《台語荒漠甘泉（全羅版）》

 | | | 轉寄

"Tī Tsú lāi-bīn ū pîng-an"

作者 陳清俊 翻譯 2008.09.28

listen



Káu ge̍h jī-pueh (Káu ge̍h jī-tsa̍p-pueh ji̍t)

"Hō͘ lín tiàm-tī guá ū pîng-an." (Iok-hān 16:33)
Huan-lo̍k kap siū tsiok-hok sī ū tuā-tuā ê hun-pia̍t. Pó-lô king-li̍k kè kuaiⁿ-kìm, thòng-khó͘, hi-sing, koh khó͘-lān kàu ki̍k-tiám, Tān-sī tuì tsiah ê, i tit-tio̍h Siōng-tè ê tsiok-hok. Só͘-ū ê hok-khì lóng tī i ê sim tiong, sìⁿ-miā tiong, tī i khùn-lân ê khuân-kíng tiong tsiâⁿ-tsuè sū-si̍t.

Ì-tāi-lī tuā tshut-miâ uai-o-lín (sió-thê-khîm) tsuan-ka, Paganini, ū tsi̍t pái ián-tsàu, tī kuan-tsiòng phah phok-á siaⁿ kiat-sok ê sî, huat-hiān uai-o-lín m̄-sī i siōng-hó siōng pó-kuì hit ki. Sū-si̍t siōng hit-ki uai-o-lín kun-pún m̄-sī i ê. I gōng-ngia̍h tsi̍t ē, tsiū bīn-tuì kuan-tsiòng kóng tshut sū-si̍t, i só͘ īng ê m̄ sī i ê uai-o-lín. I lia̍h tsuè sī hē tī āu-tâi, tng i tī āu-tâi ê sî, tsiah tsai ū lâng thau i ê uai-o-lín khì, uāⁿ tsi̍t ki pháiⁿ phín-tsit ê ga̍k-khì hō͘ i.

Paganini tuì āu-tâi koh tshut lâi kàu tâi-tsîng, khai-sí hiòng thiaⁿ-tsiòng kóng uē. "Tsu-uī lú-sū, tsu-uī sian-siⁿ, hiān-tsāi guá beh hiòng lín tsìng-bîng, im-ga̍k m̄-sī tsāi-tī ga̍k-khì ê lāi-bīn, sī tsāi-tī sim-lîng lāi-bīn." I tuâⁿ tshut hiah hó thiaⁿ ê im-ga̍k, sī tuì hit ki phín-tsit tsha ê ga̍k-khì tshut-lâi, thiaⁿ-tsiòng thiaⁿ kah hīⁿ-khang phak-phak-phak. In ê phok-á-siaⁿ tsha-put-to uē hō͘ tshù-kuà hian khí-lâi hiah tuā. Sī i khak-si̍t tsìng-bîng im-ga̍k put-tsāi ga̍k-khì, sī tuì i ka-kī ê sim-lîng lāi huat-tshut-lâi!

Li̍k-kè tshì-liān kap khó-giām ê sìn-tô͘ ah, lín ê sù-bīng sī kiâⁿ tī sè-kài ê bú-tâi-tsîng, hiòng thiⁿ-tē só͘ ū it-tshè lâi piáu-bîng, sìⁿ-miā ê im-ga̍k put-tsāi tsiu-uî ê khuân-kíng kap guā-tsāi ê sū-bu̍t, sī tsāi-tī lín ka-kī sim-lîng lāi.

Nā-sī sim-tiong ū pîng-an,
Tang-thiⁿ ê po̍k-hong-seh iā sī tshàn-lān,
Puàⁿ-mî ê sih-nà iā uē tsiò kng sè-kan,
Muí tsi̍t ê ua̍h-mi̍h tshut sin koh huaⁿ-hí lâi tshing-tsàn,
Muí tsi̍t tsâng tshiū, tsi̍t tè tsio̍h, gîng-tsiap thiⁿ-kng tsho͘ tàn,
Nā-sī sim-tiong ū pîng-an. --- Tsarles Francis Ritsardson


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com