《台語荒漠甘泉（全羅版）》

"Bi̍k-tó, Tsīng-tsīng siūnn"

作者 陳清俊 翻譯

listen






Tsa̍p-jī ge̍h jī-tsa̍p-sì ji̍t

"Ji̍t beh àm, Í-sat tshut-lâi tī tshân-nih, tsīng-tsīng teh siūnn;" (Tshòng-sè-kì 24:63)

Ká-sú lán īng khah tsūe ê sî-kan tan-to̍k tsi̍t-lâng, lán ūe piàn koh-khah hó ê ki-tok-tôo. Si̍t-tsāi, lán nā īng khah tsūe ê sî-kan tan-to̍k kap Siōng-tè tsīng-tsīng siūnn, lán ê sîng-tsiū beh ná ke-thinn. Sè-kan ê sū tsiàm lán tsin-tsūe sî-kan, lán ū tsi̍t tsióng tshò-gōo ê kuan-liām, tsiū-sī lán nā bô tshin-tshiūnn kan-lok ti̍t-ti̍t pháng, tsáu-lâi tsáu-khì, bô-îng tshih-tshih, lán tsiū būe thang sîng-tsiū. Lán bô siong-sìn tī tshiū kha tsīng-tsīng siu-ióng sī tiōng-iàu ê sū. Tsùe tsi̍t ê Siōng-tè ê kiánn-jî, lán piàn tsùe tsin si̍t-tsè. Lán siong-sìn "thih nā bô tī hé-lôo, á-sī thih-tiam" tsiū-sī lōng-hùi sî-kan. Tsóng-sī lán nā the̍h-tshut tsi̍t-tiap-á kú ê sî-kan lâi bi̍k-sióng, lâi kap Siōng-tè kóng-ūe, lâi gióng-bōng thinn-tíng, tse sī tùi lán siōng-tūa ê lī-ik. Lán bô tsin tsūe ki-hūe ūe puah-tshut lán ê sî-kan, hōo sim-lîng ûan-tsûan phah-khui, thang tsiap-siū Siōng-tè sóo beh sù sio̍k-lîng ê su-sióng kap li̍k-liōng.

Ū lâng kóng, "Bi̍k-sióng sī sim-lîng ê lé-pài-ji̍t." Khak-si̍t ū-iánn, tī lán bô-îng tshih-tshih ê sing-u̍ah tiong, ing-kai hōo lán ê sim-lîng ū lé-pài-ji̍t, pàng hē kang-tsok, tsīng lo̍h lâi, ǹg thinn. Tī Tsú ê bīn-tsîng tián-khui lán ê sim, tshin-tshiūnn Ki-tiân ê iûnn-mn̂g tsi̍t-iūnn, hōo thinn-tíng ê lōo-tsúi sip kàu tâm-tâm-tâm. Lán ing-kai ū tsit tsióng ê khong-kan, sím-mi̍h mā m̄-tsùe, sím-mi̍h mā m̄-siūnn, sím-mi̍h mā m̄ kè-ūe, tsí-ū tó tī tūa tsū-jiân tshinn-tshùi ê sóo-tsāi "hioh tsi̍t ē" (Má-khó 6:31).

Tsit tsióng ê sî-kan pīng m̄-sī lōng-hùi, lia̍h-hî-lâng ài ū sî-kan lâi póo hî-bāng, tsāi i, tse m̄-sī lōng-hùi. Tsoh-sit-lâng ài ū sî-kan bûa i ê liâm-á, i ê kang-khū, iā m̄-sī lōng-hùi. Hiān-tāi ê lâng, iû-kî sī too-tshī lâng, ài o̍h Í-sat ê bôo-iūnn, siông-siông kàu tshân-tsng, lī-khui too-tshī ê tsháu-nāu, suan-hua, lâi kap tūa tsū-jiân tshin-kūn. Án-ni, Sim khui-khuah, lîng an-tsīng, sin kiān-khong. Tī tshân-iá sàm-pōo, tī hái-pinn liù-ta̍h, tī suann-phiânn kiânn-kiânn leh, ūe súe tshing sim-tiong ê ut-tsut, lîng tit tshing-sin ê hí-lo̍k kap ǹg-bāng.

Hûan-ló, pàng hōo būe kì,
Khì iá-gūa kap Siōng-tè sann-kìnn.

Sìng-tàn mî ê tsi̍t siú si:

Seh-kíng tsing-siann

Sìng-tàn, Sìng-tàn khùai-lo̍k,
Tsin tsiànn koh lâi lo̍h, khok-khok-khok,
Ū hûai-liām, ū ùi-būn,
Ū huann-hí, ū khóo-būn,
Huan-lo̍k kua ê sió-tiāu, ná kng tiong tsi̍t ê iánn
khúan
Tsîng-pik tshiū ki, liân-kiat piàn-tsùe sìng-tàn-
khûan,
Mî kan siok-tsīng bô hōo tshiò-siann phah-lūan,
Tshinn-kng ē, seh-tíng kiânn ê lîng-á siann teh thûan.

Sìng-tàn, Sìng-tàn khùai-lo̍k,
Sui-jiân kî-kan bô kú ūe kiat-sok,
Iā ū tsin tsūe tsa̍p-siann tsióng-tsióng,
Tsham tī sìng-tàn kua-siann tiong,
Tio̍h thiann, in tshiùnn-kua ê lūe-iông,
Tio̍h khùann, in múi tsi̍t lâng ê tshiò-iông,
Bô thî-khàu, bô pi-siong,
Tshinn-kng ē, seh-tíng kiânn ê lîng-á siann teh suan-
iông.

Sìng-tàn, Sìng-tàn khùai-lo̍k,
Sìng-tàn tseh-kî kiat-sok,
Bô-iu bô-lū huan-lo̍k ji̍t-tsí kè-khì,
Bô koh thê-khí.
Tān-sī Sìng-tàn, Sìng-tàn ê huann-hí,
Îng-iāu kui tī Siōng-tè ê sìng-si,
Tùa hōo lâng sin ê nî,
Kap Siōng-tè hô-hó ê hok-khì,
Pîng-an hi-bāng jím-nāi thiànn-thàng sù bān-tso̍k,
Tshinn-kng ē, seh-tíng kiânn ê lîng-á siann thûan
phiàn pang-kok.
--- Frances Ridley Havergal

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw