會設教一二O年史》(1985年刊)早期史料內,koh tī《……(同)九十年史》(1988年刊)內,形容高長是台灣宣教ê「火戰車」,真kut力leh調查。Tī《……九十年史》,koh有高聰明醫師(高金聲牧師五男)提供真tsē高家收藏ê相片,真珍貴。

有關高長在生,中外資料koh需要找tshuē(譬如講《台南教士會議事錄》),伊ê系譜需要編做(kan-tā想看mài算傳道者、教會長執、社會領袖有juā-tsē?)真期待有tsi̍t工ē-tàng完成。

《台灣教會公報》 2023期 主後1990年12月初9