《台語荒漠甘泉（全羅版）》

 | | | 轉寄

"Kiàn-li̍p lîng-sìng ê phín-keh"

作者 陳清俊 翻譯 2008.10.05

listen


Tsa̍p ge̍h tshue-gō͘ (Tsa̍p ge̍h gō͘ ji̍t)

"Āu-lâi khue-tsuí ta." (I Lia̍t-ông-kì 17:7)

Ká-sú lán bô tuì Siōng-tè hō͘ lán ê sún-sit, sit-pāi, khang-hi o̍h-tio̍h tse sī Siōng-tè bo̍k-ióng lán ê kang-tsok, lán só͘ siū sìn-sim ê kàu-io̍k tsiū sī bô uân-tsuân. Sū-si̍t, tī bu̍t-tsit ê bô an-tsuân, uē hō͘ lán ê lîng-sìng koh-khah khiā-tsāi, kian-kiông khí-lâi.

Í-lī-a tsē tī tsiām-tsiām ta khì ê Ki-li̍p khue teh bi̍k-sióng, tsiū-sī lán jîn-sing ê siá-tsiò. "Āu-lâi khue-tsuí ta" lah, sī tsá-ji̍t ê li̍k-sú, iā-sī lán bîng-ji̍t ê ū-kò.

Bô-lūn jû-hô, lán lóng ha̍k-si̍p tio̍h, siong-sìn “un-sù” kap sìn-jīm “Si-un-tsiá” ê tsha-pia̍t. Un-sù sī tsi̍t sî-tsūn, Si-un-tsiá sī íng-uán ê, ū thiàⁿ-sim ê Siōng-tè.

Sian-ti Í-lī-a kàu Sat-li̍k-huat í-tsîng, Ki-li̍p khue tuì i sī tsi̍t ê oh kái-sik ê bê. Tng i kàu Sat-li̍k-huat í-āu tsiū bîng-pi̍k muí hāng sū. Siōng-tè hō͘ lâng khùn-lân ê tsí-sī pīng m̄-sī tsuè-āu ê kiat-kó, in-uī jîn-sing ê tsai-hō, sún-sit kap ba̍k-sái tsí sī jîn-sing ê tsi̍t pō͘-hūn, pīng m̄-sī tsuè-āu ê tiāⁿ-tio̍h.

Ká-sú Tsú tuà-niá Í-lī-a ti̍t-tsiap khì Sat-li̍k-huat, i tsiū sit-khì tī Ki-li̍p khue ê sìn-sim sing-ua̍h, iā sit-khì pang-tsān i tsiâⁿ-tsuè koh-khah ū tì-huī ê sian-ti, kiàn-li̍p khah hó phín-keh ê ki-huē. Tng lán tē-bīn ê khue-tsuí á-sī guā-tsāi tsu-guân ta khì ê sî, lóng-sī Siōng-tè só͘ hí-khó ê, ài lán tsai, guân-lâi lán ê hi-bōng kap pang-tsān lóng tsāi-tī tshòng-tsō thiⁿ-tē ê Siōng-tè ê tshiú tiong. --- F.B. Meyer
Lí bat tuà tī tshing-tsīng khue tsuí piⁿ,
Ià-siān tshuì-ta ū tsuí lim tsin kah-ì,
Sî-kan kú, khue-tsuí bô koh tshin-tshiūⁿ tong-tsho͘-sî,

Pún ū huan-lo̍k ua̍h-la̍t ê siaⁿ-im,
Bô pó-liû hō͘ lâng ê thiàⁿ-sim,
Sî-kan tn̂g, hí-lo̍k thiàⁿ-sim tsiām-tsiām tîm.

Lîng-hûn ah, hit-sî sim-ài ê khue hō͘ lí phuà-táⁿ,
Nā-sī kè-khì thang lim ê khue-tsuí ko͘-ta,
Lí ê sim tio̍h kín-kín uá-kūn I lah.

I buē pàng-sat lí, hō͘ lí sit-bāng,
I ê an-uì kap tsiàu-kò͘ buē kái-piàn puàⁿ hāng,
Beh īng hí-lo̍k ê iû buah lí, tshit-khì lí ê ba̍k-sái, tsài ua̍h-tāng. --- J.Danson Smith


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com