《台語荒漠甘泉（全羅版）》

Khùa-lū á an-tsīng

作者 Tân Tshing-tsùn

listen

Tsa̍p ge̍h pueh ji̍t

"It-khài bo̍h-tit khùa-lū." (Hui-li̍p-pí 4:6)

Būe tsió ki-tok-tôo tī ut-tsut, khùa-lū ê tsōng-thāi, ūi-tio̍h sing-u̍ah hûan-ló tang hûan-ló sai. Tī sing-u̍ah bô-îng tiong jû-hô ū sûn-tsûan pîng-an ê pì-kuat sī tsin iàu-kín ê sū. Iu-lū tùi lán ū sím-mi̍h lōo-īng? Tsiông-lâi m̄-bat ū lâng in-ūi iu-lū hōo i khah kiān-khong, á-sī pang-tsān lâng ûan-sîng Siōng-tè ê tsí-ì, á-sī pò lâng thuat-lī ut-tsut, iu-lū ê hong-huat. Hûan-ló tsí-ū ūe hōo lâng sing-u̍ah hāu-lu̍t kàng-kē, phò-hūai pún ū bí-búan ê jîn-sing. Lán ê Tsú tsu̍at-tùi kìm-tsí lán ê ut-tsut, iu-lū, hûan-tsa̍p, put-an, I kóng, "sóo-í bo̍h-tit khùa-lū kóng beh tsia̍h sím-mi̍h? beh lim sím-mi̍h? á-sī beh tshīng sím-mi̍h?" (Má-thài 6:31) I ê ì-sù kóng m̄-sī ài lán bô ūi-tio̍h tsiong-lâi kè-ūe, phah-sǹg, sī kóng m̄-thang ūi-tio̍h tsiah ê sū hûan-ló.

Lâng nā khùann lí bīn jiâu-jiâu iu-kat-kat, kóng-ūe ê siann-tiāu nńg-sô-sô, siau-ki̍k ê thāi-tōo, sim-lāi khuat-hu̍at hí-lo̍k, tsiū tsai lí siông-siông tī iu-lū hûan-ló tiong. Sóo-í tio̍h tsiong sìnn-miā kau-thok Siōng-tè, lóo-li̍k hiòng kûainn peh, kàu ū tsi̍t ê kûainn-tōo, lí beh khùann-kìnn hûn lóng tī lí ê ē-bīn. --- Darlow Sargeant
Siông-siông hûan-ló, kiann-hiânn, sū-sū hûai-gî, lâng-lâng lóng būe siong-sìn, tsiū sī jio̍k-tsiá ê piáu-hiān. Án-ni, kiám ūe hōo lí sím-mi̍h hó-tshù? Kiám m̄-sī ūe tsóo-tòng tio̍h lí ê hîng-tōng? Hóng-gāi tio̍h tsùe-tshut tì-hūi ê kuat-tīng? Lán pún thang khò sìn-sim phû khí-lâi, khiok in-ūi tī hûan-ló tsing-tsat tiong teh tîm lo̍h-khì.

Ah! An-tsīng sī jūa-tūa ê un-tián! "Lín tio̍h tiānn-tiānn, tio̍h tsai Gúa sī Siōng-tè;" (Si-phian 46:10) "Í-sik-lia̍t ê Sìng ê" (Si-phian 89:18) ūe pó-hōo tsín-kiù i ê tsú-bîn. Lán thang khíng-tīng kûainn-suann ūe súa-khui, I ê ūe íng būe hùe-khì. I ta̍t-tit lán ûan-tsûan ê sìn-nāi. Sóo-í, lâi ah, gúa ê lîng hûe kàu I ê pîng-an, tī Tsú Iâ-soo ê tinn-bi̍t hûai-phō tiong an-hioh.

Tng lí an-tsīng,
Lāi-sim ê lîng beh tshiong-múa hô-pîng.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw